Supermarket nih an thil man an tthumh deuh cang lai tiin Anthony Albanese nih a chim

Supermarket ngeitu hna nih zulh hrimhrim dingin an sermi upadi an zulh lo ahcun $10 million (nuai) tluk dan-tatnak an tong lai.

The Food and Grocery Code of Conduct, which governs how supermarkets interact with suppliers, is currently a voluntary scheme. Source: AAP / Luis Ascui

Key Points

• Ei le din chawdawr a tuahmi hna caah zulhphung an ser mi zohthannak an ngei.
• Craig Emerson hi tuanvo khinhmi a si, zulhphung a zul lo mi poah $10 million liamter an si lai.
• Ramhruaitu Minister Zulhphung an sermi nih thil man a ttumter deuh lai tiin Ram hruaitu Anthony Albanese nih a chim

Ramhruaitu nih a chim ning ah cun, supermarket nih an zulh hrimhrim dingmi phung an ser mi nih thil man ttumter deuh lai.

Ei din zuarmi chawdawr hna caah zulhphung an ser mi cu zohthannak an ngei, hi zulhphung nih a hmaithlak mi cu chawdawr ngeitu le thildawr an laknak hna kar pehtlaihnak kha a si. Cucaah, phungning tein pehtlaihnak a tuah lo mi supermarket kip dan-tatnak pek an si lai.

Supermarket a ngeitu nih an zulh ding phung zohthannak cu Labor vuanci hlun Craig Emerson tuanvo khinh a si. Zulhphung an ser mi cu ahopoah nih zulh hrimhrim dingin le phung a buar mi poah $10 million dantat dingin nawl chuah siseh tiin a chim.

Atutan an thil tuahmi nih thatnak a chuahpi lai, thil man a ttumter deuh lai ati i, hruaitu Albanese cu lunghmui ngaiin a um.

"Kan thil tuahmi nih a hmaithlak mi cu supermarket kip nih an thil man an duh poah in an kaih khawh lonak ding le Australia mipi thil man kongah an vuivai ti nak hnga lo hihi kan tuah mi a si" tiin ABC radio ah a chim.

"Atu lio ah zeidah kan ton mi cu a si ti ah cun, supermarket nih a zulh hnga awk a si mi zulhphung kha fawi zaang tuk in a hrial khawh."

Atutan kan tuah ding mi zulhphung zohthannak nih a hlei in a hmaithlak mi hna cu Coles, Woolworths le Aldi hi an si. An mah pawl ca hrimhrim ah a hram fekmi zulhphung, hrial awk a tha lo mi kan ser a hau.

Supermarket ngangan nih an ngeih mi thil ti khawhnak hrawh, rian an pek mi hna minung rian phuah an ton ding tiang dirhmun phak ti bantuk kha atu tan kan thil tuahmi nih a timh mi a si lo.

Ramleng chawdawr kan ram ah an rak luh ding cu nan duh mi a si cio lai maw tiin mipi sin ah biahalnak Albenese nih a tuah.

Emerson nih atutan i kan sermi phung hi cu supermarket nganngan hna i rian an tuanning, an cawlcanghning kherhlai le purhdahnak ca lawngah a tha tiin a chim.

Tangka tampi liam le cawi hau dirhmun a phan mi an um ding cu ka duh lo, nain ningcang loin rian a tuan mi hna caah dant-tatnak fak a um ve lo cu a si kho lo tiin a bia a peh than.

Chungkhar tampi cu ei din herh-hai cawknak kongah lungrethei in an um, a ruang cu thil man fak tuk. Woolworth le Coles nih thil an duhning in an rak kaiter.