Ntsiab lus tseem ceeb:
- Tsoom fwv teb chaws tau teev txog ib tug neeg Russia hacker npe tias yog tus tsim teeb meem ua rau Medibank tej xov xwm paim quav.
- Tsoom fwv thiaj tau siv nws lub fwj chim los rau txim thawj zaug rau ib tug neeg Russia.
- Tsis tas li ntawd los kuj tau muaj ib co kev rau txim tshiab rau cov neeg Hamas thiab Hezbollah thiab.
Tsoom fwv teb chaws Australia tau rau txim rau ib tug neeg Russia thiab tau liam tias nws muaj feem cuam tshuam ua rau lub tuam txhab Medibank Private tej xovxwm paim quav.
Hnub zwj Quag (Tuesday) no ces Richard Marles uas yog Australia tus lwm thawj pwm tsav tau hais tias Australia tau siv tej cai tawm tsam cov teeb meem cyberattack los rau txim rau tus txiv neej neeg Russia hu ua Aleksandr Ermakov uas nws tau hais tias tus neeg no muaj feem tsim cov teeb meem cyberattack rau lub tuam txhab Medibank tsaib no.
Mr Marles tau qhia rau tej neeg nthuav xov xwm hnub zwj Quag (Tuesday) tias "Cov kev rau txim uas tau tsub rau Aleksandr Ermakov hnub no thiab tau los tuav nws npe hnub no yuav ua rau muaj teeb meem rau ntau yam nws ua thiab yog cov kev xa ib tsab xo muaj zog heev rau tej neeg cyber-criminals thoob ntiaj teb tias peb yeej kub siab daws tej teeb meem no tiag,''
Marles tau hais tias muaj tej neeg tej xov xwm yuav laug txog li 10 million cov raug nyiag tau lawm suav tej neeg cov npe, hnoob nyoog, Medicare numbers, thiab tej xov xwm kho mob tsis zoo qhia rau lwm tus uas tseem muaj ib txhia xov xwm no raug coj mus tso rau hauv tej dark web (tej website txhaum cai) thiab.
Nws tau hais tias "Tau ob peb xyoos dhau los no ces peb yeej tau pom tias muaj teeb meem dab tsi los ntawm tej xwm txheej cyberattacks uas muaj thoob teb chaws no ... los yog ntiaj teb no lawm. Ces thiaj yog tej teeb meem nyuaj kawg nkaus uas peb lub teb chaws thiab tej lagluam ntsib tam sim no."
Clare O'Neil uas yog tus nom tswj lub tuam chav Home Affairs tau hais tias tej neeg tau mus hack lub tuam txhab Medibank mas yog tej neeg 'tais caus tsis muaj peev xwm thiab yog tej neeg siab phem siab tsis ncaj."
Ms O'Neil tau hais tias "Lawv yog cov neeg siv technology los tsim teeb meem rau lwm tus thiab tam sim no ces tus tsoom fwv Australia no yeej tab tom qhia tias yog thaum peb rau siab ntso los txheeb tej teeb meem no lawm ces peb yeej yuav qhia tias koj yog leej twg, thiab yuav ua tib zoo xyuas koj coj los los rau txim."
Penny Wong uas yog Australia tus nom tswj dej num txawv teb chaws tau hais tias cov kev nyiag lub tuam txhab Medibank tej xov xwm no ''ib cov kev ua txhaum loj thiab yuav zam tsis tau'' uas tau ua rau muaj teeb meem ''loj tshaj plaws rau tej tub koom siab'' zej tsoom.
Cov kev tsub txim no yuav ua rau tus neeg ntawd yog ib tug neeg ua txhaum cai, thiab yuav raug rau txim kaw tsev laj cuj txog 10 xyoo yog tias tseem pab peev txheej nyiaj txiaj rau Ermakov los yog siv ntau yam peev txheej li cyrptocurrency los yog tseem them nyiaj rau vim siv cov rainsomware hawv kom tau nyiaj.
Australia rau txim ntau yam ntxiv rau Hamas thiab Hezbollah
Tsoom fwv teb chaws yeej tau tsub txim rau 12 tug neeg uas tau pab nyiaj rau tej neeg phem txim xwm txheej tua pej xeem kom zej tsoom ntshai thiab tsub txim rau peb pawg neeg li Hamas, Hezbollah thiab Palestinian Islamic Jihad.
Raws li Wong tau hais ces ntawm cov kev tsub txim no ces kuj muaj tej coj ntawm pawg neeg Hamas, tej neeg pab nyiaj thiab tej neeg pab "xyaum tej neeg phem mus tsim teeb meem'', nrog rau peb lub koom haum uas nrog xyuas kom xa tau nyiaj mus pab Hamas.
Wong tau hais ntxiv tias cov kev tsub txim no tau tshwm sim ua ke nrog lwm cov kev tsub txim rau tej xwm txheej uas Hamas tsim uas Meskas, Aaskiv thiab lub koom haum European Union rau txim thiab.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
