Optus tsis paub tias yog tim dab tsi ntau millions tus neeg Australia thiaj siv tsis tau nws cov network

Optus tau hais tias nws tej engineers tseem tab tom tshuaj ntsuam ib co teeb meem muaj rau nws cov network uas ua rau siv tsis tau xov tooj ntawm tes thiab siv tsis tau internet thoob teb chaws Australia no.

A nationwide outage has affected mobile and internet services. Source: Getty / Brendon Thorne

Ntsiab lus tseem ceeb:

• Siv tsis tau Optus network thoob Australia no ces thiaj ua rau muaj ntau millions tus customers siv tsis tau lawv tej xov tooj ntawm tes thiab siv tsis tau internet.
• Lub tuam txhab no tau hais tias nws tej engineers tab tom txheeb seb yog tim dab tsi thiaj ua rau muaj teeb meem rau tej customers.
• Tej tsev kho mob, tej lagluam, tej tsheb ciav hlau thiab ntau cov lagluam/koom haum los kuj tau qhia tias cov kev tsis muaj peev xwm siv tau cov network no ua rau muaj teeb meem rau lawv.

Optus hais tias nws tsis paub tias yog tim dab tsi thiaj ua rau muaj teeb meem ua rau ntau millions tus customers tsis muaj peev xwm siv tau xov tooj thiab internet thoob teb chaws Australia ni, tej lagluam me los kuj qhia tias lawv tsis muaj peev xwm serve tej customer, thiab tej tsev kho mob los kuj tsis muaj peev xwm hu tau xov tooj tawm tau rau lwm qhov chaws.

Thaum ntxov hnub Wednesday (Zwj Feej) ces Optus tau hais tias nws tej engineers tab tom txheeb nws cov network seb yog tim dab tsi thiaj ua rau muaj teeb meem rau nws tej customers.

Thiab vim tsis muaj peev xwm siv tau internet ces thiaj ua rau tsis muaj peev xwm teb tau xov tooj ntawm tes los yog hu tawm rau lwm tus.

Muaj Optus ib co customers tau qhia tias hauv social media tias lawv tsis muaj peev xwm siv tau xov tooj, tsis muaj peev xwm siv tau internet thiab tsis muaj peev xwm hu tau xov tooj rau lwm tus.

Coles Mobile yeej siv Optus network thiab yeej tau qhia meej ntawm nws lub vas sab tias nws siv tsis tau internet thiab.

Optus 'tab tom txheeb tias seb tim dab tsi' thiaj ua rau siv tsis tau nws cov network

Tau muaj Optus ib tug kis tau hais tias nws lub tuam txhab tab tom kub siab los kho kom rov qab siv tau nws cov network.

AAP tau teev txog Optus cov ncauj lus tias "Peb tab tom txheeb seb yog tim dab tsi thiab peb thov txim uas tau ua rau siv tsis tau tej xov tooj thiab peb tej network."

"Yog tias ho poob rau cov xwm txheej ti tes ti taw ces xav kom peb tej customers hu rau tus xov tooj Triple Zero (000) uas yeej tseem muaj peev xwm siv tau."

Optus tau sau ntawv qhia ntawm lub social media platform X (Twitter dhau los) thiab yuav tsis muaj peev xwm hu tau rau tus xov tooj 000 yog tias siv Optus cov xov tooj.

Nws thiaj txhawb nqa kom tej customer uas xav siv kom siv xov tooj ntawm tes hu rau emergency services, thiab hais tias yeej tseem siv tau ''yog tias yog tseem muaj lwm cov twj tseem siv tau.''

Lub koom haum Fire Rescue Victoria tau hais tias vim siv tsis tau xov tooj, ces tsis muaj tej neeg sab nrauv hu tau rau nws tej xov tooj.

Michelle Rowland uas yog tus nom teb chaws uas tswj cov dej num Communications tau hais tias nws yeej tau nrog Optus tham txog cov teeb meem ''loj'' uas muaj rau nws tej network tab sis nws kuj tsis muaj peev xwm qhia tau tias seb puas yog tim raug cyber attack.

Nws tau qhia rau ABC Radio Sydney hnub Wednesday tias "Kuv yeej tsis xav cia li lam tawm tswv yim dab txog tej ntawd tam sim no."

"Optus tus coj yeej tau nrog kuv tham thiab yeej tsis hais dab tsi txog tej no, yog li kuv thiaj tsis xav tawm tswv yim dab tsi txog tej no."

Rowland thiaj tau nqua hu kom Optus qhia "tej xwm txheej no rau ntau tshooj uas nws muaj peev xwm ua tau'' coj los qhia rau nws tej customers kom paub tias yog muaj teeb meem dab tsi tiag.

Cov kev tsis muaj peev xwm siv tau xov tooj thiab internet tau ua rau muaj teeb meem rau tej txhab nyiaj, tej lagluam, tej tsev kho mob thiab tej tsheb ciav hlau

Yeej tau muaj ntau lub tsev kho mob thoob xeev Victoria thiab New South Wales tau qhia tias lawv tsis muaj peev xwm siv tau tej xov tooj vim siv tsis tau Optus network, ces thiaj muaj ib txhia tau nqua hu kom tej neeg mob xa email rau lawv txog rau thaum muaj kev pauv hloov tshiab tso.

Lub txhab nyiaj Commonwealth Bank (CBA) los yeej tau sau ntawm hauv X tias nws tej chaw teb xov tooj tsis muaj peev xwm hu tau xov tooj los yog teb tsis tau tej xov tooj vim siv tsis tau Optus network, tab sis nws tej ATMs, thiab internet banking, tej app, thiab cov ceg tuam txhab nyiaj thiab lwm cov services yeej tseem siv tau. Thiab nws kuj tau qhia tias tej customer tseem muaj peev xwm siv tau lub app sib txuas lus tau nrog nws, thiab tseem siv tau online banking tab sis tej zaum ntshe yuav qeeb zog.

Kuj tau muaj ib txhia lagluam raug yuam kom hais kom tej customers rov qab vim lawv siv tsis tau tej twj EFTPOS, siv tsis tau tej xov tooj thiab Optus network uas yeej raug teeb meem tag nrho.

Melbourne tej tsheb ciav hlau los kuj tau qhia thaum ntxov hnub Wednesday tias siv tsis tau vim siv tsis tau Optus network.

Tau tso tseg tag nrho Melbourne tej tsheb ciav hlau rau thaum 4.30 am rau hnub Tuesday vim muaj teeb meem rau cov communications. Source: AAP / Joel Carrett

Metro Train services thiaj tau rov qab pib siv tau cov tsheb ciav hlau ua ntej yuav txog 6 am tab sis yeej tseem muaj ib txhia raug ncua rau thaum sawv ntxov uas muaj neeg siv coob heev, tab sis kuj rov qab siv tau lawm.

Lub tuam chav Department of Transport tau hais ib cov ncauj lug tias "Yeej tau ua rau muaj teeb meem loj kawg nkaus tsis muaj peev xwm yuav siv tau cov services thiab ntshe tseem yuav tau ncua ntau cov services ua ntej yuav rov qab muaj peev xwm siv tau li qub.''

"Peb thiaj xav kom tej neeg caij tsheb ciav hlau txheeb lub PTV app los yog peb lub vas sab (website) seb ho muaj cov fij tsheb ciav hlau hloov li cas los yog ho ncua tsis khiav tej fij tsheb ciav hlau li cas lawm."

Tau muaj ib tug kis ntawm lub koom haum Victorian Curriculum and Assessment Authority (VCAA) tau qhia meej rau phau ntawv xov xwm Guardian Australia tias yeej yuav xeem VCE exams raws li tau npaj tseg rau thaum sawv ntxov, txawm tias tau ncua siv tsis tau public transport lawm.

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.