Cov kev muaj teeb meem rau Optus network tau ua rau muaj ntau million tus customers tsis muaj peev xwm siv tau xov tooj ntawm tes, xov tooj hauv tsev thiab xov tooj ntawm tes thoob teb chaws Australia no.
Tsis muaj peev xwm siv Optus network thaum 4 teev sawv ntxov hnub zwj Feej (Wednesday tim 8.11.2023) ces thiaj ua rau tej customers tsis muaj peev xwm yuav teb tau xov tooj los yog hu tau xov tooj los yog siv tau internet li.
Nod yog tej uas peb paub dhau los.
Tim dab tsi thiaj ua rau siv tsis tau Optus?
Kelly Bayer Rosmarin uas yog Optus tus coj tau hais tias nws tej engineers tau tab tom txheeb seb yog tim dab tsi thiaj ua rau muaj teeb meem siv tsis tau Optus network, tab sis kuj tseem tsis tau muaj peev xwm txheeb tau tias yog tim dab tsi tiag.
Tab sis nws yeej tau hais tias ''yeej tsis muaj dab tsi'' yuav qhia tau tias yog cov teeb meem cyber attack dab tsi, thiab yeej tsis muaj teeb meem rau nws tej software li cas thiab.''
Nws tau qhia rau ABC Radio Sydney tias "Peb cov systems yeej yog ib co uas siv tau zoo."
"Tej xwm txheej no yog ib cov xwm txheej uas muaj tsawg tsawg zaug xwb, thiab yog thaum kuv paub tias yog tim dab tsi lawm ces kuv yuav yog tus xub qhia rau tag nrho peb tej customers paub."
Michelle Rowland uas yog tus nom tswj dej num Communications tau hais tias yog ib co teeb meem ''nthuav dav heev.''
Nws tau qhia rau tej neeg tshaj xov xwm ntawm Sydney tias "Tau muaj teeb meem loj heev rau Optus network.''
"Vim rau qhov tau ua rau muaj teeb meem nthuav dav heev thoob rau cov xov tooj ntawm tes, xov tooj siv hauv tsev thiab nws cov broadband.''
Ho muaj teeb meem phem npaum li cas rau cov kev tsis muaj peev xwm siv tau Optus network thiab leej twg raug tej teeb meem no?
Yeej tau ua rau muaj tej neeg coob tshaj 10 million tus uas yog Optus cov customers ntawm Australia no thiab txawv teb chaws tsis muaj peev xwm siv tau Optus network.
Coles Mobile uas siv Optus network yeej tau qhia meej rau hauv nws lub vas sab tias nws kuj tsis muaj peev xwm siv li thiab.
Kuj tseem muaj ib txhia lagluam me raug yuam kom lawv tej customers rov qab mus tsev vim siv tsis tau tej tshuaj them nyiaj EFTPOS, tej xov tooj thiab Optus cov network no tseem ua rau muaj teeb meem rau tag nrho txhua yam, ua ke no los thaum ntxhov hnub zwj Feej (Wednesday tim 08.11.2023) ntawd ces yeej tsis muaj peev xwm siv tau Melbourne tej fij tsheb ciav hlau thiab.
Commonwealth Bank (CBA) tau qhia meej tias nws tej chaw hu thiab teb xov tooj yeej tsis muaj peev xwm txais tej xov tooj hu tuaj rau nws vim muaj teeb meem rau Optus network, tab sis yeej tseem muaj peev xwm siv tau nws tej tub rho nyiaj ATMs, internet banking, app thiab cov ceg txhab nyiaj thiab lwm yam services.
Nws thiaj tau hais tias tej customers yeej tseem muaj peev xwm siv tau lub app sib txuas lus nrog nws thiab tseem muaj peev xwm siv tau cov online banking tab sis ntshe tej zaum yuav ib nyuag qeeb me ntsis.
Yeej tau muaj ntau lub tsev kho mob thiab tej chaw kho mob thoob teb chaws los kuj tau qhia tias ua rau tsis muaj peev xwm siv tau lawv tej xov tooj, thiab muaj ib txhia yeej tua hais kom tej neeg mob xa email rau lawv txog rau thaum muaj cov kev pauv hloov tshiab tso.
Txawm tias Optus tej customers uas siv xov tooj ntawm tes feem coob yeej tseem muaj peev xwm hu tau rau Triple zero (000), los yeej tsis muaj peev xwm siv tau tej xov tooj hauv tsev/chaw ua hauj lwm hu tau rau tus zauv no.
Optus tau sau ib cov lus hauv X tias "Yog tias Optus tej customers xav hu rau emergency services, ces peb xav kom nrhiav ib tug neeg ntawm lawv tsev neeg los yog yim neeg nyob ze lawv thiab siv lawv tej xov tooj lwm yam pab."
Lub koom haum Fire Rescue Victoria hais tias vim tsis muaj peev xwm siv tau Optus network, ces nws thiaj tsis muaj peev xwm teb tau tej xov tooj uas tej neeg hu sab nrauv tuaj rau nws.
Ces cov kev tsis muaj peev xwm siv tau Optus network no thiaj tau ua rau muaj teeb meem rau nom tswv xeev thiab tsoom fwv tej tuam chav hauj lwm, piv txwv li Medicare uas ''tseem yuav raug txheeb xyuas,'' raws li Rowland tau hais.
Thaum twg mam li kho tau Optus network rov qab los siv?
Optus tau hais tias yeej rov qab siv tau ib co services uas nws kho tau lawm, thiab yeej ''maj mam'' rov qab siv tau tej xov tooj ntawm tes lawm thiab.
Nyob rau ib cov lus nws sau rau hauv X, ces lub tuam txhab no tau hais tias ntshe tseem yuav siv sij hawm ntau teev mas thiaj mam li rov qab siv tau tag nrho nws cov services, vim rau qhov yuav tau kho ntau yam services sib txawv ntawm ib cov vas sab twg.
Thaum tseem ntxov hnub no ces Bayer Rosmarin uas yog Optus tus coj tau hais tias "Peb yeej xub kub siab tshaj plaws ua ntej los xyuas kom rov qab kho tau cov services rau peb tej customers siv ua ntej'', tab sis nws kuj tsis qhia tias tseem yuav tshuav ntev npaum li cas thiab.
Nws tau hais tias ''Peb pawg neeg yeej tau siv ntau txoj xub ke los kho kom rov qab tau cov services no siv."
''Peb yeej tseem kho tsis tau tau raws li qhov peb xav tau thiab peb yeej tab tom siv txhua lub tswv yim los pab kom sawv daws rov qab muaj peev xwm siv tau kom sai npaum li sai tau. Thaum peb txheeb tau tias yog tim dab tsi lawm, thiab paub tias yuav siv caij ntev npaum li cas, ces peb pam li qhia rau sawv daws paub."
Optus CEO Kelly Bayer Rosmarin. Source: AAP / Supplied/PR Image
Tab sis ntshe yeej yuav siv sij hawm ntau teev thiaj mam rov qab kho tau Optus cov system kom rov qab siv tau i qub.
Nws tau hais tias "Kuv yeej tsis tau pom dua los li tias yuav siv sij hawm ntau hnub thiaj kho tau, txawm li cas los txhua lub tuam txhab nyias yeej muaj nyias cov txheej txheem kho sib txawv thiab."
Optus customers txheeb tau tej xov xwm tshiab qhov twg?
Rowland tau hais tias yog tej yam tseem ceeb uas Optus yuav tsum tau qhia qhov tseeg thiab qhia tej xov xwm tshiab kom tsim nyog raws caij nyoog rau nws tej customers paub.
Bayer Rosmarin tau hais tias tej customers muaj peev xwm txheeb tau tej xov xwm tshiab ntawm Optus lub vas sab (website) thiab ntawm My Optus app.
Nws tau qhia tias tej neeg uas tsis muaj peev xwm siv tau internet vim siv tsis tau Optus network ces kuj muaj peev xwm siv wifi ntawm Optus tej khw kom thiaj paub txog tej xov xwm tshiab.
Optus puas yuav them nyiaj paj tshab pauj rau nws tej customers?
Rowland tau hais tias ''ntseem ntxov heev'' uas yuav los sab laj txog tias seb puas them nyiaj paj tshab pauj los yog yuav tham txog tej customer tej cai tam li yog ib co neeg siv Optus tej services.
"Tab sis kuv xav rov qab teev txog TIO (Telecommunications Industry Ombudsman) tej lus tias yog tej yam tseem ceeb hais tsi ntsees rau tej lagluam me ces xav kom khaws nej tej receipts cia, ces yog ho muaj teeb meem dab tsi rau lawv thiab xav kom lub tuam txhab no them pauj los kom thiaj li muaj pov thawj pab.''
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab Downloadthiab caum
