Yog tias koj nyob ntawm ib lub khw supermarket twg ces koj yuav pom cov ntawv daj haub tau yaum rau ib yam khoom twg tias txo nqe pheej yig.
Tab ssis yog thaum ua tib zoo txheeb xyuas lawm ces koj yeej tseem pom tus qub nqe uas tseem pheej yig dua tus nqe tshiab uas haub tau yam tias pheej yig ntawd thiab.
Raws li lub koom haum CHOICE hais ces tej no yog ib lub tswv yim ntawm cov tswv yim uas tej supermarket siv coj los ''txhawb nqa cov nqe cuav dag'' uas ua kom tej neeg yuav khoom pom tias zoo li tej khoom pheej yig dua.
Nyob rau ib cov kev teeb txheeb tshiab, ces lub koom haum CHOICE tau txheeb tau tias muaj tej neeg yuav khoom siv ntau tshaj 80 feem pua uas nws tau nrog tham yeej tau hais tias qee cov kev txo nqe pheej yig uas Coles thiab Woolworths txhawb nqa ntawd yog tej yam nyuaj heev uas lawv yuav paub tau tias seb puas yog cov kev txo nqe tiag tiag.
Tau muaj ib tug neeg uas koom cov kev teeb txheeb no tau qhia rau lub koom haum CHOICE tias "Thaum yus xyuas tej txee tum khoom uas los ntau cov ntawv xim sib txawv rau ces kuj yog tej yam ua rau yus yoob kawg nkaus li thiab,''
"Qhov kuv xav paub tshaj plaws ces seb puas yog txo nqe pheej yig tiag tiag. Vim tej nqe xub los rau mas me heev li thiab pheej yuav tau siv iav tsom mas thiaj txheeb tau xwb.''
Bea Sherwood uas yog tus Senior Campaigns thiab Policy Advisor ntawm lub koom haum CHOICE tau hais tias tej supermarket yeej tau siv ib co tswv yim ''ua kom tej neeg yoob'' uas tau ua rau tej customers tsis muaj peev xwm txheeb tau tias lawv puas txuag tau nyiaj los ntawm tej khoom noj khoom haus uas lawv yuav ntawd los yog txuag tsis tau nyiaj li cas li.
Sherwood tau hais tias "Tej neeg yuav khoom siv tsim nyog yuav paub tej nqe tiag tiag ntawm tej khoom ntawd kom lawv thiaj paub tseeb tias lawv tau txais txiaj ntsim rau tej nyiaj siv yuav tej khoom ntawd tiag. Peb xav tau ib co cai tshiab uas yuam kom tej supermarket yuav tsum tau xyuas kom muaj cov kev dawb huv li no tiag tiag, thiab ua tib zoo xyuas kom tej koom haum tswj tej lagluam no coj ncaj tiag.''
Nod yog qee cov tswv yim uas tej zaum koj yeej tau pom ntawm tej txee tum khoom muag ntawm tej supermarket lawm:
'Tus nqe dhau los/Tus nqe tam sim no'
Nod ces yog thaum uas tej supermarket txo tus nqe kim heev thiab siv dua tus nqe tshiab kom tau muag.
CHOICE hais tias ib qho piv txwv uas Coles lub khw ntawm lub zos Marrickvill ntawm nroog Sydney ua ntawd ces yog cov kev haub tau yaum rau cov tshuaj da dej Palmolive Shower Scrub Coconut Butter 400ml uas nws txo nqe 'Down Down' los ua $4.50 ntawd ces yog txo ntwm tus nqe $6.49 lub 9 hli ntuj xyoo 2017.
Tab sis raws li nws (CHOICE) hais ces twb yig 5 xyoos dhau los lawm thiab twb tshaj 3 xyoos 6 hli ua ntej yuav qhib lub khw Coles Marrickville.
Raws li lub koom haum CHOICE hais ces tej supermarket yeej muaj peev xwm xaiv ib lub caij twg uas tej nqe khoom kim thiab yeej tsis kub siab txog lwm cov nqe khoom nce los yog nqes txij ntawd los lawm, suav tej caij uas tej khoom ntawd pheej yig nrog tib si.
Thiab raws li CHOICE tau sau ib cov lus tawm tswv yim hauv nws tsab ntawv uas tau mus txheeb txog tej nqe muag khoom ntawm tej supermarket uas pawg rooj saib xyuas tsev kis xeev siab txib kom mus txheeb (Senate Select Committee on Supermarket Prices) ces nws tau hais tias:
"Peb txheeb tau tias tej zaum ib yam khoom twg yuav kim dua yav tag los thiab, tab sis tej supermarket tseem muaj peev xwm coj tej no los siv tam li yog ib cov kev txo nqe rau tej neeg yuav khoom siv thiab. Thiab peb kuj txhawj xeeb txog cov kev tsim nyog thiab tsis tsim nyog siv tej nqe rau cov caij sib txawv li tus nqe dhau los thiab tus nqe tam sim no coj los ua ib cov tswv yim tias yog cov kev txo nqe rau tej khoom thiab.''
Thaum tus nqe muag ntawd tseem kim tib yam li tus nqe qub
Ib co piv txwv ntxiv thiab uas thaum tej supermarket los nqe tias ''yog tus nqe qub'' tab sis daim nqe muag hauv qab ntawm daim nqe tshiab ntawd yeej tseem yog tib tug nqe muag tam sim no.
"Tej neeg yuav khoom siv yeej kub siab heev txog cov ntawv lo qhia tias nqe pheej yig (special sticker), thiab yeej tau ua rau lawv ntseeg tias lawv tau tus nqe pheej yig dua, tab sis qhov tseeb tiag ces tseem yog tus nqe qub xwb.''
Tau muaj ib tug neeg uas koom cov kev teeb txheeb no tau piav tias cov kev pom ib yam khoom twg ntawm txee muag khoom raug lo daim ntawv txo nqe rau tab sis thaum ua tib zoo txheeb lawm tseem pom tias tseem yog tus nqe qub xwb.
Ces lawv tau hais tias ''Yam khoom ntawd 'tsis yog yam txo nqe kom pheej yig zog li'.''
Siv tej ntawv lo rau tej khoom tab sis tsis txo tej nqe
Tej zaum nej kuj tau pom qee cov tw ntawv los rau ib yam khoom twg tias yog txo nqe (special) tab sis qhov tseeb tiag yeej tsis txo nqe kom pheej yig li.
Raws li CHOICE hais ces tej xwm txheej no ces muaj qee zaus pheej sau ntawv lo rau tias ''tsuas txo tus nqe pheej yig txog rau thaum muag cov khoom ntawd tag lawm xwb (while stocks last)" — ua zoo li yog cov kev txo nqe pheej yig tab sis yeej tseem muag tus nqe qub ib txwm muag.
Lub koom haum no thiaj tau hais tias "Yog tias ib tug twg tsis ua tib zoo txheeb kom zoo tiag ces tej zaum yuav ua rau nws nkag siab yuam kev tias yam khoom muag ntawd tus nqe pheej yig.''Hos
Hos lwm lub tswv yim ces yog pheej sau rau tias yog cov khoom tshiab li "fresh special", "new" los yog tus nqe muag yam khoom tshiab "introductory price" — yog tej sob lus uas pheej dag tej customers xav tias ntshe lawv yuav tau tus nqe pheej yig.
Ib co piv txwv uas CHOICE piav txog lub khwv Woolworths Metro ntawm Sydney lub zos Marrickville rau hnub tim 4 lub 2 hlis ntuj xyoo 2024, ces thaum uas los cov ntawv rau tias nqe pheej yig "low price" rau ntau cov khoom noj khoom haus qhuav ntawd, yeej tsis qhia kom tseeb tias yog li cas tiag tus nqe thiaj pheej yig li.
Tej noob txiv uas muag ntawm lub khw Woolworths Metro Marrickville, Sydney, hnub tim 4 lub 2 hlis ntuj xyoo 2024, uas los ntawv rau uas tej zaum yuav ua rau tej neeg yuav khoom siv nkag siab yuam kev tias yam khoom ntawv pheej yig raws li CHOICE hais. Credit: CHOICE
Cov Loyalty programs uas tsis pub lwm tus neeg yuav khoom koom
Yog tias koj tsis teev zwm npe nrog rau cov program qhia tias koj yog ib tug neeg ua siab dawb siab ncaj uas yeej ib txwm yuav khoom ntawm lub khw ntawd (loyalty program) ces ntshe tej zaum koj yuav tsis muaj peev xwm yuav tau tej khoom pheej yig.
Vim yeej muaj ntau lub khw supermarkets tsuas txo nqe pheej yig rau tib co neeg uas mus koom cov program ntawd nkaus xwb. Ces thiaj ua rau tej neeg tsis ua tub koom siab tsis tau cov kev txo nqe pheej yig no.
CHOICE thiaj hais tias tsim nyog txhua leej txhua tus yuav muaj peev xwm yuav tau tej zaub mov thiab tej khoom siv tseem ceeb ua tus nqe pheej yig tshaj plaws.
Sherwood tau hais tias "Tej neeg dhuav cov kev pheej mloog tau tias raug dag rau cov kev txo nqe pheej yig tab sis tsis yog cov kev txo nqe pheej yig tiag no dhau heev lawm, thiab cov kev pheej raug tsub nias kom ua tub koom sib nrog tej program no thiab cov kev yuav ntau yam kom thiaj tau nqe pheej yig haj yam ua rau lawv yuav tej khoom ntau tshaj qhov tsim nyog lawv xav tau lawm. Tej tuam txhab supermarket loj tej cwj pwm zoo li no yog tej yam tsis tsim nyog hais tsi ntsees yog tej yam phem rau lub caij uas tseem muaj tej teeb meem nuj nqes siv ua lub neej ntau yam uas kim heev no."
CHOICE thiaj li tau muaj ntau cov lus tawm tswv yim rau tsoom fwv teb chaws hauv nws tsab ntawv cej luam txog cov kev mus txheeb txog tej nqe muag khoom ntawm tej khw supermarket.
Ib yam ntawm ntau yam ntawd, ces nws xav kom txwv tsis pub siv cov tswv yim dag lwm tus, yuav tau los txheeb tej nqe muag khoom raws li qhov tsim nyog muag xwb, thiab yuav tau los tswj tej nqe no, thiab yuav tsum yuam kom tej supermarket yuav tau qhia tej xov xwm keeb kwm teeb nqe muag khoom kom thiaj txheeb tau tias ho muaj kev pauv hloov rau tej nqe khoom li cas lawm.
Thiaj tau muaj ib tug kws ntawm lub tuam txhab Woolworths tau qhia rau SBS News hauv ib co ncauj lug tias: "Peb yeej kub siab heev los ua tib zoo xyuas kom peb ua raws li tag nrho Australia tej cai pov puag tej neeg yuav khoom siv thiab yeej qhia peb tej nqe meej tseeb thiab cov nqe raug ntawm peb tej ntawv catalogue, ntawm peb tej khw thiab hauv online tib si lawm''.
Lub tuam txhab Coles los kuj tau hais ib cov ncauj lug tias: "Peb yeej kub siab tiag tiag txog tej xov xwm teeb nqe no meej tseeb thiab raug tiag lawm thiab peb yeej ib txwm muaj lub hom phiaj yuav ua tib zoo xyuas kom peb cov kev txo nqe no tau txais txiaj ntsim tiag rau peb tej customers.''
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
