Mim Lis tau qhia tias nws twb tau paub Nyiaj Thoj Lauj tsev neeg txij xyoo 2012 los lawm, txij li nws tau mus ncig xyuas cov kwv tij Hmoob nyob ntawm teb chaws Nyab laj.
Tanya Prince sij mus saib lawv thiab tsis paub lus thiaj mus nrhiav kom neeg txhais lus rau nws thaum mus saib Nyiaj Thoj tsev neeg.
Ces nkawv thiaj sib koom tes pab tau 3 tug me nyuam hnoob nyoog tsis tau nto 18 xyoos tawm ntawm Thaib lub chaw kaw cov neeg txawv teb chaws lawm thiab.
Saib tau Nyiaj Thoj Lauj tsev neeg thiab Mim Lis nrog rau cov neeg Fabkis thiab Sakda Keobouadee uas tau pab nws tsev neeg kom tau mus pib dua lub neej tshiab ntawm teb chaws Fabkis rau hnub tim 22 lub 9 hli ntuj xyoo 2018 uas Ly Kou yog tus yees tau ntawm no: https://www.facebook.com/plugins/video.php?href=https%3A%2F%2Fwww.facebook.com%2FLiskub77%2Fvideos%2F1971072182949133%2F&show_text=0&width=560
Nyiaj Thoj tsev neeg yeej tau ntawv ntawm UN ua neeg tawg rog, tab sis tsuas yog tsis muaj cai ua tau hauj lwm xwb. Nyiaj Thoj txawm mus nrhiav hauj lwm ua, ces thiaj raug nom tswv Thaib muab txhom kaw tau 10 xyoo no lawm. Tab sis yeej tsis muaj txoj hauv kev yuav pab kom nws tawm tau los li.
2015 Mim Lis thiaj tau mus rau nyab laj teb mus txheeb xyuas Hmoob lub neej thiab los rau Thaib teb mus xyuas Nyiaj thiab nqa Nyiaj cov ntaub ntawv muab txhais ua lus Askiv ntawm teb chaws Canada thiab thov ib tug kws lij choj uas nws tus phooj ywg neeg American paub zoo kom pab xa Nyiaj cov ntaub ntawv rau UN kom UN pab nws tsam nom tswv Thaib muab nws xav rov qab ces yuav muaj teeb meem rau nws thiab nws tsev neeg. Kom Nyiaj Thoj Lauj thiaj tau ntaub ntawv nyob raug kev raug cai hauv Thaib teb.
Mloog tau Nyiaj Thoj Lauj cov lus tham txog nws txoj kev tau tsiv ntawm teb chaws Nyab Laj mus nyob rau teb chaws Fabkis thiab leej twg yog cov neeg tau pab nws thiab nws tsev neeg kom tau lub neej tshiab ntawm no: https://www.sbs.com.au/yourlanguage/services/embeds/audioplayer/f3392a6d-b586-421c-85bf-f3207d67c52a
Mim Lis hais tias "Yus Yog ib tug neeg Hmoob yus yeej muaj lub luag hauj lwm yuav tsum tau pab yus tsev neeg Hmoob. Hmoob yuav tsum xyaum ua neeg vam meej thiab tig los pab cov txom nyem kom txhob tshaib tshaib nqhis nqhis. Yus yog ib tug neeg Hmoob nyob teb chaws vam meej yuav tsum tau xyaum ua neeg vam meej. Yus vaj tse zoo nyob yus tau noj seem noj so noj txaus ntuav haus txaus qaug es yus twb cev tsis tau ib tes mov qhuav rau cov kwv tij Hmoob txhom nyem noj es puas tsim yog yus ua ib tug neeg Hmoob lawm?"
Ces txij ntawd los, nws rov taug Nyiaj cov teeb meem no rau xyoo 2016 dua thiab xyoo 2017 Nyiaj Thoj Lauj thiaj tau ntaub ntawv ua neeg thoj nam raug cai ntawm UN kom muaj cai nyob rau Thaib teb lawm.
Ces Mim Lis tus phooj ywg hu ua Manuela Thaler qhia ntawv Fabkis nyob Thaib teb thiaj tau mus saib cov neeg txawv teb chaws raug kaw ntawm Thaib lub chaw kaw cov neeg txawv teb chaws, ces nws thiaj tau tos ib tug neeg Congolese mus rau teb chaws Fabkis lawm. Nws txawm tau rov qab mus rau teb chaws Fabkis lawm thiab cog lus tias mam ua ib yam dab tsi rau Nyiaj Thoj Lauj.
Yog li Mim Lis tus phooj ywg Fabkis no thiaj tau mus ntsib nws tus phooj ywg uas yog tus thuj Fabkis ntawm teb chaws Thaib kom mus saib Nyiaj Thoj vim Nyia Thoj raug kaw los tau 10 xyoo no lawm. Ces tus nom Fabkis thiaj mus saib nws.
Ces ho muaj ib tug phooj ywg Fabkis ntxiv thiaj muab Mim Lis introduce rau Manuela Thaler uas nkawv tau los ua hauj lwm ua ke, thiab nws xav tias tej zaum nom tswv Fabkis kuj yuav kam tos Nyiaj tsev mus nyob teb chaws Fabkis.
Nyiaj Thoj Lauj tsev neeg mus txog ntawm teb chaws Fabkis lub tshav dav hlau-Mim Lis (Mos Hav) Source: Mim Lis (Mos Hav)
Nyeem tau tus txiv neej Thaib hu ua Sakda Keoboudee cov lus nrog Thaib phau ntawv xov xwm A Day magazine sib tham txog nws cov kev pab Nyiaj Thoj Lauj tsev neeg thiab cov neeg txawv teb chaws uas khiav mus rau Thaib teb tias yog vim li cas nws thiaj pab tej neeg no uas sau ua ntawv Thaib tau ntawm no: https://www.facebook.com/plugins/post.php?href=https%3A%2F%2Fwww.facebook.com%2Fsakda.kaewbuadee%2Fposts%2F10155634097850264&width=500
Ces Mim lis thiaj mus nrhiav tau ib tsev neeg Hmong Fabkis siab zoo ntawm teb chaws Fabkis ua tus tos (Sponsor) tsev Nyiaj Thoj Lauj tsev neeg mus rau teb chaws Fabkis lawm. Hos nom tswv Fabkis ces tsuas pab fab ntaub ntawv xwb. Thiab Mim Lis qhia tias yeej muaj nws lub community Hmoob pab nws, vim cov Hmoob nyob teb chaws Fabkis los yeej nto moo, yog lawv paub ces lawv yeej pab xwb.
Ces Mim Lis thiaj lees ua tus mus tos Nyiaj Thoj Lauj tsev neeg thaum mus txog tshiab rau ntawm teb chaws Fabkis.
Mim Lis thiaj mam li nrhiav thiab thov nyiaj pab thiab tau sau ntawv rau tus thuj Fabkis, tab sis tus thuj hais tias yuav tsum muaj neeg tos nws thiab xav tau ib cov ntawv pov thawj tias paub Nyiaj Thoj yog tus neeg zoo li cas mas thiaj tos tau nws. Mim Lis yeej nrhiav tau ib tug neeg ua teb uas muaj teb ua, thiab tau ua ntaub ntawv tias yog Nyiaj Thoj mus txog teb chaws Fabkis yuav tau hauj lwm ua xa rau nom tswv Fabkis lawm thiab.
Mim Lis hais tias peb txhob cia peb cov Hmoob txom txom nyem thiab yuav tsum pab peb tsev neeg Hmoob. Yog yus Hmoob yus thiaj mob siab txog yus haiv neeg, thiab thaum luag pej kum haiv pom tias yus yeej hlub thiab pab yus haiv neeg tiag, luag thiaj xav pab yus haiv neeg.
Mim Lis qhia tias yog tsev neeg Hmoob yeej muaj kev sib pab sib txhawb heev vim yeej tau muaj ntau tus thoob ntuj no tsis hais ntawm ntau lub teb chaws li America, Canada, Fabkis, Austrlaia thiab New Zealand los yog hauv Thaib teb yeej tau pab nyiaj thiaj pab tau Nyiaj tsev neeg mus rau Fabkis lawm.
Ces lawv tsuas muaj muaj sij hawm 30 hnub txog lub 1 hlis ntuj xa ntaub ntawv rau nom tswv Fabkis xwb. Mim Lis thiaj li tau mus thov kev pab cuam ntawm Hmoob tej koom haum thiab cov koom haum ntau lub, los thaum kawg tsis tau kev pab cuam dab tsi. Vim Hmoob ntshai tsam cov kwv tij Hmoob uas Mim yuav tos ntawd yog cov neeg txhaum cai, yog cov neeg ua yaj yeeb txhaum cai, thiab yog neeg phem, ces lawv thiaj tsis kam pab.
Ces nws thiaj tau hais kom cov neeg Hmoob uas tau tawm mus nyob teb chaws Canada 3 leeg ntawd kom sau ntawv ua pov thawj qhia tias Nyiaj Thoj yog neeg zoo li cas xa rau Mim Lis, thiab kuj muaj 2 yim Hmoob Nyab laj uas tau mus nyob rau teb chaws New Zealand kuj tau sau ntawv qhia tias seb Nyiaj Thoj yog tus neeg zoo li cas xa rau n Mim Lis ntxiv thiab.
Mim Lis xav tias tej zaum cov kev tos tau Nyiaj Thoj Lauj tsev neeg mus nyob teb chaws Fabkis no yuav tsis ua teeb meem dab tsi rau cov tseem nyob ntawm Thaib teb, los yog yuav tsis ua rau muaj neeg xav khiav tuaj rau Thaib teb li cas ntxiv, vim sawv daws yeej paub zoo tias khiav tuaj yooj yim tab sis cov kev yuav tau mus txawv teb chaws mas tsawg.
Mim Lis qhia tias tos nom tswv Fabkis ho tso cai rau nws tos tau Nyiaj Thoj tsev neeg no los lawv tsuas pab tam li yog kev phooj ywg xwb. Teb chaws Fabkis yeej tsis muaj program tos neeg. Tos lawv kawm tos Nyiaj Thoj tsev neeg los yeeb vim lawv yeej paub tias Hmoob yog ib tsav neeg uas tog liab yeej ib txwm tsis nyiam thiab Hmoob yeej ib txwm tau koom tes ua hauj lwm nrog Fabkis thiab America yav dhau los lawm, ces lawv thiaj pab Nyiaj Thoj tsev neeg xwb.
Raws li tus txiv neej Thaib hu ua Tong thiab Mim Lis tau qhia, ces Nyiaj Thoj Lauj yeej yog ib tug neeg ntseeg tswv ntuj Yesxus thiab raug nom tswv muab nws txhom kaw muab nws ntaus tsis nco qab ntau zaus ces nws thiaj nyiag kev khiav tuaj nyob Nplog teb thiab nom tswv Cob tsib tseem raws qab tuaj nrhiav nws, ces nws thiaj ua ib siab khiav tuaj rau Thaib teb lawm.
Nyiaj Thoj Lauj thiab nws tsev neeg twb tau mus txog rau teb chaws Fabkis rau hnub tim 22.09.2018 dhau los lawm. Tus txiv neej Thaib hu ua Tong yog tus nrog nraim nws tsev neeg thiab ua tus coj nws tsev neeg mus txog ntua teb chaws Fabkis lawm ces Mim Lis mam li ua tus tuaj tos nws tom Fabkis lub tshav dav hlau xwb.
Tong, Nyiaj Thoj Lauj tsev neeg thiab Mim Lis yees duab ntawm tus pej thuam muaj yeej (Arch de Triomphe) ntawm tuam ceeb Paris, Fabkis - Mim Lis (Mos Hav) Source: Mim Lis (Mos Hav)
Nyiaj tau mus so ntawm Mim Lis tsev ib ntus xwb ces nws yuav tau mus nyob rau tej tsev uas nom tswv npaj rau lawv nyob txuas ntxiv lawm xwb. Thauam Nyiaj Thoj Lauj mus txog teb chaws Fabkis lawm ces nom tswv Fabkis yeej ua ib daim ntawv neeg tawg rog (Card de Refugee) raws li UNHCR tsab cai neeg tawg rog uas Fabkis tau kos xyeem mem tes siv ntawd rau Nyiaj Thoj tsev neeg siv lawm, thiab thaum txog 3 xyoos ces nom tswv mam ua ib daim ntawv tshiab rau nws tsev neeg siv dua ces txij ntawm xyoo 4 mus txog rau 10 xyoo ntawd Nyiaj Thoj Lauaj tsev neeg yeej muaj cai thov ua tau pej xeem ntawm teb chaws Fabkis lawm.
Tau muaj ntau cov kwv tij Hmoob kuj tau mus xyuas cov kev tij Hmoob raug txim kaw ntawm Thaib teb uas txom nyem, muaj mob tsis muaj mov noj, thiab tsis muaj tus pab no, ces Mim lis thiaj tau thov cov kws kho mob kom mus pab tswj kev noj qab haus huv rau lawv, thiab muaj ib co neeg txawv teb chaws tau nqa khoom noj rau lawv tau noj thiab nrhiav chaw rau lawv nyob. Tsuas yog cov neeg Hmoob uas khiav tuaj nyob Bangkok no tsis muaj cai ua hauj lwm xwb. Yog thaum cov neeg no tau UN cov ntaub ntawv lawm, ces lawv yog UN neeg lawm, cov kev pab no ces tus twg pab los tsis txhaum cai dab tsi lawm tsuav lawv tsis txhob mus nrhiav hauj lwm ua xwb.
Mim Lis uas yog ib tug poj niam Hmoob uas pab khiav thiab lis ntaub ntawv thiab thov nyiaj pab Nyiaj Thoj Lauj tsev neeg kuj tau thov ib tug hluas Hmoob ua hauj lwm hauv thuj Fabkis, tab sis nws tsis kam pab vim nws xav tias cov Hmoob ntawd yog ib co Hmoob txhaum cai, thiab kuj tau muaj ib tug xib fwb nto moo ntawm Chiangmai los yeej tsis kam pab thiab yeej tau hais kiag rau Mim Lis tias cov Hmoob ntawd yog ib cov neeg txhaum cai, ua luam yaj yeeb txhaum cai, ua plees ua yig ces thiaj tsis kam pab.
Mim Lis kuj tau qhia tias nws kuj tau thov ib tug Hmoob ua hauj lwm hauv tuj America kom nws muab lub koom haum Hmoob Thaib rau nws kom sib txuas lus tau nrog lub koom haum no tab sis nws tsis kam, ces thiaj ua rau Mim tu siab heev thiab yog xav txog thaum twg ces kua muag poob, vim Hmoob twb tsis pab Hmoob tab sis thaum muaj tsunami los tsim teeb meem rau ntau lub teb chaws Southeast Asia thiab raug teeb meem rau Thaib qab teb ntawd Hmoob yeej thauj nplej thauj txhuv ntsuag qees mus pab tab sis ho tsis kam pab cov kwv tij Hmoob txom nyem khiav tuaj rau Bangkok no. Vim kev pab tus mab tus sua yus yeej tsis paub tias luag zoo los phem. Txawm zoo thiab phem los yus yog ib haiv neeg Hmoob ces yeej tsim nyog pab raws li qhov tsim nyog raws li Mim tau hais.
Mim Lis thiaj hais tias tshuav nws tib leeg lawm xwb ces nws thiaj tau koom nrog lwm tus neeg thov nyiaj coj los tso thiab pab 3 tug me nyuam tsis tau nto 18 xyoo tawm ntawm Thaib lub chaw kaw cov neeg txawv teb chaws khiav tuaj rau Thaib teb yam tsis muaj ntaub ntawv raug cai ntawd.
Tom qab nws thov tau nyiaj lawm ces nws thiaj tau muab ib cov nyiaj coj los pab 3 tug me nyuam no, cov seem ces muaj coj los tsim ib cov project rau Hmoob cov poj niam xaws paj ntaub xa muag txawv teb chaws kom tau nyiaj los pab rau cov kwv tij Hmoob ntawm Thaib teb kom txhob txhom txhom nyem.
Nyiaj Thoj Lauj tsev neeg yees duab ntawm Effiel Tower hauv tuam ceeb Paris, tebchaws Fabkis-Mim Lis (Mos Hav) Source: Mim Lis (Mos Hav)
Tus txiv neej Thaib hu ua Tong no kuj tau ua cov hauj lwm pab cov neeg txawv teb chaws no, thiab tub ceev xwm Thaib twb tau ceeb toom rau nws ntau zaus kom nws txhob pab cov neeg txawv teb chaws no ntxiv lawm. Yog nws tseem ua ntxiv ces lawv yuav txhom nws. Tong qhia tias kuj tau muaj cov neeg tsis hais neeg Hmoob thiab neeg Thaib uas yeej tau pab txhawb nqa nws thiab cov cem thuam tsis pom zoo nrog nws los muaj tias ua li cas ho tsi pab cov neeg Thaib txom nyem es pheej mus pab cov neeg txawv teb chaws tuaj tsis raug cai raug kaw nyob Thaib teb ntawd.
Mim lis qhia tias cov kev yuav tos tau thiab pab tau ib tug Hmoob mus nyob txawv teb chaws no mas yuav tsum yog tus neeg nyob txawv teb chaws uas yog tus yuav tos ntawd yuav tsum yog cov neeg tij lij thiab kub siab pab tiagtiag mas thiaj pab tau raws li nws tau lis tej dej num pab cuam dhau los uas nws paub ntawd.
Tsis tas li no los tseem muaj ib lub koom haum ntseeg hu ua Catholic Caricative uas yeej tos cov neeg raug teeb meem ntawm Southeast Asia mus nyob rau America coob kawg lawm thiab. Nws mam li xyuas seb puas yuav thov tau kev pab cuam li cas ntxiv coj los pab rau cov neeg Hmoob uas tseem khuam daig hauv Thaib teb ntawd.
Mim Lis tau qhia tias tsis xav kom cov neeg ntseeg qw rau ub rau rau no rau ntiaj tog qaum pes tias yus yog ib tug neeg ntseeg. Xav kom yus ntseeg twj ywm rau yus nruab siab xwb. Vim phau vaj lub kub yeej tau teev tseg tias, kev ntseeg yog kev hlub, kev nyiam, kev thaj yeeb thiab kev zam txim rau lwm tus xwb.
Mim Lis yeej tau nrog ib tug txiv plig nyob Sapa ntawm Nyab laj qaum teb tham thiab nws yeej tau qhia rau Mim Lis tias nom tswv Nyab laj yeej tsis tso cai rau tej pej xeem sib koom ua tsheej pab, tsuas yog muaj ib tug txiv plig tuaj mus ua koom txoos xwb mas tej neeg thiaj mus koom tau xwb yog cov neeg ntseeg ntawd nyob toj siab, tsis zoo li hauv nroog uas yus yog tus neeg ntseeg lawm es yuav cia li mus koom teev Yesxus thaum twg los tau.
Tos Mis Lis ho tsis xav teeb tsa koom haum pab los vim muaj txheej txheem ntau yam ua ntev ua ntau tsis sib haum ces nws thiaj tsis xav tsa. Tab sis yog nws tsa ces nws xav coj los pab cov neeg txom nyem xwb. Tab sis muaj Hmoo uas txhua tus nws thov yeej pab nws. Thiab yog tias teeb tsa ib lub koom haum los ua moj zeej cuav xwb sis ua hauj lwm dab tsi ces kuj tsis muaj txiaj ntsim dab tsi thiab raws li Mim lis tau hais.#
