Nyob rau lub plua Dental Health Week tim 7-12 lub 8 hli ntuj xyoo 2018 no kub koom haum thiab cov kws rho hnyiav tau ceeb toom kom tej neeg sawv daws kub sib los tu lawv tej kaus hniav thiab qhov ncauj thiab ho mus ntsib mus cuag kws rho hniav thiab kub siab los tu lawv tej kaus hniav thiab qhov ncauj.
Tau muaj Eithne Irving uas yog tus lwm coj ntawm lub koom Australian Dentists Association thiaj tau qhia tias nom tswv tsis kub siab los xyuas cov cai private health insurance rebate kom tej neeg rho hniav mus thov tau tej nyiaj lawv siv rho hniav los yog ua hniav cuav coj rov qab los siv. Vim ua ib thom hniav xwb twb raug nyiaj txog li $5,000 lawm.
Yog li ntawd Eithne Irving thiaj tau hais tias ntshe tej neeg sawv daws coj tej nyiaj yuav cov nyiaj tuav pov hwm tswj kev noj qab haus huv ntiag tug (Private health insurance) coj mus khawv cia tom tej tuam txhab nyiaj ntshe yuav zoo dua. Tab sis Rachel David uas yog tus coj lub koom haum Private Healthcare Australia tau qhia tias lawv tej tuam txhab muag cov private health insurance yeej tau siv nyiaj ntau tshaj tej nyiaj uas nom tswv xeev thiab nom tswv Australia siv (2.6 billion dollars) coj los pab kom cov neeg yuav cov private health insurance tau txais txiaj ntsim ntau yam cuam tshuam txog lawv tej kaus hniav lawm, hais tsi ntsees rau cov neeg khwv tau nyiaj tsawg thiab khwv tau nyiaj nrab txog 90% ntawd yog cov tau txais tej txiaj ntsim no.
Txawm li cas los tej neeg tseem ntshai tsis kam mus ntsib mus cuag cov kws rho hniav thiab. Muaj 2 yam laj thawj ua rau lawv ntshai xws li ib, yog lawv ntshai zaum lub rooj zaum ua thaum kws rho hniav yuav los txheeb xyuas thiab rho lawv tej kaus hniav, ob tuaj yog tej nqe rho hniav thiab ua hniav ntawd kim dhau heev lawm ces lawv thiaj tsis xav mus ntsib kws rho hniav.
Martin Dunn uas yog ib tug neeg paub ua cov kaus hnyiav cuav hais tias tos ho muaj cov teeb meem kab noj hniav thiab hniav lwj los yog yuav tau rho tej hniav pov tseg los twb vim yog tej neeg tsis kub sib los tu thiab txhuam lawv tej kaus hnyiav. Thiab Irving tau qhia tias tsim nyog peb yuav tau kub siab tu kom peb tej kaus hniav kav tag peb ib sim neej tsuas yog tias ntshe tsis rho es yuav muaj teeb meem rau peb txoj kev noj qab haus huv xwb mas mam li yuav tau muab rho pov tseg xwb.
Yog li nyob rau lub plua Dental Health Week no, cov kws rho hniav thiab tej koom haum tswj cov kws rho hniav thiaj tau nqua hu kom zej tsoom sawv daws yuav tsum kub siab los txhuam hniav ib hnub 2 zaug, thaum sawv ntxov sawv los thiab noj tshais tas, thiab thaum tsaus ntuj noj hmo tas yuav pw ntawd, thiab tseem xav kom sawv daws yuav tau siv cov xov kaus coj los dig tej zaug tej nqaij mov ua daig rau hauv peb tej kaus hniav tawm tom qab txhuam hniav ib zaug rau ib hnub twg thiab.
Koj muaj peev xwm noj tau ntau yam thiab ua tau ntau yam coj los pab rau koj lub cev kom kaus hniav ruaj thiab khov txhob muaj kab noj xws li noj tej zaub mov tshiab tshiab, txhob noj tej zaub mov muab ziab khub los sis nplaum nplaum hniav, txhob haus dej qab zib (softdrinks), txhob rau piam thaj ntau rau tej dej tshuaj yej thiab kasfes (coffee) thaum yus haus, txhob noj kob thaj (Confectionery) ntau los sis txhob noj khoom noj txom ncauj qab zib (confectionery) ntau, nquag txhuam hniav yam tsawg ib hnub 2 zaug thiab noj tej zaub mov muaj calcium li haus mis nyuj, noj yogurt thiab noj mis khov (cheese) vim tej hais no muaj cov calcium, casein thiab phosphorus pab kom yus cov kaus hnyiav ruaj khov.
Raws li lub koom haum tau qhia muaj 7 hom zaub mov zoo yuav pab kom peb tej kaus hnyiav ruaj xws li, yogurt, mis khov (cheese), zaub ntsuab ntau hom, txiv apples, zaub lauj pwm (carrots), thiab cov zaub celery nrog rau cov noob txiv almond.
Yeej tau muaj pov thawj tim khawv ntawm cov koom haum National Health and Medical Research Council thiab World Health Organisation qhia tias kev muab cov tshuaj fluoride xyaw rau tej dej siv uas Australia twb tau tso xyaw txij xyoo 1960s-70s ntawd yeej pab kom zej tsoom tej kaus hnyiav ruaj khov.
Tab sis raws li New Zealand cov Health Services uas tau mus teeb txheeb txog lub teb chaws no cov me nyuam tej kaus hniav ces lawv hais tias cov me nyuam tsis siv cov fluoride no cov kaus hniav ib nyuag zoo me ntsi cov siv. Thiab xyoo 1995 uas Dr. Phyllis Mullenix yog ib tug neurotoxicologist thiab yog tus coj dhau los ntawm lub che teeb txheeb txog cov taug tshuaj (Toxicology) ntawm Forsyth Dental Center ntawm Boston tau qhia nws cov kev teeb txheeb ces nws hais tias yeej tau ua rau cov tsiaj lawv teeb txheeb ntawd tej paj hlwb thiab tej cuj pwm, thiab tau muaj 2 cov kev teeb txheeb txog tej neeg cov kab mob kuj tau qhia tias tej zaum ua rau cov me nyuam tau cov fluoride no hlwb tsis zoo los sis qauj me ntsis lawm.
Txawm li cas los America lub koom haum American Cancer Association yeej tau qhia lawm tias tsis muaj tseeb li tej neeg xav thiab hais ntawd yog tias ua tib zoo siv thiab siv raws li qhov tsim nyog xwb.
Ntxiv ntawd los kuj tau muaj ntiaj teb no ntau yam khoom siv tsis hais tshuaj txhuam hniav, ntsev noj, mis nyuj thiab dej haus los yeej muaj cov tshuaj fluoride xyaw rau kom tej neeg sawv daws cov kaus hniav thiaj ruaj thiab uas Dr Michael Foley ntawm lub koom haum Australian Dentist Association los yeej tau hais tias "UN thiab tej koom haum tswv kev noj qab haus huv hauv teb chaws Australia feem ntau pom tau tias kev muab cov fluoride tov xyaw rau tej dej siv yog tej yam zoo."
Raws li lub koom haum Australian Dental Association (ADA) tau qhia, lub 2 hlis ntuj xyoo 2018 no lub koom haum ADA tus coj uas yog Dr Hugo Sachs twb tau nrog Australia tus pwm tsav tswj kev noj qab haus huv Greg Hunt rov qab los sab laj thiab pom zoo yuav pab cov nyiaj rho me nyuam kaus hniav (Child Dental Benefits Schedule -CDBS) $1,000 li qub tom qab ntau tus nom tsis pom zoo kom tsoom hwv Australia muab tej nyiaj no txiav.
Kuj muaj xov xwm zoo cuam tshuam txog tej tuam txhab lagluam tsim dej qab zib yuav txo tsis siv cov piam thaj txog 20% rau tej dej qab zib rau xyoo 2025 ntxiv lawm thiab thom qab uas lub koom haum ADA nrog rau ntau cov koom haum tswj kev noj qab haus huv tau mus tawm tsam kom tej tuam txhab no txhob xyaw piam thaj rau tej dej qab zib no ntxiv. Kuj tau muaj ib txhia nom tau pom zoo tias tej dej qab zib (softdrink) no tsis yog muaj teeb meem rau tej neeg kaus hniav xwb tab sis tseem ua rau tej neeg lub cev muaj ceeb thawj thiab cev rog uas yuav muaj lwm yam teeb meem cuam tshuam txog txoj kev noj qab nyob zoo thiab noj qab haus huv ntxiv thiab.
Tsis ntev los no thaum txog ntiaj teb hnub mob cancer rau tob hau thiab caj dab (World Head and Neck Cancer Day 27 July 2018), dhau los lub koom haum Australian Dental Health Foundation kuj tau nqua hu kom tej neeg yeem thaj mus txheeb xyuas seb lawv puas mob cancer rau lawv tej qhov ncauj nrog cov khw muag tshuaj Amcal Pharmacies thoob plaws xeev Victoria no thiab.#
rau hnub zwj Teeb (Thursday) 6 pm AEDT thiab hnub zwj Hnub (Sunday) 11 am AEDT los yog koom tau ntxiv ntawm ,, thiab
los yog download thiab kom koj thiaj mloog tau xov tooj cua SBS Radio Hmong progam.
