Tam sim no ntiaj teb muaj neeg thoj nam tawg tsov tawg rog tsis hais hauv lawv lub teb chaws lawv nyob los yog tau khiav mus nyob rau lwm lub teb chaws ntau txog li 65 roob (Million) tus thoob lawj kob xwb (Thoob ntuj) no lawm.
Tau lub sij hawm 70 lub xyoo dhau los no Australia tau tos cov neeg thoj nam tawg tsov tawg rog zej txog li ntawm 1 roob tus (880,000) tuaj ua neej tshiab nyob rau teb chaws Australia no lawm. Thiab xyoo tshiab yuav los no, Australia tseem yuav tos cov neeg no tuaj ntxiv li ntawm 18,000 tus thiab.
Cov laj thawj tseem ceeb yog vim kev tsov rog sib ntaus sib tua thiab muaj kev sib tawm tsam rau fab laj fai kum xeeb ces thiaj ua rau ib txhia neeg yuav tau tsiv teb tsaws chaws mua ua neeg thoj nam rau lwm lub tebchaws vim lawv ntshai tsam muaj teeb meem phom sij cuam tshuam rau lawv thiab lawv tsev neeg txoj sia thiab tsis tau txais kev nyab xeeb.
Yeej tau muaj ib txhia neeg uas tau tawg tsov tawg rog tau mus ua neej noj qab pw sov ntawm cov tebchaws vam meej lawm los lawv tseem muaj pluaj siab hlub tshua thiab xav rov qab mus pab nrhiav hauj lwm rau lawv tej neeg ntawm lawv qub teb qub chaw kom tau dej num ua kom dim ntawm txoj kev txom nyem.
Piv txwv li Mahir Momand uas yog ib tug neeg Afghnistan uas yog neeg thoj nam tawg tsov tawg rog tau mus nyob teb chaws Canada los yog ib tug tau rov qab mus qhia nws tej neeg cog paj Safron hloov cov kev cog yajyeeb kom cov neeg Taliban txhob tau nyiaj, uas yog ib cov kev cov nyom thiaj ua rau cov neeg Taliban tsim teeb meem rau nws tej neeg ua hauj lwm ua ke thiab tsim teeb meem rau nws. Ces thiaj yuav tau rov qab ua neeg thoj nam tuaj nyob teb chaws Australia dua ib zaug ntxiv.
Tab sis vim nws muaj cov txuj microfinance, ces thiaj tau teeb tsa lub koom haum Thrive Refugee Enterprise los pab qhia cov neeg thoj nam tuaj ua lub neej tshiab hauv teb chaws Australia no kom pib ua tau lawv cov lagluam me tshiab kom mus taus li lawv siab xav.
"Momand tau qhia tias ib txhia neeg thoj nam tuaj thov kev pab cuam ntawm nws lub koom haum yeej tau qhia tias lawv yog cov neeg xav nrhiav hauj lwm ua coj los pab kom lawv ua tau lub neej tshiab kom muaj noj muaj haus thiab lawv tsis yog cov neeg yuav zaum tes dawb tes npliag nyob dawb tos thiab mus thov tsoom fwv Australia tej nyiaj welfare ntawm Centrelink siv nkaus xwb."
Australia lub koom haum Australian Bureau of Statistic los kuj tau qhia tias cov neeg thoj nam tawg tsov tawg rog yog cov neeg nyiam tsim thiab tswj cov lagluam me ntau dua yog piv rau cov neeg tsiv teb tsaws chaw (migrants) thiab cov neeg Australia ua yug hauv teb chaws Australia no.
Gail Kerr yog tus coj lub koom haum Access Community Serivces yog ib lub koom haum pab cuam rau cov neeg thoj nam tawg tsov tawg rog tuaj ua neej tshiab hauv teb chaws Australia no kom muaj peev xwm ua tau lub neej li teb li chaw.
Lub koom haum no kuj tau teeb tsa ib lub tuam txhab Harmony on Carmody Cafe coj los ua lagluam thiab siv tam li yog ib qhov chaw pab rau tej neeg thoj nam kom tau ua hauj lwm hauv tej Cafe kom paub ua kas fes rau tej neeg haus, kom paub lus Askiv, kom paub customer services, thiab kom khwv tau nyiaj los yog thaum lawv tawm mus rau lwm qhov kom rhiav tau hauj lwm ntawm tej chaw muag kasfes ua tiag tiag.
Pemba Tshulembo nrog rau nws 3 tug nus muag los kuj muaj hmoo tau tuaj pib neej tshiab hauv teb chaws Australia no vim nws txiv raug tej neeg ntawm lwm pawg fai kum xeeb sib cov nyom tsim teeb meem phom sij, thiab thaum ua nws txiv lub cawv xeeb los tseem muaj neeg tuaj sib ntaus thiab nws yeej tsis muaj peev xwm yuav tawm ua si sab nraum zoov tsam lwm tus nyiag txhom los yog ua phem li cas rau nws tej nkauj muam nraug nus li. Thiab ntshais tsam tsis tau txais kev nyab xeeb rau nws thiab nws tsev neeg tom qab nws tiam tau nruam sim rau cov kev ua tsheb sib nraus lawm. Ces nws thiaj tau txiav txim siab ua ib siab khiav tawm ntawm tebchaws Congo mus nyob ua neeg tawg rog ntawm Kenya thiab tau tuaj pib neej tshiab ntawm teb chaws Australia.
Nws qhia tias kev tau ua hauj lwm nrog lub tuam txhab Harmony on Carmony Cafe ua hauj lwm kom txuag tau nyiaj thiab xav mus kawm tsev kawm qib siab txuas ntxiv tom qab nws kawm tiav High School lawm.
Pemba Tsulembo hais tias "Xav kom lub lim tiam Refugee Week no yog lub cib feem tseem ceeb coj los qhia rau tej neeg thoj nam tawg tsov tawg rog paub tias lub teb chaws uas lawv tuaj nyob ua neej tshiab no yeej zoo siab tos txais thiab yeej yuav nrhiav kev pab cuam pub rau lawv kom muaj peev xwm ua tau lub neej ntawm lub teb chaws ntawd. Vim lawv yog cov neeg uas yeej raug teeb meem tag lawv ib sim neej, muaj ib txhia raug mob rau cev nqaij daim tawv thiab ib txhia tau ntshai ua caws pliav rau lawv nruab siab thiab sab ntsuj plig lawm. Yog li ntawd yog tias muaj ib tug twg tseem pom txog los yog qhia rau lawv paub tias txawm lawv yog neeg thoj nam tawg tsov tawg rog los tsis ua li cas lawv yeej tseem muaj peev xwm ua tau ib yam dab tsi tsim nuj rau lawv lub neej thiab rau lub tebchaws lawv nyob thiab ces yuav yog ib qhov tseem ceeb tshaj plaws rau lawv thiab."
Paul Power uas yog tus coj ntawm lub koom haum Refugee Action Council los kuj qhia tias nws lub koom haum xav siv lub tsam thawj Refugee Week txij tim 17-23 lub 6 hli ntuj no los ua ib cov kev qhia rau sawv daws kom pab cuam tej neeg thoj nam txom nyem uas xav tau txais kev pab cuam thiab los nrog lees paub nco txog tej txiaj ntsim uas lawv tau tuaj pab txhim teb kho caw thiab pab kom Australia tej lagluam zoo tuaj.
Paul Power hais tias vim cov neeg thoj nam feem coob tseem hluas thiab hnoob nyoog qes dua 25 xyoo, yog li lawv tseem tshuav sij hawm ntau caum xyoo los pab txhim kho lub teb chaws Australia thiab yuav yog ib cov peev txheej neeg tseem ceeb rau Australisa tej economy.#
Mloog tau xov tooj cua SBS Radio Hmong Program cov xov xwm ntau yam ua lus Hmoob thiab lus Askiv (English) tau ntawm rau hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT.
Koj tseem muaj peev xwm download tau SBS Radio App ntawm App Store thiab tau ntawm Google Play los sis koj muaj peev xwm download tau cov xov xwm kaw ua suab ua ib zaj ib zaj ua lus Hmoob thiab lus Askiv tau ntawm .
Ntxiv ntawd koj muaj peev xwm koom tau peb ntawm SBSHmong lub Facebook page, tuaj nyem nyiam (Click Like), koom tawm tswv yim (Comments) los yog faib xov xwm (Share) rau koj tej phooj ywg mloog tau ntawm .
Thiab yog koj muaj xov xwm tseem ceeb xav xa rau xov tooj cua SBS Radio Hmong Program los yog xav tham ces hu rau tus zauv xov tooj + 61 3 9949 2259 los sis xav kom cov lus tawm tswv yim tuaj tau rau tus email .
