हिजो सोमवार, २७ मेको दिउँसो ती दुई नेपाली युवकहरू घटनाको समयमा 'रक फिशिङ' अर्थात् चट्टानमा बसेर समुद्रमा माछा मारिरहेको र उनीहरू लाइफ ज्याकेट बिना रहेको बताइएको छ।
उनीहरूको उमेर २५ र २२ वर्ष रहेको न्यु साउथ वेल्स प्रहरीले जनाएको छ।
करिब २:४५ बजे सर्फ लाइफ सेभिङ न्यु साउथ वेल्सको स्टेट अपरेसन सेन्टरले माछा मारिरहेका दुई जना व्यक्तिहरू चट्टानबाट पानीमा खसेको खबर पाएको र घटनास्थलमा लाइफसेभर रेस्क्यु हेलिकप्टर पुग्दा एक जना व्यक्ति पानीमा डुबेको अवस्थामा भेटिएको बताइएको छ।
An image of Cape Solander, Sydney. Source: Moment RF / Peter Pesta Photography/Getty Images
त्यसको लगत्तै सदरल्यान्ड शायरका लाइफगार्डहरू पनि पानीमा उद्धारका लागि उत्रिए पछि दुईजनालाई निकालेर सीपीआर दिइएको प्रहरीको भनाई छ।
र, केही समयपछि दुवैजनालाई घटनास्थलमा मृत घोषित गरिएको बताइएको छ।
सर्फ लाइफ सेभिङ न्यु साउथ वेल्सका अधिकारीहरू, न्यु साउथ वेल्स एम्बुलेन्सका प्यारामेडिकहरू र मरिन रेस्क्यु पनि घटनास्थल पुगेका थिए।
थप पढ्नुहोस्
समुद्र तटको आनन्द लिनुहोस् - तर सुरक्षित भएर
परिवारलाई आवश्यकता अनुसार मद्दत गरिने वाचा
घटनाको बारेमा कुरा गर्दै गैर आवासीय नेपाली सङ्घ अस्ट्रेलिया (एनआरएन)का अध्यक्ष अनिल पोख्रेलले एसबीएस नेपालीलाई मृतकका परिवारलाई आवश्यकता अनुसार मद्दत गर्ने बताएका छन्।
"भोलिको दिनमा शव नेपाल पुर्याउने विषयका प्रशासकीय कुराहरू के कसरी अगाडी बढ्ने भन्ने सवालमा परिवारको आवश्यकतालाई मध्यनजर गर्दै मद्दत गर्ने छौँ," उनले बताए।
"हामी नेपालबाट आएका मानिसहरू समुद्रसँग त्यति अभ्यस्त पनि छैनौँ, हामी अझ बढी सावधान हुन जरुरी छ।"
