Venola Lini hemi kamaot long aelan blong Pentecost, hemi kamaot long wan famili we I gat olgeta seven evriwan, mo hemi kroap nao long Luganville, Espiritu Santo.
Taem hemi wan smol gel taem hemi stap kroap long Luganville, hemi drim blong hem se wan dei bae hemi mas wok insaet long wan turis bot.
“Long haos blong mifala, I gat wan smol cave we I stap antap long wan smol hill, so taem turis bot I kam insaet long harbor, bae mi always run I go antap mo stanap mo lukluk turis bot, mo mi drim blong wan dei bae mi mas travel mo wok insaet long turis bot.”
So hemi attendem skul kasem wantaem long year 12, long level blong skul blong hemia, hemi mekem wan disisen blong nomo kontinu wetem skul blong hem.
Mi drim blong wan dei bae mi mas travel mo wok insaet long turis bot.”Venola Lini
Venola Lini hemi holem plante role since hemi stat wok long P&O long 2013 i kam kasem tede
Venola hemi manej blong faenem wok mo hemi wok blong samtaem, be hemi never forgetem drim mo goal we hemi blong wok wan dei insaet long turis bot. Wetem strong tinktink ia hemi aplae I go long Aquana Beach Resort, even tho hemi nogat eksperiens long hospitality.
“Mi nogat wan eksperiens blong wok long hospitality indastri, beh wetem drim blong mi nomo mo goal blong mi mo wanem we mi stap wantem blong akjivim. Taem oli tekem mi go insaet, mi bin strakel smol from mi nogat eksperiens, long Aquana Beach Resort mi bin wok olsem wan waitress blong 1 yia 2 manis.”
Taem hemi stap wok long Aquana Resort, hemi luk wan vekensi notis we South Sea Services oli putum aot blong lukaotem ol wokman blong go wok long turis bot. Taem Venola hemi luk notis ia, hemi filim save long hem wan se drim mo goal blong hemi abaot blong kam wan reality.
“Taem ia oli stap lukaotem ol apliken we oli 21 yia I go antap, be taem ia mi 20 yia old mo long fiu deis taem bae mi turn 21, so oli akseptem mi blong mi save aplae. So mi putum aplikesen blong mi taem mi kasem haos, oli ringim mi se mi wan long ol saksesful aplikens blong go thru long wan interview. So interview ia mi bin pasem interview stej mo fes fala turis bot we mi wok long hem hemi Pacific Dawn, hemi long July 2013, taem ia mi 21 yia nomo.”
Blong wok insaet long wan turis bot hemi kam wetem wan narafala jalens bakeken. Venola hemi saenem wan kontrak blong 8 manis. Hemi wan long ol period we hemi homesick mo tinkbaot ol famili blong hem plante, from hemi misim olgeta. Be hemi se fulap taem hemi mas kontinu blong rimindem hem wan long goal mo drim blong hem, blong wok long wan turis bot, so wetem strong tinktink ia mo fokas long drim blong hem, hemi kontinu wetem wok blong hem. Long period blong Pandemic ia, hemi pregnant wetem fes bebe blong hem.
“Mi pregnant wetem fes bebe blong mi taem mi 26 yia going 27, mi stap 4 manis long ship afta mi disembark mo go long maternity leave. Afta we mi bonem bebe blong mi, Adrian Terry, mi mo man blong mi mitufala separate. So mi stap wetem smol boy blong mi kasem end blong pandemic period, mi lego Adrian taem hemi 3 yia nomo mo kambak long ship bakeken. Bae mi talem olsem se hemi wan very heart breaking eksperiens taem mi lego hem mo kambak long ship bakeken. Be mi tinktink strong long bebe blong mi, fiuja blong mitufala mo ol famili blong mitufala so mi kam wetem wan strong tinktink blong wok towadsem goal ia.”
Venola Lini mo smol boy blong hem Adrian Terry
“Never tinktink daon long yu wan, olsem ol single mama yumi mas always tinktink positive ol taem, sapos yu gat wan goal o drim, kontinu blong stanap strong long hem mo tink positive blong akjivim goal we yu stap go from.”
Venola hemi statem wok carer blong hem olsem wan junior waiter, afta long namba 7 kontrak blong hem, oli promotem hem I kam long position blong waitress mo afta long hemia, oli promotem hem bakeken mo tede hemi karem role blong wan Host insaet long cruise ship ia, Pacific Encounter.
