Akio Onozawa ntawm lub roob Mangrove Mountain ntawm Australia lub xeev New South Wales Central Coast tau qhia tias nws xav yog thawj tug neeg uas xub los cog cov green tea hauv teb chaws Australia thiab yuav siv cov txuj ci qub qub ntawm teb chaws Japan coj los tswj thiab npaj cov green tea no.
Mr. Onozawa tau qhiat ias cov kev cog green tea yeej yog Japanese ib cov kab li kev cai thiab nws xav ceev thiab khaws tej no cia thiab qhia rau phau neeg tshiab txuas ntxiv rau yav tom ntej kom tsis txhob plam ploj.
Tab sis nws kuj yoob thiab ceeb tias txhua cov kev cog qoob loo tsis hais cog zaub thiab cog txiv xyoob txiv ntoo yuav tau cab xov dej los ywg tej qoob loo ntawd thiaj cog tau xwb uas txawv teb chaws Japan uas tsis tas txhawj txog dej li vim yog lub teb chaws muaj ntuj los nag heev.
Raws li lub koom haum tau qhia tej zaum cov green tea kuj yuav muaj peev xwm pab kom tiv thiav kom yus muaj cib fim mob kab mob cancer tsawg dua thiab yog hais txog cov kab mob cancer mis, noob qes thiab plab hnyuv ntawd. Nws tseem tau qhia ntxiv tias yog haus cov green tea no tej zaum kuj yuav pab kom yaug tau cov rog thiab tej roj hauv yus lub cev tawm pab kom txhob mob ntshav qab zib thiab tau lub cev yuag txhob rog txhob muaj ceeb thawj thiab. Ntxiv ntwad tseem tau qhia tias vim cov Green tea no muaj cov antioxidants uas tej zaum yuav pab kom yus lub hlwb khiav hauj lwm zoo kom txhob tau cov kab mob hlwb ua tem toob, kom cim xeeb zoo thiab muaj txoj sia nyog ntev tuaj thiab, mus txog rau pab kom tua tau ib cov kab mob bacteria los yog tiv thaiv kom yus txhob tau cov kab mob khaub thuas los sis tsis mob plawv thiab hlab plawv los sis txhob mob stroke los yog cov mob hlab ntsha tawg thiab tsob ntshav saum paj hlwb.
Tab sis raws li tau qhia kuj tau muaj ib txhia neeg txawj txeeg cav tias yog haus green tea ntau kuj yuav ua rau plab npau, cem quav, raws plab. Los yog tias hau tau tej green tea paug tsuas lwm yam tshuaj los yog tshuaj tua kab los sis cog rau tej chaw paug tej taug tshuaj huab cuas tsis huv ces kuj yuav ua rau muaj teeb mem rau lub cev li, ncuav me nyuam, tsis zoo rau tej me nyuam tseem noj mis los yog tsis xav kom tej hluas hnoob nyoog qes dua 18 xyoos haus ntau vim muaj caffeine ntau. Los yog yuav ua rau tus me nyuam ntawd yug tau los ib ce tsis xwm yeem, yuav ua rau pob txha tsis ruaj vim yuav ua rau cov calcium raug tso tawm hauv yus lub cev tawm ntau heev thiab. Kuj tau muaj ib co vkev teeb txheeb qhia tias yog muab cov green tea nyoj kom tau cov kuab tshuaj yej tseem tseem coj los haus kuj yuav ua rau puas raum thiab puas siab tau thiab.
Txawm li cas los kuj tseem tau muaj ib txhia neeg txawj txeeg paug zoo txog fab txij ntsim zaub mov, thiab tej taug tshuaj kuj tseem tau teev tseg tias tsim nyog yuav tau los ua tib zoo tshawb fawb kom ntxhaws tshaj no ntxiv kom qhia tau meej tseeb kiag tias cov green tea no tau txais txiaj ntsim dab tsi tiag rau leej tig neeg lub cev los yog yuav tsim tau teeb meem dab tsi tiag rau tej neeg uas haus cov green tea no.
Green tea lub npe scientific ces yog Camellia sinensis, thiab yeej muaj keeb kwm los ntev, hais tsis ntsees yog tau pib ntawm teb chaws Suav tuam tshoj thiab tau raug coj mus cog rau ntau cheeb tsam ntawm lub teb chaws ntawm cov teb chaws Asia thiab raws li tau qhia.
Yog li ntawd ces yog hais tias kom txhawj tsam ho hau cov green tea ces tsim nyog koj yuav tsum tau mus sab laj tawm tswv nrog tej neeg paub txog tej txiaj ntsim ntawm cov zaub mov los yog tej neeg paub txog kev tswj kev noj qab haus huv tso mam li haus raws li qhov lawv qhia koj xwb thiaj tsis muaj teeb meem rau koj txoj kev noj qab haus huv.
Txawm li cas los tam sim no Australia twb muaj cov teb cog cov green tea no li 20 thaj thoob plaws teb chaws Australia no lawm tsis hais ntawm xeev Tasmania, Victoria, Western Australia thiab xeev New South Wales ntawd rau lub caij uas Japanese lub chaw tsim cov Green tea muag hu ua Kunitaro tseem xav nrhiav kom tau ib cov av tshiab los cog kom tau cov green tea no muag rau Japan tau siv.
Thiab thaum cov green tea no tau ras los ua ib cov lagluam mus tau zoo lawm ces kuj tau ua rau Australia tej neeg ua liaj ua teb tig los kub siab cog tej green tea no ntau tuaj ntxiv lawm thiab.
Yog tias koj muaj ib thaj teb dav li 5 hectare ces koj muaj peev xwm cog tau cov green tea no ib xyoos twg txog li 20 tonnes diam.
Vim rau qhov lub caij nyoob sib txawv ntawm Japan thiab Australia no ces thiaj zoo ib lub cib fim rau Australia, rau qhov Australia de tau cov tea no ib xyoos 2 zaug xws li de tau thaum lub caij ntuj tshiab (Spring) thiab de tau thaum yav xaus xyoo tshiab uas npaj coj los muag tau rau lub caij Christmas los yog lub caij txog Suav lub tsiab peb caug Chinese New Year tau tib si uas yuav tau muag rau teb chaws Japan ntawd rau lub caij lawv xav tau heev.
Thiab tsis ntev los no tsoom hwv Australia tau pab nyiaj txog $100,000 rau lub koom haum The Australian Green Tea Cooperative uas John Robb yog tus teeb tsa ntawd ces thiaj tau ua rau muaj kev cia siab heev rau Australian cov lagluam green tea no lub neej pem suab lawm.
Ntxiv ntawd los cov kws paub tshuaj ntsuam txog fab kev cog qoob loo (Agricultural analysts) kuj tau hais tias tej zaum muaj ib hnub twg, Australia kuj yuav ras los ua ib lub teb chaws xa cov green tea no muag txawv teb chaws thiab. Yog li txawm teb chaws Australia tsuas cog tau cov tea no txog li 1% ntawm tej ntiaj teb cog tau xwb los tej zaum yuav tau txais txiaj ntsim heev rau Australia vim teb chaws Australia yog ib lub teb chaws huab cua huv tsis paug tsuas tej pa phem thiab yeej tsim tau tej qoob loo huv thiab yeej tsis siv tshuaj tua kab ywg cov tea no li, ces thiaj yuav ua rau Australia muaj peev xwm sib tw tau nrog Suav tuam tshoj cov lagluam muag tea thiab yuav muaj neeg xav yuav Australia cov tea vim tej hais no heev thiab yuav tau lagluam zoo.#
Nyeem tau ntxiv raws li cov vassab hauv qab no:
Mloog tau xov xwm ua lus Hmoob ntawm xov tooj cua SBS Radio Hmong Program ntxiv tau rau ntawm lub vas sab rau ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT; download tau SBS Radio App kom koj mloog tau xov tooj cua SBS Radio Hmong Program tau ntawm App Store thiab ntawm Google Play los yog download xov xwm kaw ua suab (Podcasts) ua lus Hmoob thiab lus Askiv tau ntawm los sis download tau ntawm thiab ntawm iTunes tuaj koom ua tub koom siab thiab koom mloog tau tau ntawm #SBSHmong lub Facebook page tau.
And if you want to comments directly with us please send your comments to or send it to .
