Lub caij uas Meskas lub tsev tsoom fwv tseem tab tom tshuaj ntsuam txog lub tuam txhab tsim dav hlau Boeing cov kev nyab xeeb tom qab tau muaj ntau yam xwm txheej cuam tshuam nrog lub tuam txhab no tau tshwm sim li dav hlau poob ntawm teb chaws Indonesia thiab Ethiopia thiab tsis ntev los no cia li muaj ib phab qhov rooj ntawm ib lub dav hlau cia li dhia poob thaum nws ib lub dav hlau tseem tab tom ya ntawm Portland Oregon.
Sam Salehpour uas yog Boeing tus quality engineer uas ua hauj lwm ntev txog 17 xyoo thiaj qhia rau Meskas lub tsev tsoom fwv tias ''Kuv yeej pom tej neeg mus dhia tsuj rau tej khoom coj los tsim dav hlau kom ncaj, nrog rau lwm cov tswv yim uas sis tsim nyog siv. Kuv thiaj qhia txog kuv cov kev txhawj xeeb no rau lub tuam txhab no los tsis muaj neeg kub siab txog. Thiab tseem muaj neeg hawv yuav ua phem rau kuv lub cev ntaj ntsug. Kuv tus coj yeej tau hais tias 'kuv yuav muab tus neeg uas tseem tham tej koj tham no ntawm rooj sab laj tua thiab'.''
Ed Pierson uas yog ib tug manager ntawm Boeing dhau los thiab tam sim no yog tus coj lub koom haum Foundation for Aviation Safety tau qhia tias yuav tau xyuas kom tej coj ntawm lub tuam txhab no los daws tej teeb meem no, vim yuav raug kev phom sij rau txhua tus neeg caij tej dav hlau Boeing tsim no.
''Tsis tsim nyog tej neeg caij pheej yuav tos tej neeg pom tej teeb meem los ua cov qhia qhov tseeb xwb. Tsim nyog lawv yuav muaj peev xwm cai tej dav hlau no thiab tsis tas txhawj li tias tsis hais hom dav hlau twg li yeej tsim tau zoo tshaj plaws coj los siv, thiab tej tuam txhab yav dav hlau los yeej kho tej dav hlau kom siv tau zoo, nom tswv tej koom haum los kuj yuav tau nrog xyuas raws li qhov tsim nyog thiab,'' raws li Ed Pierson hais.
Txawm tias tsis muaj Boeing tej neeg sawv cev mus koom teb nom tswv Meskas tej kev tshuaj ntsuam no los nws yeej tau tsis lees paub tej xwm txheej no thiab qhia tias yog ib co xwm txheej cuav xwb tsis muaj tseeb tiag. ''Thiab nws yeej tau qhia tias nws yeej yuav xyuas kom tau txais kev nyab xeeb thiab tsim tau tej dav hlau no zoo tshaj plaws thiab yeej yuav coj tej xov xwm no qhia rau tej customers thiab tej nom tswv los yog tej tuam txhab muaj feem koom paub.''
Tab sis lub koom haum Federal Aviation Administration hais tias nws tseem tab tom mus txheeb Sam cov lus no lawm.
Tammy Duckworth uas yog ib tug nom kis xeev siab ntawm pab nom Democrat thiab kuj yog ib tug tub koom siab ntawm nom tswv Meskas pawg rooj saib xyuas thiaj hais tias yuav tsum tau xyuas kom lub tuam txhab Boeing los ua tej hauj lwm no tsis yog pheej hais tias nws kub siab yuav los xyuas xwb. Nws thiaj hais tias ''Peb yuav tsum tau saib nws puas ua raws li nws hais. Nws hais tias nws yeej xub kub siab txog cov kev nyab xeeb tab sis zoo li yeej tsis muaj pov thawj qhia tias nws ua raws li tej hom phiaj uas nws yuav ua kom tau li. Thiaj yog tej yam tsim nyog peb txhawj xeeb, vim tej xwm txheej tsis ntev los no yeej qhia tias Boeing yeej tsis kub siab xyuas kom tau txais kev nyab xeeb li.''
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
