Yeej muaj ntau cov neeg tseem ceeb tsis hais cov neeg sawv cev ntawm tej neeg zejzog ntau tsav neeg, tej koom haum nrog rau lub koom haum Victoria Multicultural Commission thiab nom tswv xeev Victoria thiab nom tswv teb chaws Australia tau mus koom lub koos txoos noj hmo Victoria Premier gala dinner ntawm Melbourne Convention Exhibition Centre. Lub hom phiaj tseem ceeb yog los txhawb nqa cov lub tswv yim multiculturalism thiab txhawb nqa ntau tsav neeg ntawm lub xeev Victoria los yog hauv teb chaws Australia no.
Tom qab tau qhia lub koom txoos no ces Helen Kapalos uas yog tus coj lub koom haum Victoria Multicultural Commission nrog rau tus hau xeev Victoria uas yog Daniel Andrews thiab tus coj ntawm lwm pawg fai kum xeeb ntawm xeev Victoria uas yog Michael O'Brien tau los hais ib cov lus cuam tshuam txog lub tswv yim multiculturalism tias yog vim li cas thiaj yuav tau los txhawb nqa rau lub caij muaj neeg phem tau mus tua cov neeg Muslim ntawm teb chaws New Zealand lub nroog Christchurch ntawd.
Helen Kapalos uas yog tus coj lub koom haum Victoria Multicultural Commission hais tias:
Helen Kapalos, Victoria Multicultural Commissioner's speech about multiculturalism at Victoria Premier gala dinner 2019 at Melbourne Exhibition Center-SBS Hmong Source: SBS Hmong
“Kuv pom zoo nrog peb tus thawm pwm tsav (Scott Morrison) cov lus xa moo tu siab nws tau hais nag hmo rau cov xwm txheej phom sij tau tshwm sim, thiab siv lub tsam thawj no los tsim kev koom npoj nrog peb cov kws tij nkauj muam neeg Muslim, kuv xav hais lo lus " "As-Salaam-Alaikum" los yog thov kom muaj kev thaj yeeb rau rau nej sawv daws, kom muaj kev vam kev cia siab thiab kev zoo siab rau nej. Kuv ntseeg tias peb yuav tau los pov puag lub tswv yim multiculturalism kom ntau tshaj qub tuaj ntxiv, yeej yog los mas peb yeej tau los xyuas thiab peb yuav los kub siab tiag tiag los xyuas. Tab sis peb txoj kev ua tus coj yeej tsis yog ib txoj dej num yooj yim.
Yog li lub tsam thawj zoo li no, peb thiaj xav tau txhua txhuam cov kev ua tus coj los ntawm peb txhua leej txhua tus los ua ib yam yooj yooj yim uas yog yuav tau los lees paub ib tug twg. Vim peb txoj kev ua neej txhua hnub ces peb yeej muaj kev sib cuag mus los thiab koom tib lub cim thawj xwb uas peb yog tsoom leej niam, leej txiv, tsoom nkauj muam thiab nraug nus, tsoom pog thiab yawg xwb. Tsoom npoj yaig, tej no yog tej uas lus uas peb tsim nyog coj los siv xwb tsis tsim nyog yuav tis npe lwm yam rau lwm tus vim yog tej yam yuav pab kom peb sib cuag tau mus los tam li yog tib tug xwb."
Txuas ntxiv ntawd ces 3 tug coj tseem ceeb no tau xa xov qhia rau cov neeg zejzog Muslim ntawm lub xeev Victoria thiab teb chaws Australia txuas ntxiv.
Victoria Premier Daniel Andrews's speech about diversity and and multiculturalism and condolences to Muslim communities in Australia - SBS Hmong Source: SBS Hmong
Premier Daniel Andrews hais tias “Qhia rau txhua tus nkauj muam nraug nus neeg Muslim thiab txhua tus tub koom siab Muslim ntawm xeev Victoria tias peb saib nej rau lub sam xeeb, peb cam hwm nej, nej yog ib feem tseem ceeb ntawm peb ntau pawg neeg coj ntseeg ntau yam kev cai thiab mooj kav los yog hais ntau hom lus, uas pab kom peb tsim tau lub teb chaws muaj kev ncaj ncees thiab tau lub zoo neej pem suab. Kuv yeej paub zoo hauv kuv nruab siab thiab hauv kuv txoj kev xav thiab ntseeg tias txoj kev haum xeeb thiab kub siab txhawb nqa peb ntau haiv neeg kom muaj feem koom, tau txais kev hlub tshua, thiab sib fim sib hwm tsis cai peb cov kev sib txawv xwb mas thiaj yuav muaj yeej nrog lub tswv yim ntxub ntxaug faib cai thiab phem ntawd xwb."
Michael O'Brien uas yog tus coj ntawm lwm pawg fai kum xeeb tau hais tias "Xav qhia rau txhua tus nkauj muam thiab cov kwv tij neeg Muslim tias, peb xyab npab los puag thiab qawg nej, peb yeej nrog nej tus siab thiab yeej yuav pab nej, peb qhia nej paub tias peb yuav tsis sib cai sib tawg tswj. Vim peb lub xeev Victoria yog lub xeev muaj ntau tsav neeg koom nyob ua ke thiaj yog peb lub zog yog tias peb koom tes ua ib tsob ib txoog los nrog xyuas ces peb yeej tseem yuav ua tau lub neej txuas ntxiv."
Michael O'Brien, leader of Victoria Opposition's speech about diversity and multiculturalism - SBS Hmong Source: SBS Hmong
Txuas ntxiv ntawd ces lawv kuj tau tham txog cov kev muaj feem koom ntawm ntau pawg neeg thiab lub tswv yim multiculturalim ntawm Australia tej neeg zejzog thiab hauv teb chaws Australia no.
Victoria Premier Daniel Andrews hais tias “Hmo no yog hmo peb ua kev zoo siab rau peb cov peev txheej tseem ceeb tshaj plaws, nrog peb ntau tsav neeg sib txawv uas ua rau peb muaj zog tshaj, ua rau peb ntseeg peb tus kheej thiab ua rau peb pom tau tias tsis hais ntawm peb cheeb tsam no los yog hauv ntiaj teb no peb yeej yog ib tug qauv piv txwv zoo uas pab kom peb muaj kev cia siab rau lub neej pem suab. Hmo no yog ib hmo tseem ceeb, yog li thiaj tsim nyog peb ua kev zoo siab rau peb cov kev sib txawv ntawm ntau pawg tsav neeg. Peb yuav tsum tau qhia rau txhua tus pem xeem xeev Victoria tias peb yog ib thaj chaw vam meej, yog thaj chaw tau txais kev nyab xeeb dua, yog thaj chaw zoo dua vim peb muaj ntau cov ekv xav sib txawv heev. Dua ntawm peb cov kev sib txawv no lawm, los peb yeej tseem muaj peev xwm ua tau tus neeg uas yog peb thiab, peb muaj peev xwm ua kev zoo siab tias peb yog leej twg, peb yeej muaj peev xwm qhia txog peb tej kab lis kev cai thiab ua kev zoo siab rau peb tej kev cai, peb tej keeb kwm thiab teej tug uas ua rau peb sawv daws tau txais txiaj ntsim tib si. Thiaj li ua rau peb tseem ceeb tshaj qhov peb pom ntawm ib cov neeg zejzog ntawm xeev Victoria no xwb."
Helen Kapalos uas yog tus coj lub koom haum Victoria Multicultural Commission hais tias " Kuv ntseeg tias peb yuav tsum tau kub siab tshaj no los pov puag lbu tswv yim multiculturalism no tshaj qub ntxiv, yog, peb yeej tau los nrog xyuas lawm thiab peb yeej yuav kub siab los xyuas kom zoo npaum li qhov peb ua tau, tab sis txoj kev ua tus coj yeej tsis yog ib txoj dej num yooj yim kiag li."
Australian communities play their instruments as an orchestra - SBS Hmong Source: SBS Hmong
Michael O'Brien uas yog tus coj ntawm lwm pawg fai kum xeeb ntawm xeev Victoria hais tias:
"Ntawm kuv tus kheej lawm ces lub tswv yim multiculturalism tsis yog tsoom hwv ib cov cai xwb los yog sob lus los qhia txog peb lub teb chaws xwb, tab peb tej neeg zejzog yeej ntseeg tias, cov kev lees txais thiab lees paub lwm pawg neeg ua coj ntseeg ntau yam kev cai thiab hais ntau hom lus ntawm peb lub xeev no los yog ntawm peb lub teb chaws no tau ua rau peb zoo tshaj qub ntxiv, ua rau peb ntshe tshaj qub ntxiv, ua rau peb muaj tswv yim tshaj lij tshaj qub ntxiv, ua rau peb muaj kev ncaj ncees dua ntxiv raws li qhov tsim nyog, ua rau peb muaj kev vam meej dua tuaj ntxiv thiab ua rau lwm tus xav paub xav pom txog peb tshaj qub ntxiv. Ntxiv ntawd, peb tseem tau qhia tias peb tseem muaj peev xwm lees paub thiab lees txais lwm pawg tus tau zoo tshaj peb cov kev sib txawv ntawm xeev Victoria no lawm thiab ces thiaj ua rau peb muaj kev haum xeeb thiab nyab xeeb. Vim peb yeej muaj cov neeg uas coj kabke, kev cai thiab mooj kav sib txawv ntawm peb ntau tsav neeg uas ua rau peb muaj peev xwm ua tau lub neej zoo nyob ua ke yam thaj yeeb. Ces lub xeev Victoria uas kuv paub zoo no thiaj yog lub xeev ua kuv nyiam. Thiab yog tias tseem muaj neeg xav hawv tawm tsam nrog tej hais no ces kuv paub tias peb yeej yuav koomnpoj moj them nqag kab los tawm tsam thiab qhia tias peb yuav sawv ua ib nqag ib tsob ib txoog los koom npoj thiab yuav tsis sib faib sib cai sib tawg tswj."
Ntxiv ntawd kuj muaj cov tub koom siab ntawm Hmong Australia Festival Incorporation tau mus koom lub koom txhoos noj hmo nrog tus hau xeev no thiab. Kuj tau muaj ib cov poj niam Hmoob tau qhia txog lawv cov kev xav tias.
Hmong Australia Festival Inc to represent Hmong communities at VIC Premier gala dinner - SBS Hmong Source: SBS Hmong
“Nws tseem ceeb rau qhov kuv pom tias cov nom cov tswv los kuj kub siab ua hauj lwm kawg nkaus kom sawv daws muaj kev sib haum xeeb, kom sawv daws muaj kev sib nkag siab tab sis mas tseem muaj ib cov neeg tseem tsis nkag siab txog tias peb teb chaws Australia no tos txais thiab hlub peb cov neeg pawg tsawg ntau haiv npaum li cas," raws li Niam Muas Lis tau hais.
Niam Vam Mab Vaj los kuj tau qhia tias “Kuv nco tau ib lo lus peb tus nom (Daniel Andrews) hais tias peb zoo li cov xov ntau ntau tsos coj los xaws tau daim paj ntaub zoo nkauj heev, vim hais tias peb tuaj ib koom, ces peb lub xeev no xav kom peb nyob zoo li daim paj ntaub no.”
Niam Vam Mab Vaj qhia ntxiv tias “Kuv xav tias peb tuaj ntawm no kuj zoo, vim peb tuaj qhia txog Hmoob tej khaub ncaws, yeej muaj neeg rub peb mus yees duab nrog lawv, peb kuj tau qhia kom lawv paub txog Hmoob ntau tuaj ntxiv, uas kuv xav tias yog ib qho zoo.”
Mim Thoj uas yog ib tug poj niam Hmoob ntawm teb chaws America uas tau mus koom pluas hmo no hais tias:
Diverse Victorian communities who attended Victoria Premier gala dinner at Melbourne Conventional Exhibition Centre - SBS Hmong Source: SBS Hmong
“Peb nyob Meskas los yeej muaj tib yam li no thiab, tej nom tswv thiab tub txawg tub ntse, nrog rau tej muaj txij nkawm uas paub tab yeej mus koom tib yam li tim nej no thiab nawb, tab sis kuv pom tias peb coob heev ces peb mus koom coob dua, ntawm nej no kuv xav kom peb cov Hmoob los pab peb hmoob nas yom, kom koom tau coob tshaj qhov no thiab mas zoo tshaj qhov nod nawb. Kuv xav tias peb cov Hmoob nyob Australia tuaj coob tshaj no ces zoo tshaj no nawb.”
Dua ntawm cov kev tau mus koom tus nom xeev Victoria no lub koom txoos noj hmo no lawm, Niam Vam Mab Vaj tseem qhia txog nws txoj kev npau suav tias xav ua dab tsi ntxiv rau yav pem suab.
Vietnamese community who attended Victoria Premier gala dinner at Melbourne Conventional Exhibition Centre - SBS Hmong Source: SBS Hmong
Nws hais tias “Peb txoj kev npau suav mas peb yeej xav tias muaj ib hnub peb xav coj peb cov suab qeej, suab ncas tuaj koom nrog ntau haiv neeg cov twj paj nruag ua ke thiab. Los sis xyaum kom hais tau kwv txhiaj zoo es tuaj hais rau lwm tus mloog los sis tuaj rag Hmoob ntau hom txuj coj los ua kev lom zem koom rau lub koom txoos noj hmo no thiab thiaj tsim nyog qhov peb tuaj ib zaug."
