Cyber-bullying ces yog ib cov teeb meem muaj neeg mus thab zes lwm tus neeg hauv social media platforms li Facebook, Instagram, Twitter, What's App etc., uas tau tsim teeb meem nyuaj ntau yam ua rau tus neeg raug zes ntawd ntsib teeb meem nyuaj siab ntxhvo plawv, txaj muag poob koob npe, thiab poob lagluam los yog phem tshaj ntawv ua rau tus neeg ntawd txov txo nws tus kheej txoj sia. Tab sis tam sim no kuj tau muaj neeg nrhiav tau ib cov tswv yim thiab tshwm nyiaj los nrog pab tiv thaiv tej neeg siv tej social media no kom tau txais kev nyab xeeb lawm. Txawm li cas los tsis yog ib tug twg lub luag hauj lwm xwb, tab sis yog sawv daws lub luag hauj lwm yuav tau los sib pab daws ua ke.
Cov hluas yog cov neeg raug cov teeb meem no ntau tshaj plaws thiab yog cov tsis pom qab yuav pab tau lawv tus kheej li cas.
Tej hluas thoob plaws hauv ntiaj teb no los yeej zoo tib yam li cov hluas hauv teb chaws Australia no los kuj tau yug thiab loj hlob rau lub caij muaj tej social media thiab lawv yeej tau siv, tab sis yeej tseem tsis paub tiv thaiv lawv tus kheej kom tau txais kev nyab xeeb thaum lawv mus siv hauv online li.
Holly Samaranayake yog ib tug me yes ntxhais kawm xyoo 9 thiab nws tau hais tias tej social media no yeej muaj peev xwm tsim tau teeb meem loj thiab ntau yam heev rau peb tab sis peb yeej tsis paub yuav pov puag tau peb tus kheej kom txhob raug tej teeb meem no li cas li.
Samaranayake hais tias "Yeej muaj tej tej teeb meem sib thab sib zes hauv cov social media li SnapChat, Instagram thiab Facebook ntau dua, tab sis tsis tshua muaj cov teeb meem no hauv teej kawm pes tsawg."
Angus Cramer los kuj yog me yes tub kawm uas kawm xyoo 9 thiab nws qhia tias yeej tau muaj cov neeg nyiam thab plaub tau siv tej social media no coj mus hais lus phem lus thuam thiab lus ntxub ntxaug lwm tus tau yooj yim heev tuaj ntxiv lawm thiab.
"Peb yeej pom muaj neeg coj tej duab hauv lawv tej xov tooj coj los rau lwm tus saib hauv tej teej kawm thiab coj los ua chaw luag thiab thuam lwm tus. Thiab yeej tau muaj neeg coj tej xwm txheej tau sib thab sib zes hauv online coj los thab thiab zes lwm tus hauv tej teej kawm tej qab vag tsib taug lawm thiab.
Lub koom haum Kids Helpline cov program sab laj tawm tswv yim pab lwm tus tau qhia tias muaj neeg txog 3,500 tus rau ib lub xyoos twg tau hu mus thov kev pab cuam ntawm nws lub koom haum no. Tony Fitzgerald uas yog ib tug neeg ntawm lub koom haum no tau qhia tias muaj cov neeg hu xov tooj no tshaj ib feem peb yog cov raug lwm tus thab zes.
"Tej tuam txhab Social media yeej muaj lub luag hauj lwm yuav tau los nrog xyuas thiab tswj kom tej neeg siv lawv cov platforms no tau txais kev nyab xeeb. Tab sis yog peb tham txog cov teeb meem sib thab sib zes tsis hais sav nram no tim ntsej tim muag los sis yog hauv online ntawd ces yeej cuam tshuam txog tej neeg ntiag tug tej cuj pwm kev coj thiab," raws li Fitzgerald tau qhia.
Susan Mclean uas yog tus teeb tsa lub koom haum Cyber Safety Solutions tau hais tias cov kev muab tej me nyuam cov digital devices (mobile phone, PC, Labtops, Tablets etc.,) no tua los yog tsis pub rau lawv saib no tsis yog ib lub tswv yim zoo tab sis yuav tsum tau nqes tes kiag los ua ib yam dab tsi cov los daws tej teeb meem mon.
Mclean tau hais tias " Kuv xav tias yog ib qho tseem ceeb heev uas tej tuam txhab social media yuav tsum tau los koom tes ua ke los nrog tej koom haum zejzog los daws tej teeb meem sib thuam, sib thab sib zes los yog tsim kev ntxub ntxaug ntau zuj zus tuaj no. Cov teeb meem cyber-bullying tsis yog ib cov teeb meem technology dab tsi tab sis yog zejzog ib cov teeb meem xwb, nws yog cov teeb meem cuam tshuam txog txoj kev sib raug zoo sib cuag mus loa ntawm tib neeg uas lawv coj mus sib cav rau hauv online xwb."
Twb muaj 2 billion tus neeg siv Facebook tam sim no lawm, thiab Facebook los tseem yog tus tswv Instagram thiab. Antigone Davis uas yog ib tug neeg ntawm Facebook lub tuam chav tswj cov kev nyab xeeb rau ntiaj teb tej neeg siv kom tau txais kev nyab xeeb tau qhia tias, nws yeej muaj cov neeg ze txog li 20,000 tus los ua cov hauj lwm txheeb xyuas tej xwm txheej yuav muaj tau teeb meem rau tej neeg siv 24 teev rau ib hnub twg lawm.
Davis tau hais tias"Ntxiv ntawd los peb yeej tau kub siab thiab tau siv ntau yam technology coj los pab tswj thiab tshem tej teeb meem no thiab yeej xub kub siab txog tej teeb meem tej neeg qhia rau peb paub lawm kom tshem tau tej teeb meem no tawm kom sai li sai tau. Peb yuav tsim cai thiab siv ib cov twj los yog dab tsis los tau coj los tsim thiab tswj kom tau cov platform tau txais kev nyab xeeb rau sawvdaws siv, tab sis peb yuav tsis muaj peev xwm ua tau tib leeg kheej xwb, yuav tsum tau koom tes nrog lwm tus li cov hauj lwm Project RockIt hauv tej teej kawm ntawd."
Yog li Facebook yeej pom tau tias nws muaj lub luag hauj lwm yuav tau los nrog daws cov teeb meem sib thab sib zes no ces nws thiaj tau cog lus tias yuav tshwm nyiaj AUD 1 million dollars coj los tsim cov Project RockIt uas kom cov hluas los ua cov tawm tsam nrog cov teeb meem sib thab sib zes no. Rosie Thomas uas yog tus koom tsim tsa cov hauj lwm Project RockIt no hais tias lawv muaj lub hom phiaj xav nrhiav kom tau cov digital ambassador txog li 10,000 tus sawv cev thoob plaws rau Australia 600 lub teej kawm rau lub sij hawm 2 xyoo ntxiv no.
Thomas tau hais tias "Yog ib co project uas siv cov hluas rov qab los qhia kom tej hluas paub txog cov teeb meem sib thab sib zes no thiab kom paub los tiv thaiv thiab tawm tsam cov teeb meem no. Cov kev qhia kom lawv paub xwb yeej siv tsis tau hauj lwm zoo, tab sis peb yuav tsum ua tib zoo xyuas kom ua tau zoo tshaj ntawd. Peb thiaj xav kom tej hluas yuav tsum tshwm tswv yim thiab muaj feem koom nqe tes daws kiag cov teeb meem no thiab ua cov ntau thawj hlo los coj thiab daws cov teeb meem no vim lawv yog cov paub txog tej teeb meem no zoo dua."
Australia tus pwm tsav lis laj fai tswj kev kawm (Education Minister) Dan Tehan thiaj tau los qhib tsoom hwv cov haujlwm tawm tsam thiab pov puag tej me yes hauv tej teej kawm kom tau txais kev nyab xeeb rau cov kev siv social media no rau tim 19 lub 10 hli ntuj xyoo 2018 dhau los no thiab zoo siab rau Facebook cov kev nqe peev nyiaj txiag los pab daws cov teeb meem no.
Mr. Tehan tau qhia ntxiv tias"Yeej tsis muaj tib lub tswv yim twg tsi ntsees uas yuav muaj peev xwm siv coj los daws tau tej teeb meem no nkaus xwb, Kuv xav tias peb yuav tau siv ntau cov programs coj los daws tej teeb meem no. Tab sis qhov tseem ceeb tshaj plaws tam sim no mas yog qhov tias peb tseem tab tom npaj cov program no coj los txhawb nqa thiab peb tej me nyuam yaus, pab tej coj teej kawm, pab tej lees kais thiab coj los pab thiab qhia tej teeb meem no kom tej tub koom siab ntawm tej neeg zejzog paub txog thiab."
Rosie Thomas hais tias yog ib qho tseem ceeb heev uas tej hluas yuav tsum tau totaub txog tias tsis tsim nyog ib tug neeg twg yuav raug lwm tus thab zes kiag li.
Thomas hais tias"Tsis hais leej twg li yog nej pom ib tug neeg twg raug lwm tus neeg thab zes ces yuav tsum tau pab lawv thiab tawm tsam tus neeg ntawd tsis txhob cia tus neeg raug lwm tus thab zes ntawd tawm tsam thiab pov puag lawv tus kheej nkaus xwb. Thiaj xav kom yuav tsum tau kub siab thiab muaj peev xwm los nqes tes pab ua ib yam dab tsi coj los tiv thaiv thiab pov puag ib tug neeg uas raug lwm tus tsim teeb meem rau ntawd."#
Mloog tau xov xwm ua lus Hmoob ntawm xov tooj cua SBS Radio Hmong Program ntxiv tau rau ntawm lub vas sab rau ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT; download tau SBS Radio App kom koj mloog tau xov tooj cua SBS Radio Hmong Program tau ntawm App Store thiab ntawm Google Play los yog download xov xwm kaw ua suab (Podcasts) ua lus Hmoob thiab lus Askiv tau ntawm los sis download tau ntawm thiab ntawm iTunes los yog mloog tau ntawm tuaj koom ua tub koom siab thiab koom mloog tau tau ntawm #SBSHmong lub Facebook page tau.
