Nrhiav txoj hauj lwm koj nyiam ua.

Pob Tsuas Thoj Source: Zongtum Sippawat

Get the SBS Audio app

Other ways to listen

Yog koj xav kom muaj txoj kev zoo siab rau koj lub neej ces nrhiav yam koj nyiam ntawd ua.

Vim li cas Pob Tsuas Thoj (Zongtum Sippawat) uas yog Hmoob ib tug hluas ntawm xeev Tak, nyob sab hnub poob qaum teb ntawm Thaib teb thiaj ho tso tseg tsis ua nws txoj hauj lwm electrical engineer thiab ho ua ib siab mus khaws thiab txhom tej kab tej ntsaum rau cov chaw teeb txheeb thiab coj neeg mus ncig hav zoov lawm xwb?

Kab hlua nees-Pob Tsuas Thoj (Zongtum Sippawat) Source: Zongtum Sippawat

Pob Tsuas tau hais tias nws yeej nyiam tej kab tej tsiaj nruab nrag no thaum nws tseem yau ntawm nws lub zos los lawm, tab sis tsuas yog tsis tshua muaj sij hawm los kov los pom tej kab no xwb vim yuav tau mus kawm ntawv lawm. Tab sis tom qab uas nws kawm tiav electrical engineering lawm, ces nws thiaj mam paub tias nws nyiam mus txhom tej kab tej tsiaj nruab nrag thiab coj neeg mus ncig hav zoov, ces thaum kawg nws thiaj txiav txim siab los ua cov hauj lwm ua nws nyiam no thiab tau tso tseg tsis ua txoj hauj lwm electrical engineer lawm.

Mloog tau Pob Tsuas Thoj cov lus interview ua video nrog #SBS Radio Hmong Program ntawm nod:

Kab laug sab loj- Pob Tsuas Thoj (Zongtum Sippawat) Source: Zongtum Sippawat

Pob Tsuas Thoj tau qhia tias nws xav kom sawv daws nyias yuav tsum caum nyias txoj kev npau suav thiab nrhiav tej hauj lwm uas sawv daws nyiam ua, los yog tej niam txiv yuav tsum txhawb nqa lawv tej tub kis kom kawm yam txuj uas lawv nyiam kawm, thaum kawg thiaj yuav tau ua txoj hauj lwm lawv xav thiab nyiam ua ntawd.

Nab ntsuab-Pob Tsuab Thoj (Zongtum Sippawat) Source: Zongtum Sippawat

Zongtum Sippawat hais tias "Cov kev tau ua txoj hauj lwm ua kuv nyiam ua li mus txhom kab thiab tej tsiaj nruab nrag ntau yam, kev tau nyob tsev ua ke nrog yus niam yus txiv thiab pom lawv ntawm yus lub zos, thiab cov hauj lwm no yeej khwv tau nyiaj yuav laug tib yam li txoj hauj lwm electrical engineer, mus txog rau yus tseem muaj sij hawm rau yus tus kheej, yus ua hauj lwm rau yus tsis tau mus ua rau luag ntawd ua rau kuv muaj kev zoo siab heev rau kuv lub neej."

Kab laug sab tu duav -Pob Tsuas Thoj (Zongtum Sippawat) Source: Zongtum Sippawat

Pob Tsuas Thoj tau hais tias nws tsis xav kom tej neeg lam tau lam kov los yog txhom tej kab tej ntsaum los yog tsiaj nruab nrag ntawm tej zos los sis lub teb chaws lawv nyob ntawd, vim rau qhov tias yog tej yam yuav tau txais kev phom sij tau yog tias yus tsis paub tias hom tsiaj twg muaj taug.

Nab raj kub sai-Pob Tsuas Thoj (Zongtum Sippawat) Source: Zongtum Sippawat

Txawm li cas los nws yeej xav qhia rau tej neeg zos los yog cov neeg nroog uas tsis tshua paub zoo txog tej kab tej ntsaum los yog tej tsiaj nruab nrag tias, tsim nyog sawv daws yuav tau los txheeb kom yus paub tias, hom kab hom tsiaj twg muaj taug uas yuav tsim tau kev phom sij thiab teeb meem pheej hmoo tau rau yus, ces tsuas nco thiab ceev faj rau cov yuav tsim tau teeb meem rau yus xwb, vim feem ntau yog cov tsis muaj taug ces tsuas nco thiab cim tias hom twg muaj taug xwb tau lawm, kom yus thiaj tau txais kev nyab xeeb xwb.

Kab peb txiag yeeb muaj taug -Pob Tsuas Thoj (Zontum Sippawat) Source: Zongtum Sippawat

Thaum xub nws kuj tau mus koom Thaib cov Echo program uas qhia txog nws lub neej seb nyob li cas thiab ho uas tej hauj lwm li cas xwb. Tom qab ntawd ces nws raug hu kom mus koom Thaib cov program Super 100. Ces nws thiaj tau coj nws ib cov kab ntsaum lwm yam coj mus rau cov neeg saib thiab thov tau ib lub tshuab yees duab nrog rau 40 lub thawv roj hmab los rau nws tej kab tej ntsaum lawm.

Kab laug sab paj yeeb -Pob Tsuas Thoj (Zongtum Sippawat) Source: Zongtum Sippawat

Pob Tsuas kuj tau qhia ntxiv tias nws yeej xav mus kawm kom tiav ib sob kawm txog tej kab tej ntsaum thiab tej tsiaj muaj ntshav txias los sis muaj ntshav sov ntawd, thiab nws yeej xav los sau ib phau ntawv thiab yees tej duab ntawm txhua yam kab txog tej kab ntau yam lub neej txoj sia thaum pib txog thaum xaus khaws tseg cia. Nws hais ntxiv tias txawm yus tsis tau kawm tawm los yus yeej muaj peev xwm sau ntawv txog tej kab ntsaum no tau tib yam yeej tsis muaj neeg txwv dab tsi. Tsuas yog tias nom tswv Thaib muaj ib cov cai los txwv thiab pov puag qee yam tsiaj tsis pub kov xwb, tab sis lawv kuj yuav kho dua cov cai tshiab los tswj tej tsiaj no lawm thiab. Txuas ntxiv ntawd ces nws yeej muaj nws Facebook page
thiab nyuam qhuav tsim tau

YouTube channel

tsis ntev los ntxiv lawm thiab.

Qwj-Pob Tsuas Thoj (Zongtum Sippawat) Source: Zongtum Sippawat

Pob Tsuas Thoj qhia tias leej twg xav kawm thiab xav paub txog tej tsiaj tej kab no los yog xav kom nws coj mus ncig hav zoov mus saib, mus nuam yaj yees duab los nws yeej txaus siab qhia thiab yuav coj sawvdaws mus saib thiab.