Tsis yog ib qho yooj yim yuav nrhiav tswv yim los pab ib tug neeg twg uas raug teeb meem kub ntxhov hauv lub cuab yig. Tab sis muaj hmoo uas tseem muaj peev txheej ntau yam coj los pab cuam rau tej neeg raug cov teeb meem no hauv Australia no.
Txawm feem ntau yog cov teeb meem ua rau mob cev nqaij daim tawv rau ib tug neeg twg xwb los yeej muaj lwm cov teeb meem ua rau ib tug neeg twg ntshai, poob siab rau sab ntsuj plig txoj kev xav, muaj teeb meem cuam tshuam raug lwm tus neeg thab zes thiab cuam tshuam txog fab nyiaj txiag thiab.
Cov raug teeb meem kub ntxhov hauv cuab yig feem ntau yog poj niam uas muaj lub neej sib txawv txav heev uas muaj cov poj niam neeg tsiv teb tsaws chaw yog cov raug teeb meem nyaj tshaj thaum lawv xav thov kev pab cuam ntawd.
Ib tug poj niam sawv ntawm lub chaw ntxhuav tais diav ze qhov rais-Getty Source: Getty
Anu Krhishan uas yog ib tug neeg ua hauj lwm pab zej tsoom hauv nroog Melbourne qhia tias feem ntau ces tej poj niam no yeej raug cai nyob tib leej kho siab khuav tsis paub yuav cog cuab los sis yuav mus rau qhov twg.
"Lawv ntshai tsis xav qhia tej teeb meem no rau lwm tus paub, thiab txawv lawv xav qhia los tsis paub tias xyov yuav mus qhia rau leej twg qhia qhov twg? Lawv yeej ib txwm tsis tau siv cov tsev npaj rau cov pej nom raug teeb meem kub ntxhov hauv lub cuab yig nyob dua li. Lawv muaj ib cov tswv yim xav tias cov tsev tos poj niam ntawd zoo li cas. Muaj poj niam coob leej ntau tus muaj teeb meem rau lawv cov visa vim lawv pheej tseem tos lawv tus txiv saib xyuas fab noj haus thiab them nuj nqes xwb. Thiab muaj qee zaus lawv tsis muaj peev xwm yuav coj lawv tej me myuam mus pib dua lub neej tshiab."
Thiab vim tej poj niam neeg tsiv teb tsaws chaw ntsib tej zwj ceeb xwm txheej xov xwm sib txawv ces thiaj muaj ntau liub koom haum tsim cov kev pab cuam sib txawv coj los pab lawv thiab.
Source: Dave Thompson/PA Wire
Nrhiav kev pab cuam thiab kev taw qhia (Getting support and advice):
Yog tias koj muaj lus nug thiab xav tau txais kev tawm tswv yim pab sab laj, ces koj hu tau rau lub chaw txhais lus TIS National tus zauv xov tooj 13 14 50 thiab nug kom lawv pab txuas xov tooj rau lub koom haum 1800 Respect uas yog lub koom haum pab cuam cov neeg raug teeb meem kub ntxhov hauv lub cuab yig thiab muaj cov kev daws kev nyuaj siab pab rau cov neeg raug teeb meem hauv cuab yig 24 teev 7 hnub. Tsis tas li no koj muaj peev xwm nrog lawv tham thiab sab laj kiag hauv los tau.
Ntxiv ntawd koj muaj peev xwm thov neeg pab txhais lus ua koj hom lus thaum koj mus ntsib kws kho mob los yog mus ntsib thiab nrog tub ceev xwm tham tau tib yam.
Lub koom haum yog ib lub koom haum pab ntau haiv neeg coj ntseeg kev cai dab qhua thiab hais ntau hom lus sib txawv yog lub chaw tawm tsam tsis pub tsim teeb meem kub ntxhov hauv lub cuab yig thiab yeej muaj cov neeg paub koj hom lus nrhiav kev pab cuam rau koj. Koj hu tau rau lawv tus zauv xov tooj 1800 755 988.
Tsis tas li ntawd ib lub xeev twg nyias yeej muaj nyias cov kev pab cuam rau cov neeg raug teeb meem kub ntxhov hauv lub cuab yig uas koj nug tau xov xwm ntxiv ntawm koj tus kws kho mob los yog cov koom haum neeg zejzog tau.
Nrhiav kev pab cuam thaum koj raug teeb meem pheej hmoo (Getting help when you’re in danger):
Yog tias koj los yog ib tug neeg koj paub tsis tau txais kev nyab xeeb thiab ntseeg tias yuav raug teeb meem txaus ntshai kiag tam sim ntawd ces hu xov tooj rau 000.
Wendy Lobwein yog tus neeg ua hauj lwm ntawm lub koom haum AMES Australia,uas yog ib lub koom haum zejzog pab cov neeg thoj nam tawg tsov tawg rog thiab cov neeg tsiv teb tsaws chaw kom ua tau lub neej tshiab hauv teb chaws Australia.
Nws hais tias tub ceev xwm yeej tau mus xyaum thiab paub txog cov teeb meem kub ntxhov hauv lub cuab yig zoo heev thaum muaj neeg hu nrog lawv tham.
"Kuv paub tias muaj poj niam coob heev tseem ntshai thiab tsis xav kom tub ceev xwm muaj feem koom rau tej teeb meem no. Vim lawv xav tias yog tseem coj tub ceev xwm tuaj tswj tej teeb meem no thiab ces yuav ua rau lawv yim neeg tawg tsis tsheej cuab tsheej yig, tab sis qhov tseeb tiag tub ceev xwm yeej tau xyaum thiab paub zoo heev kom tswj tau kev nyab xeeb rau tej neeg xwb tsis yog yuav tuaj ua kom txoj kev txwj nkawm sib tawg los yog tsim teeb meem rau txoj kev sib raug zoo ntawm ib tug poj niam los sis txiv neej twg li. Vim rau qhov tias peb yeej paub tsis tau thiab yuav muaj tej teeb meem zoo li no tshwm sim thaum twg li. Yog li tub ceev xwm tsuas yog pov puag txoj kev nyab xeeb rau sawv daws xwb ces hu rau 000 yog koj xav tau kev pab cuam."
Source: CC0 Creative Commons
Koj muaj peev xwm ua tau dab tsi xwb (What can I do?):
Yog muaj ib tug twg qhia rau koj tias lawv raug ib tug neeg hauv lawv yim neeg tsim teeb meem kub ntxhov rau ces yuav tsum pab thiab qhia kom lawv paub nrhiav tej peev txheej pab cuam lawv.
Anu Krishan hais tias "Muaj ntau cov kev pab cuam rau cov poj niam muaj peev xwm qhia tej teeb meem no rau lwm tus thiab xav nrhiav kev pab cuam rau lawv. Tsis tas li no tsim nyog yuav tau tsim cov programs coj los qhia kom tej neeg zejzog paub kom lwm tus tub koom siab hauv tej neeg zejzog muaj peev xwm pab tau cov poj niam raug cov teeb meem no kom lawv txhob mloog tau tias tsis muaj leej twg kub siab txog lawv hauv tej zejzog. Vim feem ntau ces poj niam yeej txaj muag tsis xav qhia tej teeb meem no rau lwm tus paub tsam poob tsim, tab sis peb xav qhia rau lawv tias yeej tsis yog tej yam txaj muag dab tsi thiab yeej tsis yog tim lawv es thiaj muaj tej teeb meem no."
Muaj ib cov sob kawm coj los qhia rau tsoom thawj coj ntawm tej neeg zejzog kom paub txog cov teeb meem no thiab (A course for community leaders):
Thaum ntxov xyoo no, ces lub koom haum AMES Australia tau tsim thawj cov sob kawm qhia txog cov teeb meem kub ntxhov hauv lub cua byig coj los qhia rau tsoom thawj coj ntawm Australia ntau cov zejzog uas haus lus sib txawv thiab coj ntseeg tsis sib thooj kom paub txog cov teeb meem no thiab los tiv thaiv kom txhob muaj tej teeb meem kub ntxhov hauv cuab yim rau tej poj niam ntxiv. Yog tias koj xav kawm thiab ces lawv tseem yuav qhia cov sob kawm li no ntxiv rau xyoo tshiab ntxiv no, ho sib txuas lus nrog lawv los yog mus nyeem xov xwm ntxiv ntawm lub koom haum no lub vam sab ntawm no tau .
