Thaum peb tham txog cov teeb meem kub ntxhov hauv lub cuab yig lawm ces feem ntau peb yeej xav txog tej xwm txheej uas ib tug txiv neej los sis ib tug poj niam ntau lawv tus poj niam los yog ntau lawv tus txiv lub cev xwb.
Tab sis raws li Michael Riley uas yog ib tug neeg paub thiab sablaj tawm tswv yim rau cov neeg muaj teeb meem sib raug zoo ntawm lub koom haum Relationship Australia tau qhia rau SBD cov program ces:
"Yeej muaj ntau tsav ntau yam ua rau ib tug neeg ntshai tsis yog tib cov xwm txheej ntaus thiab ua kom mob rau cev nqaij daim tawv no xwb. Yog li ntawd yog tias peb muaj peev xwm txheeb thiab paub tej cuj pwm tsim kev kub ntxhov no thaum ntxov lawm ces yuav muaj peev xwm tiv thaiv thiab pab cawm tau tej neeg txoj sia."
Yog li ntawd thaum koj los txheeb xyuas thiab nyeem cov list uas teev zwm txog tej cuj pwm tsim teeb meem kub ntxhov hauv qab no lawm, xav kom koj kos rau thiab ho nug koj tus kheej tias koj puas tau ua ib yam dab tsi li tau teev no rau rau lwm tus? Cov cwj pwm tsim kev kub ntxhov muaj li hauv qab no:
- Xuas ncuav pias ntau/ntsiab nthos thiab ntaus.
- Tsoo txhawb koom rau ib tug twg.
- Xuas nrig ntaus phab ntsa thiab ntaus rooj.
- Ua qhov muag tav toj zas, ua ib yam dab tsi los yog coj tus yam ntxwv yeej yam ua kom nws ntshai.
- Muab nws tej khoom tso los yog rhuav pov tseb ua kom piam.
- Ntaus nws tej tsiaj nws tu kom raug mob.
- Muab riam phom coj los teeb phiaj thiab tso saib ua si.
- Ua kom nws mloog tau tias nws yog tus txhaum vim nws tsis kam nrog koj sib deev.
- Nrog nws sib deev thaum nws tsaug zog lawm los yog thaum nws qaug cawv.
- Pheej yuam kom nws nrog yus sib deev.
- Hawv tias yuav tua yus tus kheej los yog ua phem rau yus tus kheej yog tsis tau yam yus xav tau.
- Yuam kom nws txhob pub tub ceev xwm rau txim rau yus.
- Yuam kom nws ua tej yam txhaum cai.
- Ua tej yam saib tsis taus nws.
- Soj thiab nyiag saib nws lub xov tooj ntawm tes (mobile phone).
- Tib thiab hais ub hais no cuam tshuam txog nws lub cev.
- Ua tej yam rau nws kom nws xav tias ntshe yog nws vwm lawm.
- Tsuas pub tias nws siv tau nyiaj npaum li cas kiag xwb.
Marty Smiley uas yog tus tsim cov documentary hu ua #YesAllMen thiaj xav nug ib lo lus tia puas yog ib txhia txiv neej coj tej cuj pwm tsim teeb meem no ua rau muaj teeb meem rau Australia tej txiv neej?
Cov yam ntxwv ntawd muaj li nram no xws li:
- Ua rau nws mloog tau tias nws yog tus txhaum.
- Tswj thiab txwv nws tias tsuas pub nws ntsib thiab cuag los yog pom tau nrog leej twg xwb.
- Txwv tsuas pub nws nyeej ib hom ntaub ntawv dab tsi xwb.
- Txwv tsuas pub nws mus tau rau cov chaw yus tso cai rau nws mus tau xwb.
- Tsis pub nws mus xeem ntawv tsav tsheb los yog tsis pub nws tsav tsheb.
- Ua coj los pauj txoj kev chim thiab kev xam khib.
- Liam tias yog tim nws koj thiaj tsim tej teeb meem no.
- Liam tias tim nws qaug dej qaug cawv es koj thiaj tsim nws.
- Tiv thaiv tsis pub nws mus nrhiav hauj lwm ua los yog mus ua ib txoj hauj lwm dab tsi.
- Nws yuav tsum thov koj mas thiaj tau nyiaj siv.
- Khwv tau nyiaj los tsis qhia kom nws paub thiab tsis pub nws siv tej nyiaj koj tsev neeg khwv tau.
- Pheej muab nyiaj tsawg los sis tsis txaus rau nws tab sis ho yuam kom nws yuav tsum yuav kom tau tej zaub mov txwm li koj xav thiab them tej nuj nqes ua koj tsev neeg tiv ntawd.
- Siv thiab zuag tej me nyuam coj los ua tam kev chim.
- Hawv tias yuav coj nws tej teeb meem mus qhia rau lwm tus.
- Pheej soj nws hauv social media seb nws ua dab tsi.
- Siv cov mobile phone app nyiag nruab rau nws lub xov tooj soj seb nws ua ua dab tsi rau qhov twg.
Yog li tej cuj pwm hais los no ho puas tsim teeb meem rau koj txoj kev sib raug zoo nrog koj tus poj niam los yog tus txiv los yog koj tus hluas nkauj hluas nraug thiab?
Cov cuj pwm tau hais dhau los saum toj no tsuas yog ib cov ntawm ntau cov uas tej txiv neej tau mus kawm cov Men's Behavior Change program nrog rau lub koom haum Relationship Australia kom hloov tau tej cuj pwm no xwb. Voim lawv pom tau tias yog ib cov cwj pwm tau ua rau lawv lub neej tawg thiab puas tsuaj lawm.
Yog tias koj muaj kev txhawj xeeb txog ntau yam cuj pwm li tau teev saum toj no thiab koj ho kos rau lawm thiab koj xav tau txais kev pab cuam ces xav kom hoj hu rau lub koom haum tus zauv xov tooj 1300 364 277 thov kev pab cuam tau.
Hos yog tias gtej zaum koj los yog koj ib tug phooj ywg twg yuav raug cov teeb meem kub ntxhov hauv lub cuab yig (Family violence, domestic violence), ces ho mus txheeb xyuas lub koom haum los sis yog hu rau lawv tus xov tooj 1800 737 732 thov kev pab cuam tau.
Txheeb xyuas lwm yam xov xwm cuam tshuam txog cov teeb meem kub ntxhov hauv lub cuab yig tau ntxiv raws li hauv qab no:
2. check out the feeds story about if masculinity making men end up in trouble here
3. Check out this short video that Hmong American campaign against domestic violence here
4. "I won't raise my daughter to please"
