John Hickey uas yog tus coj lub koom haum Baptist World Aid Australia hais tias nws tsab ntawv cej luam txheeb tau tais muaj 130 lub tuam txhab muag khaub ncaws thiab muaj tej khaub ncaws tshaj 480 hom yeej tau kub siab los nrog xyuas kom txhob yuam tej neeg ua qhev txiav thiab xaws lawv tej khaub ncaws, txhob yuam siv dag zog me nyuam yaus, nrhiav cov ntaub xovxov uas tau los yam tsis tsim teeb meem rau tej ib puag ncig, xyuas kom tej neeg ua hauj lwm khwv tau nyiaj raws qhov tsim nyog thiab tau tej chaw ua hauj lwm zoo thiab pov puag tej neeg ua hauj lwm txoj cai.
Yeej tau muaj tej tuam txhab no tshaj 60% kub siab txog cov kev nrhiav tej ntaub xov no lawm, thiab muaj tej tuam txhab no txog li 38% kub siab los daws tej teeb meem li hais los saum toj no lawm thiab. Tab sis yeej tsuas muaj tej tuam txhab txog li 5% thiaj kub siab los them nyiaj kom zoo kom tej neeg ua hauj lwm txiav thiab xaws khaub ncaws no khwv tau nyiaj txaus coj los ua lawv lub neej tiag xwb.
Koj muaj peev xwm mus txheeb xyuas tau Italian lub tuam txhab fashion MaxMara nrog lwm cov brands seb puas kub siab los pov puag tej neeg cov intellectual property rights tau ntawm tau.
Yog li ntawd lub koom haum Baptist World Aid Australia no yeej tsis tau mus txheeb xyuas cov teeb meem uas tej neeg pawg tsawg tej teej tug raug tej tuam txhab lagluam no nyiag coj mus siv yam tsis raug kev raug cai li, tsuas yog tos cov kev koom tes los ntawm 2 lub koom haum thiab nrog rau lwm cov koom haum los nrog xyuas cov teeb meem no xwb.
Mloog tau John Hickey uas yog tus coj ntawm lub koom haum Baptist World Aid Australia tawm tswv yim ntawm no:
Raws li tsab ntawv cej luam tau qhia, lub koom haum WIPO yeej tau teev 3 lub tswv yim coj los pov puag cov intellectual property rights uas yuav tau kub siab los xyuas cov khoom xub xub tsim tau li qub, qhov kev zoo nkauj ntawm yam khoom ntawd thiab tej txheej txheem los yog txuj uas siv los tsim yam khoom ntawm yuav tsum coj los teev zwm ua cov copyrights, patents thiab trademark.
Txawm li cas los yeej tseem muaj ib txhia neeg paub xaws paj ntaub ntawm teb chaws Mexico yeej tau qhia tias lawv chim thiab tu siab heev uas tseem muaj tej lagluam fashion loj nyiag siv tej neeg pawg tsawg tej teej tug, vim lawv yog cov lagluam me tsis muaj nyiaj tsis muaj fwj chim yuav mus hais tau nrog tej tuam txhab muaj txiaj nplua nuj li raws li Oxfam tsab ntawv cej luam tau qhia.
Ntau xyoo dhau los no los pej kum haiv yeej tau muaj cov neeg fashion designer li Isabel Marant nrog rau lwm cov fashion brand li Pottery Barn, Nike, Nestle, Mango tau nyiag siv cov neeg Mexico tej paj ntaub thiab xyoo 2018 uas yog Eponine London uas siv Hmoob cov paj ntaub nrog rau MaxMara uas tau raug teeb meem nrog Nplog cov cov neeg Oma cov paj ntaub uas tseem muaj teeb meem tam sim no thiab. Tab sis lawv yeej tsis lees paub tias lawv ua txhaum dab tsi li. Muaj qee zaus kuj muaj tej neeg raug teeb meem no coj qee cov tuam txhab fashion no mus hais plaub tab sis kuj mus tsis txog qhov twg li thiab.
Raws li TAEC Laos phau Facebook tau qhia rau tim 03.05.2019 no lub tuam txhab muag khaub ncaws MatchesFashion tau tsis muag MaxaMara cov khaub ncaws fashion lawm thiab tau hais kom MaxMara yuav tsum tau los tham txog cov teeb meem no thiab los thov txim rau tej xwm txheej nws tau ua txhaum no.
Tara Gujadhur uas yog tus koom tswj thiab yog tus koom tsim tsab lub koom haum the Traditional Arts and Ethnology Centre (TAEC) ntawm Luang Prabang ntawm Nplog teb hais tias, txawm muaj 2 lub koom haum WIPO thiab WFTO tej cai tsis hais conventions los yog treaties thiab lwm cov cai los yeej pov puag tsis tau tej neeg pawg tsawg tej intellectual property kom txhob raug tej multinatonal fashion brands nyiag coj mus siv li, vim kev hais plaub pab tsis tau tej neeg pawg tsawg los yog cov lagluam me.
Mloog tau Tara Gujdhur cov lus tawm tswv yim ua lus Hmoob tau ntawm no: https://www.sbs.com.au/yourlanguage/services/embeds/audioplayer/85c7efd8-93db-43b1-af86-a5c7509a9f26
Yog li ntawd thiaj yuav tsum tau qhia kom zej tsoom paub txog cov intellectual property rights, qhia kom tej neeg txhob mus yuav tej khoom ua txhaum cai, muaj kev pab thiab txhawb kom tej neeg zejzog, koom tes nrog cov koom haum, tej lagluam ntiag tug, thiab nom nom tswv nrog rau cov koom haum WIPO thiab WFTO los daws tej teeb meem no ua kev thiab kub siab nqes tes daws tiag tiag mas thiaj yuav thiv thaiv thiab pov puag tau tej teeb meem no kom txhob muaj ntxiv lawm.
Professor Lee Pao Xiong ntawm lub chaw teeb txheeb txog Hmoob () hais tias "Yog peb tsis pom tias peb teej tug tseem ceeb, ces lwm haiv neeg yeej xav tias tsis tseem ceeb thiab yuav coj mus siv li cas los tau, yog tias peb kub siab thiab pov puag thiab pom tias peb tej teej tug tseem ceeb lawm ces lwm tus yuav tsis lam tau lam coj yus tej teej tug coj mus siv ua dog ua dig thiab.
Mloog tau Dr Lis Pov Xyooj tham txog Hmoob cov paj ntaub raug Eponine London coj mus siv yam tsis raug cai ntawm no: https://www.sbs.com.au/yourlanguage/services/embeds/audioplayer/1354c485-31fc-4e80-9717-13eb9c88f49c
Seng Alex Vang ntawm lub koom haum the Hmong American Experience los yeej hais tias "Peb yuav tsum pov puag tej teej tug uas yog peb li, vim yog peb ib cov kab li kev cai uas qhia tau tias yog Hmoob no, ces thiaj tsim nyog peb yuav tsum tau ceev tseg thiab yuav tau pov puag."
