Cov sob kawm ntawv Askiv pub dawb rau cov neeg tsiv teb tsaws chaw thiab neeg thoj nam

Koj puas paub tias dua ntawm tsoom hwv Australia cov sob kawm Adult Migrant English Program (AMEP) pub rau cov neeg muaj hnoob nyoog uas tsis paub lus thiab ntawv Askiv zoo uas yuav tau kawm 510 teev thaum nyuam qhuav tuaj txog rau teb chaws Australia no lawm, tseem muaj ib cov sob kawm ntawv Askiv accredited English classes hu ua English for an Additional Language (EAL) uas koj muaj peev xwm thov kawm tau ntxiv thiab?

Free accredited English classes for migrants and refugees (WCIG) Source: WCIG

Marlon Deleon at Lub koom haum WCIG tus neeg ua hauj lwm hu ua Marlon Deleon uas lis cov dej num Business Development & Relationship Officer hais tias nws lub koom haum yeej muaj ntau yam kev pab cuam rau tej zejzog tsis hais pab rau tej laus, tej hluas, xyaum thiab qhia tej neeg, los yog pab tej neeg nrhiav hauj lwm ua thiab.

Tham txog cov kev qhia lawm ces cov kev qhia tej sob kawm ntawv Askiv pub dawb hu ua accredited English classes uas tsoom hwv Australia tshwm nyiaj los pab qhia. Lub hom phiaj yog xav qhia kom tej neeg paub ntawv thiab paub lus Askiv zoo kom siv tau mus ua hauj lwm los yog siv tau mus kawm qib siab txuas ntxiv.

Mr. Deleon hais tias txhua tus neeg tsiv teb tsaws chaw thiab thoj nam uas hais lus Askiv ua hom lus ob uas tsis tshua paub zoo, yog cov neeg uas tsis tau kawm high school hauv Australia, yog cov neeg permanent reisidents, thiab tau Medicare siv yog cov muaj cai mus thov tej sob kawm no kawm tau.

Cov sob kawm no yuav qhia tog cov kev nyeem, kev sau, kev sib tham hais lus thiab mloog. Tsis tas li no los lawv kuj yuav coj tej tub kawm mus kiag rau hauv tej neeg zejzog los yog tej kiab khw kom lawv tau siv kiag tej lsu uas tej neeg niaj hnub siv thiab. Ntxiv ntawd tseem muaj chav ua noj kom tej neeg tau sib tham ua lus Askiv thiab. 

Cov chav kawm no tsuas xav tau cov neeg txog li 15 leeg xwb thiab yuav cov muaj hnoob nyoog txij 18 xyoos mus txog 70 tawm xyoo. Vim tias xav kom tsim tau cov chav kawm uas tej tub kawm kawm tau zoo, ces thiaj tsis xav yuav neeg coob hauv ib chav. 

Yog li cov chav kawm no thiaj yuav tsum tau kawm 2 hnub rau ib lub limpiam ntev txog 6 hli mam kawm tiav. Thaum kawm tiav lawm ces yuav tau cov ntawv pov thawm Certificate I, II los sis yog III raws li qib yus kawm.

Thiab qhov zoo tshaj ces tej tub kawm muaj peev xwm nrhiav kom tau ib qhov chaw kawm ze lawv ces lub koom haum WCIG mam li tuaj qhia dawb rau lawv xwb.

Yog koj txog cov sob kawm no kom ntxaws ntxiv ces mus txheeb xyuas tau ntawm lub koom WCIG lub website los yog hu tau rau lawv tus zauv xov tooj [phone] tau.