Raws li SBS News tau tshaj tawm, ces ntiaj teb lub koom haum tswv kev noj qab haus huv World Health Organisation (WHO) tsab ntawv cej luam tshiab tau qhia tias txhua txhua hnub yeej muaj cov neeg tau cov kab mob kas cees tshiab txog li 1 roob tus (1 million) uas muaj peev xwm tiv thaiv tau kom tsis txhob mob.
Tsis tas li no nyob rau ib lub xyoos twg tseem muaj cov neeg kis cov kab mob kas cees ntau hom txog li 357 roob (million) tus thiab. Raws li WHO tsab ntawv cej luam (report) tau qhia, ces cov neeg muaj hnoob nyoog txij li 15 txog 49 xyoos yog cov kis tau tej kab mob no.
Muaj tej neeg kis tau cov kab mob coj paug dawb (Chlamydia) txog li 127 roob tus kis tshiab rau xyoo 2016, muaj kab mob gonorrhea kis tshiab txog li 87 roob (million) tus tshiab, thiab muaj cov neeg kis cov mob syphilis txog li 6.3 roob (million) tus nrog rau muaj cov neeg tau cov mob trichomoniasias tshiab txog li 156 roob (million) tus thiab.
Tab sis qhov phem tshaj ntawd mas WHO tseem cej luam qhia ntxiv tias cov tshuaj tua cov mob kas cees gonorrhea siv tsis tau hauj lwm zoo lawm thiab, ces thiaj yog tej yam txaus txhawj xeeb rau tej neeg tau cov mob no thoob ntuj.
Yog tias tsis muaj peev xwm yuav tiv thaiv thiab kho lawm ces yuav ua rau muaj lwm yam teeb meem cuam tshuam txog txoj kev noj qab haus huv lwm yam rau tej neeg uas tau cov mob no thiab xws li, yuav ua rau lawv tau cov mob kas cees ntau hom (Sexually Transmitted Infections-STIs), ua rau yuav mob tau HIV, tej zaum yuav ua rau tej poj niam mob cancer rau lawv tej tsev me nyuam thiab ua rau poj niam tsis muaj me nyuam los yog tseem ua rau tej kab mob no kis ntawm leej niam rau tus me nyuam tseem nyob hauv plab tsis tau yug ntawd thiab ua rau muaj mob ntau yam tau. Ces thaum kawg yuav ua rau ntau lub teb chaws poob nyiaj los kho tej mob no ntau heev.
Yeej muaj ntau txoj xub ke los tiv thaiv tej mob kas cees no xws li, qhia thiab kawm kom tej neeg paub txog tej mob no thiab paub tiv thaiv lawv tus kheej li siv hnab looj thaum sib deev, hloov tej cuj pwm sib deev, mus cuag kws kho mob thiab txheeb xyuas seb yus puas kis tej mob no, hno tshuaj vaccine HPV tiv thaiv, thiab yog thaum txheeb tau tias mob lawm ces yeej muaj cov hauv kev ntau yam coj los kho cov STIs thiab HIV. UN yeej tau npaj nws 3 lub hom phiaj rau ntiaj teb los daws cov mob STIs, HIV thiab cov kab mob siab uas tau pib txij xyoo 2016 mus txog rau xyoo 2021 lawm.
