Lub koom haum The Australian Institute of Health and Welfare tsab ntawv cej luam tshiab tau qhia tias muaj yam zoo thiab yam phem ntawm Australia tej pej xeem txoj kev noj qab nyob zoo.
Tsab ntawv cej luam no qhia tias muaj tsawg tus pej xeem Australia thiaj noj zaub pab rau lawv lub cev xwb thiab muaj neeg Australia feem coob yog cov neeg lub cev muaj ceeb thawj tshaj qhov tsim nyog lawm.
Yam txaus txhawj xeeb yog pej xeem Australia tsis noj zaub txaus pab rau lub cev thiab muaj cov kab mob uas mob ntev ntau yam. Hos qhov tsis zoo yog muaj teeb meem lub cev muaj ceeb thawj uas ua rau yuav laug txog ib nrab ntawm Australia tej pej xeem muaj ib hom los yog ntau hom kab mob uas mob ntev xws li ntshav qab zib, mob plawv thiab hlab plawv nrog rau cov kev nyuaj siab ntxhov plawv.
'Cov teeb meem mob plawv yog cov ua rau Australia tej txiv neej tas sim neej coob tshaj plaws, hos cov kab mob hlwb ua tem toob tsis nco tom qab tom ntej thaum xub hu ua dementia thiab thaum mob ntev thiab loj tuaj ces cim tsis tau thiab nco tsis tau cim xeeb tsis zoo lawm hu ua Alzheimer yog cov ua rau tej poj nam ta sim neej coob tshaj plaws.'
Yam zoo ces tam sim no Australia cov poj niam muaj txoj sia ntev tshaj tej txiv neej (80.4) txog li 4.2 xyoos los yog 84.6 xyoo. Thiaj ua rau Australia yog lub teb chaws zum 3 ntawm cov teb chaws koom tes lagluam thiab kev txhim kho Organisation for Economic Cooperation and Development (OECD) uas muaj txoj sia ua neej tau ntev. Thiab ho muaj cov neeg haus luam yeeb thiab haus dej haus cawv tsawg zujzus lawm.
'Tsab ntwav cej luam no tseem tau qhia tias muaj tshaj 99% ntawm Australia cov me nyuam thiab muaj cov neeg Australia muaj hnoob nyoog lawm txog li 96% tsis noj zaub txaus raws li nom tswv cov kev taws qhia kom noj pab rau lawv lub cev, tsis tas li no tseem muaj ib nrab ntawm Australia tej pej xeem tau cov kab mob uas mob ntev xws li ntshav qab zib, cancer thiab mob plawv thiab hlab plawv.'
Yog li Dr. Adrian Sartoretto, uas yog ib tus kws kho mob Gastroenterologist uas paub zoo txog ntau yam mob nrog cev cuam tshuam txog hlab pas, plab hnyuv, siab, po thiab tsib thiaj qhia tias yog ib cov teeb meem txaus txhawj xeeb kawg nkaus uas tsim nyog yuav tau kub siab los daws kom sai kiag tam sim no.
"Peb yuav tsum tsim kom tau ib cov cai coj los txhawb nqa kom tej neeg kub siab tig los noj tej zaub mov zoo muaj txiaj ntsim pab rau lawv lub cev kom zoo tshaj qhov qub ntxiv. Thiab yuav tsum npaj tej tswv yim tseg kom peb muaj peev xwm siv los daws cov teeb meem tej neeg lub cev muaj ceeb thawj thiab rog heev ntawd.Txawm tias tej neeg yuav exercise txhua lub plua (Weekly) los yog txhua txhua 2 lub plua (Fortnightly) twg uas yuav pab kom lawv poob li 5 los yog 6 kislus, los yeej tseem pab daws tsis tau tej teeb meem no, txawm tias yuav pab txo qee yam teeb meem kom lawv txhob tau qee yam kab mob tab sis cov kev exercise no yeej pab tsis tau kom tej neeg tswj tau lawv cov ceeb thawj li cas li. Yog li no peb thiaj xav kom yuav tsum nrhiav ib cov tshuaj coj los teev zwm nrog Pharmaceutical Benefits Scheme (PBS) kom tau sib thiab kom los nrog txheeb xyuas thiab tswj cov teeb meem lub cev rog muaj ceeb thawj no. Tsis tas li no los peb tseem xav kom yuav tsum muaj cov kev teeb txheeb txog cov teeb meem no kom ntau tuaj ntxiv thiab xav kom nom tswv tshwm nyiaj los pab nrhiav thiab tsim lawm txoj hauv kev los nrog daws tej teeb meem no thiab," raws li Dr. Sartoretto hais.
Australia cov keeb cag neeg Indigenous (Aboriginal and Torres Straight Islander) los kuj tau txais kev noj qab nyob zoo zoo dua tuaj ntxiv vim lawv muaj kev kawm txuj siab thiab nrhiav tau hauj lwm zoo ua lawm. Tab sis lub koom haum The Australian Institute of Health and Welfare kuj txheeb tau tias cov kev muaj peev xwm koom tau nrog teb chaws txhim teb kho chaw thiab muaj peev xwm ua tau lub neej zoo no yuav pab kom tej neeg tau txais kev noj qab nyob zoo thiab.
Tab sis txawm li cas los Dr. Dinesh Indraharan ntawm lub koom haum no yeej qhia tias cov neeg txhom nyem uas tsis muaj kev kawm zoo thiab tsis tau hauj lwm zoo ua yog muaj cib fim ntau tshaj lwm cov neeg txog li 3 npaug uas yuav haus luam yeeb los yog yuav muaj cib fim tau cov kab mob ntshav qab zib ntau tshaj lwm cov neeg txog li 2 npaug diam.
Dr. Indraharan tseem tau hais ntxiv thiab tias tsis hais yuav nyob yaj sab los sis nyob hauv nroog nws yeej muaj nws cov teeb meem ua rau tej neeg tsis tau txais kev noj qab haus huv thiab.
Dr. Indraharan hais tias "Nyob ntawm seb thaj chaw peb nyob ntawd ho nyob rau qhov twg xwb los yog yuav muaj tau teeb meem dab tsi rau peb tej ceeb thawj los sis ua rau peb lub cev rog tshaj qhov tsim nyog xwb. Seb peb tej nroog puas yog tej chaw uas tej neeg muaj chaw taug kev, seb yam khoom peb noj ho yog tej khoom noj zoo li cas, los sis peb ho siv lub sij hawm los saib TV thiab siab tej xov tooj los sis lwm yam electronic devices ntau npaum li cas xwb."
Qhov kawg uas tseem txaus txhawj xeeb heev thiab ces yog muaj yuav laug txog ib nrab ntawm Australia tej pej xeem muaj hnoob nyoog txij 18 xyoo txog 65 xyoos yeej tseem rau cov teeb meem nyuaj siab ntxhov plawv, siv yaj yeeb txhaum cai los sis tswj tsis tau lawv tej cuj pwm kom tus thiab.
Cov qub peeb zeej yog cov ntsib teeb meem nyuaj siab thiab mob hlwb ntau dua. Ntxiv ntawd yog cov neeg homosexual thiab bisexual txog li 32% tau cov teeb meem nyuaj siab ntxhov plawv thiab yog piv rau cov cuab yig uas muaj leej niam leej txiv ua txij nkawm ces tsuas muaj kev nyuaj siab txog li 14% xwb.
Txawm li cas los Greg Hunt uas yog Australia tus pwm tsav lis laj fai tswj kev noj qab haus huv yeej tau hais rau pej xeem Australia tias kom tej neeg tsis txhob txaj muag mus nrhiav kev pab cuam los daws cov teeb meem nyuaj siab thiab mob hlwb no, vim yeej zoo tib yam li lwm cov kab mob uas peb muaj peev xwm nrhiav tau txoj hauv kev kho tau zoo thiab.#
Mloog tau xov tooj cua SBS Radio Hmong Program cov xov xwm ntau yam ua lus Hmoob thiab lus Askiv (English) tau ntawm rau hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT.
Koj tseem muaj peev xwm download tau SBS Radio App ntawm App Store thiab tau ntawm Google Play los sis koj muaj peev xwm download tau cov xov xwm kaw ua suab ua ib zaj ib zaj ua lus Hmoob thiab lus Askiv tau ntawm .
Ntxiv ntawd koj muaj peev xwm koom tau peb ntawm SBSHmong lub Facebook page, tuaj nyem nyiam (Click Like), koom tawm tswv yim (Comments) los yog faib xov xwm (Share) rau koj tej phooj ywg mloog tau ntawm .
Thiab yog koj muaj xov xwm tseem ceeb xav xa rau xov tooj cua SBS Radio Hmong Program los yog xav tham ces hu rau tus zauv xov tooj + 61 3 9949 2259 los sis xav kom cov lus tawm tswv yim tuaj tau rau tus email .
