Tau muaj ib cov kev koom tes tshawb fawb ntawm University of Melbourne thiab Cancer Council Victoria tau qhia tias kev siv cov duab txaus ntshais tsis hais yog tej duab kaus hniav lwj, lub plawv khub roj coj los lo rau tej zaub mov tsis muaj txiaj ntsim ntawd yuav pab kom tej neeg tig los noj tej zaub mov zoo muaj txiaj ntsim tuaj lawm thiab.
Helen Dixon uas yog ib tug kws teeb txheeb paub zoo txog tej neeg cov cujpwm ntawm Cancer Council Vitoria hais tias yeej siv tau hauj lwm zoo tiag vim cov duab no ua rau tej neeg tswj tau lawv tus kheej me ntsi kom txhob noj tej zaub mov tsis muaj txiaj ntsim rau lub cev lawm thiab.
"Te xo siv tau hauj lwmzoo dua ntais yog cov muaj tej duab qhia txog tej khoom nrog cev phem thiab muaj cov xo tsis zoo qhia nrog. Tab sis cov lus qhia txog tej yam zoo ntawm tej khoom noj khoom haus kuj siv tau zoo tib yam li tej lus phem sau los rau ntawm cov khoom uas tsis muaj duab los nrog thiab. Tab sis tej xo uas siv tau zoo tshaj plaws yog cov duab qhia txog tej teeb meem mob phem rau lub cev thiab cov lus qhia tias yuav muaj teeb meem rau lub cev li cas,'' raws li Helen Dixon hais.
Dr. Stefan Bode uas yog ib tug tau koom sau cov kev teeb txheeb no qhia tias lawv kuj tsis paub tias yog tim dab tsi thiaj zoo li hais no thiab.
"Vim peb yeej paub los ntev lawm tias cov teeb meem lub cev rog muaj ceeb thawj no tsis yog tim caj ceg neeg xwb tab sis tam sim no peb yeej totaub lawm tias sib chab sib chaw tshaj ntawd, thiab tseem muaj ntau yam txuam thawj cuam tshuam txog txoj kev xav uas yuav ua rau yus nyiam noj los yog tiv thaiv kom yus txhob noj ntawd xyaw ntxiv rau thiab," raws li Dr. bode tau qhia.
Yog li cov kev noj zaub mov tsis muaj txiaj ntsim pab rau lub cev thiaj yuav ua rau tej neeg muaj mob ntev ntxiv tuaj xws li mob cuam tshuam txog tej plawv thiab hlab plawv, ntshav qab zib hom 2 los yog mob tau cancer ntawd.
Koj muaj peev xwm mloog tau zaj xov xwm "Tej zaum cov kev sim koj cov DNA yuav pab daws tau cov teeb meem muaj ceeb thawj thiab lub cev rog tau ntawm thiab zaj xov xwm qhia txog cov teeb meem tib neeg lub cev muaj ceeb thawj ntawm no
.
Twb tau tshaj li 30 xyoo no uas muaj Australia cov neeg lub cev rog thiab muaj ceeb thawj ntau tuaj ntxiv txog li 2 npaug lawm. Yog li lub 5 hlis ntuj xyoo 2018 no thiaj tau muaj lub koom haum Royal Australasian college of Physician tau nqua hu kom tsoom hwv teb chaws Australia yuav tsum tau muab cov kev tivthaiv thiab kev daws cov teeb meem lub cev muaj ceeb thawj thiab lub cev rog dhau heev no coj los ua ib cov teeb meem tseem ceeb yuav tau kub siab los daws kiag tam sim no. Ntxiv ntawd yuav tsum tsim kom tau ib cov tswv yim coj los tiv thaiv kom txhob muaj tej teeb meem no ntxiv uas siv tau thoob plaws rau lub teb chaws Australia no xws li yuav tsum tau tsub se rau tej zaub mov noj txom ncauj thiab tej dau haus qab zib, txwv tsis txhob pub tej me nyuam yaus los yog tej hluas yuav tau tej khoom noj khoom haus hais no yooj yim.
Dr. Helen Dixon ntawm lub chaw teeb txheeb Cancer Council Victoria kuj txhab ntxiv tias tsim nyog yuav tau hais kom tej tuam txhab tsim tej zaub mov thiab dej haus tsis muaj txiaj ntsim rau lub cev yuav tau los qhia rau tej neeg yuav tej khoom no noj thiab haus paub tias yog lawv noj ntau yuav muaj teeb meem dab tsi ru lawv lub cev thiab txoj kev noj qab haus huv.
"Peb paub tias yeej muaj cov kiab khws muaj tej zaub mov hais no tau siv cov tswv yim ntim tej khoom no, siv kob siv tsos, siv lus los yog siv duab coj los ntxias kom tej neeg yuav cov khoom no noj thiab haus. Tab sis peb cov kev tshawb fawb yeej txheeb tau ntxiv thiab tias peb muaj peev xwm muab lub tswv yim no tig coj los siv txhawg nqa kom tej neeg kub siab los noj tej zaub mov zoo muaj txiaj ntsim pab rau lawv lub cev tau thiab," Dr. Dixon tau hais li ntawd.#
