Raws li tau muaj cov kev teeb txheeb tshiab txog cov kho kab mob cancer, ces kuaj muaj kev cia siab kawg tias muaj ib hnub twg yuav kho tau cov kab mob cancer tab sis ntshe tseem yuav ntev heev txhua leej txhua tus mam siv tau tej kev kho mob no. Txawm li cas los, yog tia speb kub siab tswj peb txoj kev noj qab haus huv kom nyob cus plaws, noj zaub mov zoo muaj txiaj ntsim pab rau peb lub cev, nquag qoj ib ce thiab txhob haus dejcaw yaj yeeb ces tej zaum yuav muaj peev xwm tiv thaiv kom peb txhob tau cov mob cancer los yog txawm tau los yuav pab kom peb muaj txoj sia nyob tau ntev ntxiv tuaj. Tab sis tej zaum peb kuj yuav tau them qee cov nqe kho no thiab tsis hais cov tshuaj los yog cov kev kho mob qee yam vim tsoom hwv tseem tsis tau pom zoo tej tshuaj ntawd coj los siv los yog tseem tsis tau coj mus teev zwm nrog cov Pharmaceutical Benefit Scheme (PBS) ntawd.
Professor Bogda Koczwara uas yog tus coj lub chaw the Cancer Survivorship Research Group ntawm lub chaws teeb txheeb Flinders Centre for Innovation in Cancer, Flinders University tau qhia tias " yeej muaj pov thawj ntau zuj zus tuaj qhia tias yog peb kub siab tu peb lub cev li noj zaub mov zoo pab, nquag qoj ib ce thiab tso tseg cov kev haus dejcaw yaj yeeb tsis hais ua ntej los yog tom qab raug ntsuam tau cov kab mob cancer lawm, ces tej zaum kuj yuav pab kom peb txhob mob cancer los sis pab kom peb txhob mob cancer rov qab tuaj ntxiv tom qab phais tag, thiab tej zaum yuav pab kom peb zoo thiab tsis mob cancer ntxiv thiab muaj txoj sia nyob tau ntev ntxiv tuaj los kuj tau thiab.
Mloog tau Professor Bogda Koczwara cov lus interview ua lus Askiv tau ntawm no:
Professor Koczwara tshab txhais ntxiv tias '' tseem tam sim no yeej muaj cov kev kho tej kab mob cancer zoo zuj zus tuaj lawm, ces thiaj yuav pab kom tej neeg raug ntsuam tau tias tau kab mob cancer muaj txoj siab nyob tau ntev ntxiv tuaj thiab tej zaum kuj yuav muaj peev xwm kho tau kom lawv zoo ntawm cov kab mob cancer no. Tab sis tseem nyob ntawm seb peb ho cuj cuj pwm ua lub neej zoo pab rau peb lub cev zoo npaum li cas xwb thiab tom qab raug ntsuam tau cov mob cancer no."
Ntxiv ntawd los Professor Koczwara tseem qhia ntxiv tias " yeej muaj pov thawj tim khawv ntau zuj zus tuaj qhia tias cov cuj pwm noj zaub mov zoo, nquag qoj ib ce thiab tsis haus dej caw yaj yeeb ntawd yuav tau txais txiaj ntsim rau sawv daws tsis hais thaum tsis tau mob los yog tom qab raug ntsuam tau kab mob cancer tib si."
Tab sis zoo li Australia tej neeg zejzog yeej tsis tshua kub siab txog tsab xo no li, vim tseem muaj ntau yam txhuam thawj los cuam tshuam xws li, tej zaum cov hluas ntawd qaug zog tias ua li cas yus twb tswj yus lub neej kom noj tej zaub mov zoo, nquag qoj ib ce tab sis tseem tau tus mob no, los yog tej zaum lawv tsis muaj ib tug kws kho mob uas lawv mus ntsib mus cuag tas li, ces lawv thiaj qaug zog thiab xav tias xyov yus yuav nyob ntev npaum cas es kav tsij noj yam yus xav noj. Tab sis yog tias peb tsis xyuas kam noj kev haus zoo pab rau peb lub cev ces yuav ua rau peb muaj cov yam ntxwv mob ntev cuam tshuam ntxiv rau lub caij mob cancer ntawd tau thiab.
Tab sis cov kev raug txheeb tau kab mob cancer no tej zaum yuav muaj qhov zoo thiab qhov phem tib si.
Professor Bogda Koczwara hais tias "tej zaum cov kev raug txheeb tau cancer no yuav ua rau ib txhia kub siab tshaj qub txog lawv cov cuj pwm noj zaub mov zoo thiab nquag qoj ib ce ntau tuaj ntxiv pab rau lawv ntxiv, hos ib txhia ces khaws ntshai thiab ua rau lawv qaug zog tsis kub siab txog tej hais no lawm."
Txawm li cas los nws yeej zoo siab tias Australia yog ib lub teb chaws muaj cov kho mob zoo uas txhua tus pej xeem Australia muaj peev xwm siv tau, tab sis kuj muaj ib co txheej txheem yuav tau los txheeb xyuas thiaj paub tias yuav kho tus neeg mob ntawd qeeb los sai npaum li cas, ntxiv ntawd los tej zaum muaj ib txhia nqe kho cancer ntawd tej neeg mob yuav tau nrog them thiab.
Professor Bogda Koczwara tau qhia tias tsis ntev los no yeej tau muaj ib cov kev teeb txheeb txog thiab lees paub tej nqe kho mob cancer uas cov neeg mob cancer ib txhia yuav tau them qee yam thiab Vim tseem muaj qee yam tshuaj tseem tsis tau pub siv los yog tsoom hwv tsis tau coj los teev zwm nrog cov PBS.
Tab sis qhov tseem ceeb tshaj plaws n qhia tias tsis yog txhua tus neeg mob cancer yuav tau txais cov kev taw qhia kom paub coj tej cuj pwm ua lub neej zoo thiab paub tiv thaiv kab mob cancer los yog kom paub tias muaj pes tsawg hom kev kho mob thiab raug nqe yuav tau them li cas kom tej neeg mob no thiaj paub txiav txim siab seb yuav siv txoj xub ke twg los kho lawv cov mob cancer ntawd.
Professor Koczwara thiaj xav kom tsis yog tsuas los teeb txheeb txog tej nqe kho mob uas tej neeg mob cancer yuav tau them qee yam no xwb tab sis yuav tsum yog cov kev kho mob los nrog tswj nrog xyuas thiab nug tej neeg mob seb lawv xav li cas rau tej kev kho mob no thiab tej nqe es kom thiaj li paub npaj kom tau cov kev kho mob zoo thiab haum raws li tej neeg mob xav tau los pab rau lawv tau siv txuas ntxiv.
Professor Koczwara qhia ntxiv tias “Peb yeej ib cov txheej txheem zoo heev siv los ua tib zoo xyuas kom coj tau tej xov xwm tshiab coj los qhia rau Australia tej neeg mob no, tab sis kuv xav tias peb cov kev muaj peev xwm siv tau cov kev kho mob no sai thiab kho sai uas zoo tuaj no yog tej yam zoo heev, vim teb chaws Australia yeej yog ib lub teb chaws ntaus thawj hlo rau fab txuj tu thiab kho tau cov kab mob cancer no zoo tshaj plaws hauv ntiaj teb no."
Tham txog tias tom qab Australia tej neeg mob raug ntsuam tau tias tau kab mob cancer lawm ne ho yuav siv caij nyoog ntev npaum li cas thiaj raug coj mus kho ntawd ces Professor Koczwara hais tias "Yog tham txog xeev South Australia lawm, ces tej chaw tswj kev noj qab haus huv yeej kub siab los kho kom sai li sai tau tom qab raug ntsuam tau tus mob no lawm, tab sis kuj muaj cov txheej txheem sib txawv coj los siv rau ntau hom mob cancer thiab. Vim ib txhia cancer mas txheeb tau yooj yim hos ib txhia mas siv caij nyoog. Ntxiv ntawd tseem yuav tau txais kev kub siab ntawm tej neeg mob kub siab mus txheeb xyuas seb lawv puas tau hom mob cancer dab tsi thiab, yog thaum paub tej hais no tag lawm ces yeej kub siab los kho tej neeg mob no sai heev thiab. Yog li ntawd cov kev qhia kom tej neeg zejzog totaub thiab paub txog tej hais no thiaj tseem ceeb heev kom peb thiaj muaj peev xwm tswj tau cov kab mob cancer no, vim yeej muaj ntau hom mob cancer uas peb muaj peev xwm kho tau thiab yeej kho tau zoo heev."
Kawg no, Professor Bogda hais tias txawm tias Australia yuav muaj cov kev kho cov kab mob cancer no zoo npaum li cas los yog tias tej neeg tsis kub siab noj zaub mov zoo pab thiab tsis qoj ib cev los yog tsis tso tseg tej cuj pwm haus dej cawv thiab haus yaj yeeb ces ntshe yuav pab tsis tau dab tsi thiab.
