Xub Nib Xam Lis (Miss Sunisa Lee) yog ib tug ntxhais Hmoob ntawm xeev Minnesota lub Midwest Gymnastic Centre tau ua rau Hmoob tej neeg zejzog thiab teb chaws America zoo siab heev tom qab nws tau yeej ib cov npib kub thiab ib lub npib tooj los ntawm cov kev sib tw Jesolo (Italy) Trophy International Competition uas tau sib tw txij tim 28.2.2019-03.03.2019 dhau los no.
Nws yog tus tau yeej ntau yam ntawm nws pab uas sib tw tau zoo thiab ntawm ntiag tug uas sib tw tau zoo thiab thiaj ua rau nws tau 2 lub npib kub rau individual floor thiab cov bars hos yeej cov beam ces yeej npib tooj xwb raws li FloGymnastics tau qhia.
Sounisa Lis yog thawj tus ntxhais Hmoob raug USA Gymnastics xaiv mus sib tw sawv cev rau US National Gymnastic Team (TEAM USA) nrog cov kev sib tw Jesolo (Italy) Trophy International Competition uas tuaj muaj tsis ntev los no.
Sounisa hais tias nws kub siab thiab rau siab heev los xyaum kom tau zoo tshaj plaws, ces nws thiaj tau mus xyaum txhua hnub tom qab kawm ntawv txog thaum tav su ces yuav tau mus xyaum gymnastic txog ntua 8 thaus tsaus ntuj (8 pm) mam tau los tsev thiab yuav tau mus xyaum li no txhua txhua hnub txog ntua rau hnub zwj Hnub (Sunday) tib si thiab.
Sunisa Lee and the selection notification from USA Gymnastics to play for TEAM USA-John Lee Source: John Lee
Dua ntawm cov kev yeej lub khob khoom plig Jesolo trophy lub 3 hlis ntuj 2019 no lawm nws kuj tau yeej npib kub thiab npib nyiaj los ntawm cov kev sib tw Pacific Rim 2018 Gymnastic competition thiab.
Nws tau qhia rau SBS Hmong Program tias nws yeej tsis muaj sij hawm los yog tsis khoom mus ncig ua si nrog nws tej phooj ywg li vim yuav tau rau siab mus xyaum kom thiaj sib tw tau zoo.
Sunisa Lee's medals from Pacific Rim 2018 Gymnastic Competition - John Lee Source: John Lee
Saib tau Sunisa cov kev xyaum kev dhia pas txhos tau ntawm nod:
Sunisa tau qhia tias nws twb tau koom cov kev sib tw no los tau 9 lub xyoo lawm tab sis siv 5 xyoos diam nws mam tau los sib tw sawv cev rau USA National Team. Txawm li cas los nws qhia tias nws yuav rau siab xyaum kom tau zoo thiab tshaj lij thiab cia siab tias yuav tau mus koom cov kev sib tw Tokyo 2020 Summer Olympics thiab.
Hmong first athlete to play for USA National Gymnastic Team-John Lee Source: John Lee
"Sunisa Lis xav hais rau Hmong tej ntxhais tias tsis hais leej twg li, yog nyiam thiab xav mus koom cov kev sib tw gymnastic no ces xav kom ho mus sim thiab siv tag nrho yus lub dagzog tswv yim siab ntsws mus xyaum thiab sib tw, thiab tsis txhob tag kev cia siab thiab rau siab ntso ces yus yeej yuav ua tau txhua yam raws siab xav xwb."
Sunisa beam training session:
John Lis uas yog Sunisa Lis txiv tau qhia tias qhov nyuaj tshaj mas tsis muaj sij hawm los pab nws tus ntxhais vim yuav tau ua hauj lwm, thiab cov kev sib tw no los yuav tau mus mus los los tas mus li xwb, ces thiaj nyuaj heev rau lub sij hawm thiab nyiaj txiaj coj los pab nws tus ntxhais.
"Tag tej kev muaj yeej no tsuas yog nws tus kheej thiab nws cov kev rau siab nkaus xwb, vim cov kev sib tw no ces nws thiaj tsis muaj phoojywg coob. Rau qhov tom qab kawm ntawv tas lawm ces nws yuav tau mus xyaum cov gymnastic no. Yog li ntawd tam li yog nws niam thiab txiv ces yog nws nyiam cov kev sib tw no lawm ces kuv yeej yuav txhawb nws kom tsim nyog."
John Lis hais tias txawm muaj cov kev txhawb nqa thiab muaj nyiaj pab los yus tsis zoo mus thov los siv vim cuam tshuam txog lub teej kawm cov scholarship uas nws kawm ntawv thiab kawm thiab koom cov kev sib tw no. Tab sis muaj hmoo uas lub xeev Minnesota muaj Hmoob coob thiab muaj Hmoob tej lagluam coob uas tau txhawb nqa siab ntsws thiab nyiaj txiaj pab rau nws tus ntxhais ces thiaj muaj peev xwm mus koom tau cov kev sib tw no.
"John Lis xav qhia rau sawv daws tias-yog koj tej me nyuam tshaj lij rau ib cov kev sib tw twg los yog kawm tau ntawv zoo los yog ua tau ib yam dab tsi zoo, ces yeej tsim nyog peb yuav tau pab thiab txhawb lawv kom kawg siab kawg ntsws kom lawv thiaj ua tau yam lawv xav ua ntawd raws li qhov tsim nyog. Kuv phaum ces tej laus tsis paub txog tej no thiab txawm muaj Hmoob tej hluas coob tus muaj peev xwm los yeej tsis tshua tau txais kev txhawb nqa pes tsawg. Yog li kuv thiaj xav hais kom tej ua nim ua txiv yuav tsum txhawb lawv tej me nyuam yog tias tus me nyuam ntawv tshaj lij rau ib fab txuj twg ntawd."
