America cov kev xaiv tsa nrab xyoo dhau los no yeej tau pom muaj ntau tsav neeg tsis hais yog neeg Asian, Africa thiab cov neeg Hispanic los yeej tau yeej cov kev xaiv tsa los koom nrog America pab nom Democrats thiaj pab kom nws tau yeej lub tsev tseem hwv qes (Lower House or the House of Representative) lawm.
Hais txog ntawm Hmoob tej neeg zejzog ces kuj muaj 15 leeg mus koom sib tw cov kev xaiv tsa nrab xyoo no thiab muaj 11 leeg yeej lawm, Samantha Vang kuj yog ib tug ntxhais Hmoob ntawm coob tus Hmoob muaj yeej rau cov kev xaiv tsa no los tswj lub rooj nom 40B, Brooklin Park, Minneapolis ntawm xeev Minnesota lub tsev tsoom hwv qes lawm thiab. Feem ntau yog cov nyob rau xeev Minnesota thiab qee tus nyob xeev California.
Samantha Vang hais tias feem ntau Hmoob tej ntxhais loj hlob thiab yeej raug cob qhia kom mloog hais thiab mus ua tau ib tug zoo nyab xwb, tab sis nws ho xav txawv thiab hais ntxiv tias dua ntawm tej kev ua nyab ntawd lawm los nws yeej xav ua kom tau ib yam dab tsi tsim nuj li tej txiv neej ua thiab nws pom tau tias kev kawm txuj ci thiaj yuav tsim tau tej cib fim zoo ntau yam rau yus.
Ms Vang kuj tau kawm tiav rau fab lis laj fai kum xeeb thiab nws yeej tau siv lub sij caij nyoog los lis dej num pab tej koom haum zejzog, los qhia ntawv thiab yeej tau muaj feem koom rau tej laj fai kum xeeb rau lub caij nws tseem kawm high school thiab yeej tau loj hlob ntawm lub xeev Minnesota thiab pom tau txog tej neeg zejzog lub neej txom nyem uas tseem plam ntau yam txiaj ntsim tsis tau txais kev pab cuam raws li qhov tsim nyog. Ntxiv ntawd los nws kuj tau pab Jay Xiong cov kev nrhiav suab xaiv nom dhau los lawm thiab.
Txawm tias nws yeej ib txwm tsis xav tias muaj ib hnub yuav los sib tw ua ib tug nom, los vim yog tau txais kev txhawb nqa los ntawm tej neeg zejzog thiab tej koom haum thiab ho yog ib lub rooj nom npuab rau Jay Xiong lub rooj nom thiab ces nws thiaj txiav txim siab los sib tw lub rooj nom Brooklyn Park no thiab tau yeej lub rooj nom no los ua ib tug nom sawv cev rau pej xeem ntawm tsev tsoom hwv qes (Lower House) ntawm Minnesota lawm.
Nws qhia tias nws muaj ntau cov hom phiaj xws li xyuas kom txhua tus tau txais vaj huam sib luag rau kev kawm txuj ci, los nrhiav hauj lwm rau tej neeg ua thiab pab tej lagluam kom zoo, pab kom tej neeg muaj peev xwm yuav tau vajtse nyob yooj yim dua tuaj ntxiv thiab los tswj tej teeb meem ib puag ncig kom zej tsoom tau txais kev noj qab nyab xeeb.
Samantha Vang hais tias txawm yus txawj ntse npaum li cas ua tau lagluam pab nrhiav hauj lwm rau tej neeg ua thiab kawm tau ntawv zoo, pab nom tswv ntau yam los yog yus tsav neeg tsis muaj ib tug nrog luag koom ua nom ces luag yeej tsis kub siab txog yus tej zejzog yog li ntawd nws thiaj xav los sib tw lub rooj nom no kom thiaj li muaj peev xwm ua tau tej dej num nws tau cog lus yuav los pab tej neeg zejzog.
Tham txog cov lus taw qhia rau Hmoob ib tsoom hluas los yog Hmoob communities thoob ntuj uas xav los koom ua laj fai kum xeeb (Politics) ces qhov tseem ceeb tshaj plaws Samantha Vang xav kom ua yog yuav tsum tau rau siab kawm txuj kawm ci, ntixv ntawd tej ua niam ua txiv yuav tsum kub siab txhawb nqa yus tej tub kis kom kawm tau zoo. Yus yuav tsum tau los txheeb xyuas seb yus muaj lub tsav peev xwm rau fab txuj dab tsi ces ua hom yus tshaj lij ntawd. Ntxiv ntawd los yuav tsum tau mus muaj feem koom ua hauj lwm yeem thaj pab tej koom haum zejzog los yog npaj tej dej num kom ua tau tej yam yus xav ua rau yav pem suab ntawd ntxiv kom thaum lub caij nyoog zoo los txog yus thiaj npaj tau txhij yuav los lis txoj dej num yus xav ua ntawd.#
Yog koj xav sib txuas lus nrog Samantha Vang ces mus txheeb xyuas tau ntawm nws lub koom haum lub vassab los sis yog mus nrog nws sib tham tau ntawm nws #
