SBS Radio Hmong Program tau nrog Kim Saub Yaj uas yog ib tug neeg ntawm ib cov cub yim neeg Hmoob uas yog neeg thoj nam dhau los uas tseem tau cov ntaub ntawv bio-data sheet (BV) uas United Nation High Commission for Refugee (UNHCR) ua rau cov neeg thoj nam lub caij xyoo 1970s txog rau xyoo 1990s ntawm yeej thoj nam zos Vib Nais (Ban Vinai Refugee Camp at ParkChome, Loei, Thailand), uas yeej qhia tias nws yog cov neeg thoj nam Hmoob uas yeej nyob ntawm yeej thoj nam zos Vibnais thaum kaw lawm mam mus nyob ntawm yeej thoj nam Napho Refugee Camp thiab thaum raug kaw ntxiv thiab mam li los nyog rau ntawm vaj loog tsua (Tam Krabok, Saraburi Province, Thailand) ntawm Teb chaws Thaib tam sim no.
Nws tau hais tias kuj nrhiav tau hauj lwm ua yoog yim thiab yog tias ua hauj lwm cuam tshuam txog tej qoob loos li mus dob zaub, khawb txiv laum huab xeeb, thiab de taum ntawm lub xeev Saraburi. Tab sis kuj mus los tsis tau yooj yim vim tsis muaj ntaub ntawv tso cai thiab nyuaj nyuaj nrog tej tub ceev xwm tham lus thaum ntsib lawv li. Kim Saub Yaj tau hais ntxiv tias, kev mus thov tej ntaub ntawv qhia tias yus yog cov neeg nyob ntawm Wat Tam Krabok no xwb los yeej thov nyuaj thiab tsis yooj yim li.
Kim Nom Tub Lauj uas yog Kim Saub Yaj tus yawm yij uas yog ib tug Hmoob nyob hauv vaj loog tsuas thiab kuj tau hais tias nws kuj hnov tias muaj Hmoob ntawm vaj loog tsuas tawm mus nyob txawv xeeb coob kawg thiab sawv daws los kuj khwv noj khwv haus tib yam li tej Hmoob nyob txawv teb chaws uas nrhiav tau hauj lwm dab tsi ces ua yam hauj lwm ntawd xwb thiab.
Muaj ib zaug Kim Saub Yaj tau mus hais kom tus coj zos ua ntawv tias nws nyob ntawm no kom nrhiav tau hauj lwm ua xwb lawv twb tsis kam ua rau nws.
Tej neeg zejzog Thaib yeej tseem pom tau tias cov cuab yim Hmoob nyob ntawm Wat Tham Krabok yog ib cov neeg txawv teb chaws nyob tsis raug kev raug cai. Tab sis tos lawv ho nyob tau ntawm lub zos vaj loog tsua no los vim muaj nom tswv Thaib ntawm lub tuam chav tswj kev ruaj ntseg haiv (Thai Interior Ministry) thiab UNHCR ua tus pab thiab coj lawv los nyob rau thaj chaw no, vim tsis muaj lwm qhov chaw lawm. Tab sis lawv yuav tsum tsis txhob ua txhaum cai ua rau lub Wat no poob ntsej muag ces lawv yuav raug tshem tawm thiab tsis tau nyob ntawm no ntxiv lawm.
Tab sis Kim Saub Yaj yeej tau qhia tias nom tswv zejzog yeej hais tias cov cuab yig Hmoob uas tau nyob ntawm Wat Tam Krabok no muaj Hmoo kawb, thiab kuj tau hawv hem rau lawv tias tej zaum ntshe yuav muab cov Hmoob no xa rov qab mus rau Nplog. Yog li ntawd Kim Saub Yaj thiaj tau hais rau lawv tias kom tsis txhob ua li ntawd rau cov Hmoob no, vim yav dhau los nom tswv Thaib yeej tau muab ib txhia Hmoob xa rov qab rau Nplog thiab ib txhia yeej raug rau txim thiab hnov xov xwm phem txog lawv.
"Peb yeej raug txwv tsis pub mus tau los yooj yim', raws li Kim Saub Yaj tau hais. "Yog tej yam tsis yooj yim rau peb yuav mus ntawm ib qhov chaw rau lwm qhov chaw kiag li, yog peb tsis tau ntaub ntawv tso cai los ntawm nom tswv ces kuj ntshai tsam mus ntsib tub ceev xwm ces nyuaj nyuaj hais lus li. Yav dhau los yeej muaj nom tswv tuaj txheeb xyuas seb puas tsim ib cov ntaub ntawv rau peb siv tab sis txij ntawd los ces ntsiag to lawm xwb. Peb tsis hnov ntab ntws tias zoo li cas ntxiv li lawm. Ces thiaj tsis paub tias xyov lawv puas ua npav rau peb siv? Yeej tsis muaj leej twg paub li," raws li Saub Yaj tau hais.
Hmoob tej me nyuam kuj tau cov npav "Zero Card" kom lawv mus kawm ntawv tau tom tej teej kawm zejzog, tab sis peb yeej tsis tau txais kev tso cai mus txawv xeev rau lwm lub xeev hauv teb chaws Thaib li. Ntxiv ntawd los thaum cov me nyuam Hmoob no mus kawm ntawv ces tej lees kais tseem tau hais kom muab lawv cov npe Hmoob pauv hloov siv npe Thaib txuam nrog lub xeem Hmoob lawm uas txawv lub npe teev hauv daim BV uas UNHCR ua rau lawv siv lawm thiab ces thiaj haj yam cov nyom thiab nyuaj tuaj ntxiv.
"Muaj ib zaug, kuv txiv xav thov ntawv ntawm nom tswv zejzog rov qab mus xyuas peb pog lub ntxa ntawm yeej thoj nam zos Nasphaus, Nakhon Phanom, tab sis nom tswv Thaib tsis kam thiab tsis tso cai rau peb mus xyuas." Saub Yaj hais li ntawd.
Thaum nug nws tias ua li cas cov neeg thoj nam Hmoob feem coob twb mus txawv teb chaws rau cov teb chaws vam meej tag lawm los yog tsim mus nyog lwm qhov hauv Thaib teb tag lawm ua li cas lawv pheej tseem nyob hauv vaj looj tsua no ces, Saub Yaj hais tias vim lawv tsis xav mus qhov twg thiab xav nyob hauv Thaib teb no xwb ces thaum kawg Ministry of Interior thiab UNHCR thiaj muab lawv coj los nyob ntawm vaj loog tsua (Wat Tam Krabok) no lawm. Saub Yaj hais tias thaum yeej thoj nam ntawm zos Naphao, NakhonPhanom raug kaw rau xyoo 2004 lawv thiaj los nyob ntawm vaj loog tsuas lawm. Thiab nom tswv Thaib mam li nrog xyuas seb yuav ua li cas ntxiv lawm xwb.
SBS Radio Hmong Program tau hu nrog Thaib lub tuam chav tswj kev ruaj ntseg (Thai Interior Ministry) tham seb lawv puas tawm tswv yim dab tsi tab sis lawv tsis muaj neeg kam los hais dab tsi li.
SBS Radio Hmong Program kuj tau sib txuas lus nrog UNHCR tus kis tswj xov xwm ntawm Thaib teb tham thiab nws mam li teb rau lub plua ntxiv tom ntej no.
Kim Saub Yaj tau hais tias lawv yeej tsis tau mus ntsib los yog sib txuas lus nrog nom tswv Thaib los yog UNHCR, koom haum Hmong Bangkok Associate and Network los yog koom haum Hmoob Thaib li, vim tsis paub tias xyov yus thov ne lawv puas pab cuam li cas.#
Koj muaj peev xwm mloog tau cov xov xwm ua lus Hmoob thiab lus Askiv tau ntawm lub vas sab thiab download tau tej xov xwm kaw ua suab (Podcasts) tau ntawm lub vam sab and thiab taut ua tub koom sib nrog xov tooj cua SBS Hmong Program tau haul Facebook ntawm . Tuaj nyem nyiam (Click like us), share tej xov xwm ray koj tej phooj ywg mloog los yog koom tawm tswv yim thiab qhia koj zaj dab neeg rau xov tooj cua SBS Radio Hmong Program tshaj tawm rau ib tsoom Hmoob thoob qab ntuj tau mloog. Yog koj xav nrog cov neeg ua hauj lwm ntawm SBS Radio Hmong Program tham ces hu tau rau tus zauv xov tooj +61 3 9949 2259 los sis xa xov rau +61 42 999 6263.
