Raws li lub koom haum Rabobank cov kev tshawb fawb tsis ntev los no tau qhia, cov neeg uas pheej yiam yuav koom noj khoom haus hauv online thiab nyiam siv cov services xav zaub mov li Deliveroo thiab UberEats yog cov neeg uas nkim zaub mov pov tseg ntau dua. Hos cov tsis siv cov services no feem ntau yog cov baby boomers yog cov tsis tshua nkim zaub mov pov tseg.
Cov laj thawj tseem ceeb uas cov kev tshawb fawb no txheeb tau thawj yam yog tseem tsis tau noj tej khoom yuav tau los ntawd tab sis twb tsw qaub los yog tsis zoo noj lawm, ob tuaj ces vim yog peb yuav ntau heev los yog ua ntau heev noj tsis tag thiaj nkim pov tseg.
Tab sis lub koom haum OzHarvest uas pab cuam zaub mov rau tej neeg txom nyem noj cav tias tsis muaj tseeb li hais thiab tsis yog tim cov neeg yug rau lub caij xyoo 1981 txog ntau ntxov xyoo 1996 yog cov nkim zaub mov, vim yeej muaj tej teeb meem no los ntev ua ntej lawv yug lawv lawm.
Txawm li cas los lub koom haum Rabobank uas qev nyiaj rau cov neeg yaj sab yeej xav tias yuav tsum yog tag nrho txhua leej txhua tus yuav tau los daws cov teeb meem no, pib txij li cov neeg cog qoob loo, cov xa tej qoob loo, cov khw muag tej khoom noj thiab qoob loo, cov khw ua zaub mov noj, tej cuab yig mus txog tej neeg uas noj tej khoom noj no yeej muaj feem yuav tau los nrog tswj thiab xyuas thiab tiv thaiv kom txhob pub nkim zaub mov pov tseg, vim muaj neeg coob tuaj ntxiv hauv ntiaj teb no lawm. Yog peb tsis kub siab los nrog xyuas ces yuav ua rau muaj teeb meem rau ntiaj teb ntau lub teb chaws thiab yuav ua rau muaj teeb meem rau tej ib puag ncig.
