Australia cov kws teeb txheeb ntwam lub chaw teeb txheeb QIMR Berghofer Medical Research Institute tab tom sim ntiaj teb thawj cov kev teeb txheeb uas coj cov kab mob malaria ntawm yoov tshaj cum coj los hno rau cov neeg ua yeej nyob cus plaws seb cov tshuaj tshiab lawv tsim tau los puas muaj pev xwm tiv thaiv kom cov kab mob malaria no txhob kis tau ntxiv rua lwm tus neeg.
Twb tau muaj cov neeg tshaj 300 tawm leej tau mus koom cov kev teeb txheeb no ntawm nroog Brisbane lawm.
Txawm li cas los zes kais (Professor) Sir Richard Feachem uas yog tus koom tsim tsa lub koom haum Global Fund to fight AIDS, TB and Malaria thiab yog tus coj ntawm lub koom haum the Lancet Commission on Malaria Eradication tua qhia tias vim tseem muaj ib cov kab mob malaria uas kis ntawm cov liab nyob ntawm cov teb chaws South East Asia uas tau kis mus rau India, South Asia thiab Africa tam sim no lawm. Tab sis vim tias tej tshuaj siv tam sim no kho tsis tau cov kab mob no lawm ces thiaj ntshai tsam cov kab mob no yuav ua rau neeg ntau roob tus tas sim neej tau.
Senior Scientist Professor James McCarthy uas yog ib tug kws paub zoo txog cov kab mob sib kis thiab yog ib tug kws teeb txheeb ntawm lbu chaw teeb txheeb QIMR Berghofer Medical Research Institute tau hais tias:
"Yog li peb thiaj xav nrhiav ib lub tswv yim tshiab coj los tiv thaiv kom cov kab mob malaria no txhob kis tau ntxiv, vim peb yeej ib txwm tua tej kab mob malaria parasite uas twb nyob hauv tej neeg lub cev ua twb ua rau lawv mob lawm xwb, tab sis yog tias peb ho muaj peev xwm txo kom cov kab mob malaria parasite no txhob kis tau rau cov yoov tshaj cum thiab, ces peb kuj muaj peev xwm tiv thaiv tau kom cov kab mob no txhob kis rau lwm tus ntxiv lawm thiab ces txhais tau tias peb tua tau cov kab mob no lawm los yog kho tau lawm. Yog li thiaj yog ib lub tswv yim tshiab coj los tawm tsam kom cov kab mob malaria no sawb lawj los yog ploj kiag mus txhob muaj ntxiv lawm."
Yog li ntawd tom qab uas tej neeg tau mus koom sim cov kev teeb txheeb no, ces cov tshuaj muaj peev xwm tua tau cov malaria parasite uas kis mob thiab tsim kev mob nkeeg rau lwm tus tau lawm, tsuas tshuav cov me nyuam cab malaria uas tsis muaj zog lawm xwb. Ces thiaj yog ib cov kev teeb txheeb ua tau zoo thiab muaj kev cia siab heev.
Professor James McCarthy los yeej coj nws pawg kws teeb txheeb mus koom ntiaj teb thawj lub rooj koom txheej tham txog cov kab mob malaria ntawm Melbourne uas lub koom haum World Malaria Congress uas tus teeb tsa thiab ua tswv cuab ntawd pib txij hnub tim 1-5/7/2018 no ntawm Melbourne Exhibition Centre, uas yuav muaj tej kws teeb txheeb, cov kev teeb txheeb, tuaj qhia txog cov kab mob no, tuaj hloov tswv yim sib sab laj seb puas tau tswv yim tshiab coj los siv tawm tsam nrog cov kab mob malaria no txuas ntxiv rau lub neej tom ntej li cas ntxiv.
Tom qab tau muaj tsov rog ntiaj teb zeeg 2 dhau los lawm, Australia yeej yog ntiaj teb ib tug coj tseem ceeb uas rau siab rau fab kev teeb txheeb txog cov kab mob malaria no. Thiab pib txij li thaum lub caij xyoo 1960s los ces Australia yeej yog lub teb chaws uas tsis muaj cov kab mob malaria uas yoov tshaj cum tom kis mob rau tej neeg ntxiv li lawm. Tab sis nyuam qhuav lub hli dhau los no xwb, teb chaws Paraguay los kuj tau tshaj tawm tias nws lub teb chaws tsis muaj cov kab mob malaria no ntxiv li lawm, nrog rau ntau lub teb chaws ntxiv thiab xws li Algeria, Argentina thiab Uzbekistan.#
Listen more news in Hmong and English at SBS Radio Hmong Program on Thursday at 6pm AEDT-Australian Eastern Standard Time and Sunday at 11 am AEDT.
You can download SBS Radio App from App Store at and from Google Play at or you can download podcasts news in Hmong and English from.
Besides, you can follow us, click like, share and comments at #SBSHmong website at
Call to have a chat with SBS Radio Hmong Program on + 61 3 9949 2259 or sent your comments to .
