Tsis ntev los no Australia cov passport kuj raug coj los teev zwm ua ib cov passport zoo tshaj plaws hauv ntiaj teb no lawm thiab.
Tam sim no ces nom tswv Australia yeej qhia tias tseem muaj neeg txog li 189,000 tus tseem tab tom tos nom tswv txheeb lawv tej ntaub ntawv xav mus thov xeem ua pej xeem Australia, txawm tias tus nqe ua passport tau nce ua $282 rau lub 1 hlis ntuj xyoo 2018 no lawm.
Yog li peb ho mus txheeb xyuas seb cov teb chaws twg thiaj yog cov teb chaws muaj passport zoo tshaj siv.
Raws li lub koom haum Henry and Passport Partners cov kev teeb txheeb the Henry Passport Index uas nws tau cov xov xwm los ntawm lub koom haum Tranport Aviation Authorities ces nws kuj tau los teev xwm tias ntawm tag nrog 199 cov passport thiab 227 thaj chaw ntawd tsuas muaj 21 lub teb chaws thiaj muaj cai mus ncig tau rau lwm lub teb chaws yas tsis tas thov visa los yog tsis tau them nqe dab tsi xwb.
Ntawm cov list the Henry Passport Index no Australia tau thib 7th thiab Australia muaj cai mus ncig xyuas tau cov teb chaws txog li 183 lub yam tsis tas thov los siv visa thiab tsis tau them nqe dab tsi li.
Tos li ntawd los vim lwm teb chaws pom tias Australia yog ib lub teb chaws zoo, ntxiv ntawd los nom tswv Australia kuj tau kho nws cov passport thiab tso 123 cov security code rau daim passport kom txhob muaj neeg qog ua tau raws qab tom qab nom tswv Australia tau khom nws tsab cai tswj kev ruaj ntseg rau xyoo 2014 dhau los lawm raws li Dr. David Bierman ntawm University of Technology Sydney tau qhia.
Teb chaws Japan yog lub teb chaws cov passport muaj fwj chim tshaj plaws thiab txeeb tau thib ib hauv ntiaj teb no los ntawm teb chaws Singapore uas tam sim no tau thib 2 lawm xwb, ces thiaj ua rau Japan mus xyuas tau 190 lub teb chaws hauv ntiaj teb no yam tsis tas thov visa siv los yog tsis tas them nqe dab tsi lawm.
China tau thiv 71 hos United Arab Emirates (UAE) tau thib 21 tom qab 2 lub teb chaws no tau muaj kev koom tes lagluam tsis ntev los no lawm.
Tony Le Nevez uas yog tus coj lub koom haum Henley Partners Australia hais tias dua ntawm cov kev musj tej passport zoo thiab muaj fwj chim no pab kom yus mus tau txawv teb chaws yooj yim lawm tej passport no tseem pab kom yus tau txais lwm yam txiaj ntsim nro thiab.
Le Nevez tshab txhais tias yog ib lub teb chaws muaj peev xwm sib khom nrog lwm lub kom nws mus tau rau lub teb chaws ntawd yam tsis tas thov visa siv li ces yuav tau txais txiam ntsim fab lagluam vim yuav ua rau mus los tau yooj yim thiab ua tau lagluam komt shwm sim li Suav tuam tshoj uas yog ib lub teb chaws tseem ceeb tau mus nqes peev lagluam loj heev rau lub teb chaws United Arab Emirates ntawd lawm.
Txawm li cas los txhua lub teb chaws nyias yeej muaj nyias cai los tswj tias seb pub visa rau leej twg tuaj ncig tuaj xyuas tau yus lub teb chaws.
Australia yeej cia li mus xyuas tau Suav yam tsis tas siv visa thiab tsis tau them nqe dab tsi, tab sis cov neeg Suav 1.4 roob tus uas tuaj ncig xyuas Australia txhua xyoo yuav tsum thov visa thiab yuav tsum tau them nqe visa txog li $140 diam, thiaj ua rau Dr. David Beirman hais tias tsis ncaj rau Suav lawm thiab tsim nyog Australia yuav tau kho kom zoo tshaj no rau 2 tog.
Dua ntawm lwm teb chaws pom tias yus yog ib lub teb chaws zoo thiab yus cov passport zoo muaj fwj chim lawm, yog yus tseem sib khom thiab muaj kev sib raug zoo nrog lwm lub teb chaws thiab ces yuav tau cov visa siv yooj yim ntxiv thiab.
Hais txog cov teb chaws Southeast Asia lawm ces Singapore tau thib ib tab sis ho tau thib 2 hauv ntiaj teb no xwb tom qab uas Japan txeeb tau thib ib hauv ntiaj teb no ntawm nws lawm vim Japan muaj peev xwm mus xyuas tau Phabmab xyoo no yam tsis tas thov visa lawm.
Thaib tau thib 68 thiab mus xyuas tau 77 lub teb chaws, Nplog tau thib 89 thiab mus xyuas tau 52 lub teb chaws hos Cob tsib tau thib 90 thiab mus xyuas tau 51 lub teb chaws yam tsis tas thov visa siv.
Hos cov teb chaws Afghanistan, Iraq, Russia, India, Pakistan, Sudan thaib Saudi Arabia ces tseem yog ib cov uas teb chaws Australia tseem txwv ib txhia neeg tsis pub thov tau visa tuaj xyuas Australia yooj yim.
Txawm li cas los Afghanistan thiab Iraq kuj tau raug coj los teev zwm rau cov Henley Passport Index vim nkawv muaj cai mus xyuas tau 33 lub teb chaws yam tsis tas thov visa siv los yog mus txog chaw mam thov visa siv xwb.
Russia tau poob mus ua thib 47 lawm xwb txawm nws mus xyuas tau Taiwan rau lbu 9 hlis dhau los no yam tsis tas thov visa lawm.
Germany ces tau thib 3 thiab mus xyuas tau ntiaj teb 188 lub teb chaws tib yam li teb chaws Fabkis thiab South Korea.
Hos teb chaws America (US) thiab Askiv (Britain) ces tau thib 5 tib yam li cov teb chaws Norway, Austria, Luxembourg, Netherlands thiab Portugal lawm xwb.#
