Dr Asmaa Gundru ntawm lub koom haum MyHealth Medical Centre Helenvale ntawm nroog Brisbane, xeev Queensland tau qhia tias tau muaj cov kev teeb txheeb tshiab tau qhia tias kev muaj ceeb thawj ua rau tsis tau dab ntub thiab muaj lwm yam mob tau. Tab sis cov teeb meem ua tsis tau pa (sleep apnoea) ho yog cov teeb meem dab tsi, muaj cov yam ntxwv zoo li cas, thiab peb ho yuav tswj li cas los yog ho puas muaj txoj hauv kev pab kho tau? Peb ho yuav nrhiav xov xwm thiab kev pab cuam tau qhov twg ntxiv?
Dr Gundru hais tias tau muaj cov kev teeb txheeb tshiab qhia tias muaj Australia cov neeg muaj ceeb thawj txog 2 feem 3 tsis tau zoo pw thiab muaj ib tug ntawm peb tug neeg no ua tsis tau pa thaum pw hmo ntuj. Tab sis qhov ua rau sawv daws xav paub tshaj ntawd ntxiv mas tseem muaj cov neeg no yuav laug txog li 40% yeej tsis paub tias lawv muaj cov teeb meem no los yog yeej tsis tau ua ib yam dab tsi coj los daws tej teeb meem no li thiab, vim lawv tseem xav tias xyov puas muaj kev pab tau lawv.
Dr Asmaa Gundru hais tias tej zaum kuj yog tej neeg no tseem tsis tau paub tias lawv muaj cov teeb meem pw tsis tsaug zog thiab tsis tau dab ntub txaus no thiab los kuj tau. Tseem muaj ib txhia xav tias tej zaum lawv yeej ib txwm pw li no ces tsis muaj dab tsi. Ces lawv thiaj tsis ua ib yam dab tsi los txheeb los pab lawv daws tej teeb meem no li.
Tab sis Dr Gundru yeej tau qhia tias muaj ntau yam ua rau muaj cov teeb meem tsis tau pw txaus los yog ua tsis tau pa no thiab, xws li tej zaum yog tim muaj teeb meem cuam tshuam rau lub qob ntawm caj dab, tej zaum yog tim noj ntau yam tshuaj, tej zaum yog tim poj niam tsis coj nkaub ncaws ntxiv tom qab tsis yug me nyuam ntxiv, tej zaum kuj yog tej cuj pwm ua lub neej los yog tej ib puag ncig yog cov tsim tej teeb meem no.
Cambridge weight plans -obesity and sleep - MediaCast Source: MediaCast
Nws qhia ntxiv tias yeej txheeb tsis tau tej teeb meem no yooj yim vim yeej tsis tshua pom tej yam ntxwv ntau. Tej zaum kuj yuav tau coj kiag tus neeg ntawd mus sim pw rau ib chav kiag es soj seb nws ho pw li cas es thiaj paub tias yog tim dab tsi thiab thiaj paub nrhiav tswv yim los daws cov teeb meem ntawd kom tus neeg ntawd thiaj tau pw zoo dua tuaj ntxiv xwb.
Tej cuj pwm ua lub neej li pheej haus dej haus cawv tas mus li, thiab haus rau lub caij ua ntej yuav mus pw, los yog ho haus kasfes ua ntej yuav pw nrog thiab tseem ho saib xov tooj, tablets los yog saib TV ntev heev ua ntej yuav pw thiab ces thiaj ua rau yus pw tsis tsaug zog.
Thiaj ua rau yus sawv los lawm los zoo li pw tsis tau txaus yees, tseem ua mem mus qus, ua qhov twg los tsis nquag tsis cus, tseem tsaug zog nris thaum nruab hnub, cim xeeb nco tsis zoo, thiab tsis qab siab ua hauj lwm los yog pheej rua los. Vim tau hais no thiaj ua rau tus neeg ntawd tsis muaj peev xwm yuav siv tau nws lub cev kom tau hauj lwm raws li qhov tsim nyog.
Dr Asmaa Gundru tshab txhais tias Sleep apnoea ces yog ib cov yam ntxwv uas ib tug neeg pheej ua pa tsis nto, txog siav los sis tej zaum lub raj cua txhaw li ntau ntiag tiv mam rov ua tau pa dua. Cov xwm txheej no tau ua rau yus lub hlwb ceeb toom rau yus lub cev kom sawv thiaj ua tau pa, ces kuj ua rau sav dab ntub tsis tau zoo pw lawm thiab.
Ntxiv ntawd, yog muaj cov xwm txheej zoo li no lawm ces tseem ua rau yus tsis tau cov cua oxygen mus pab cov ntshav liab yug yus lub cev thiab. Ces tej zaum yuav ua rau muaj ntshav siab, ua rau mob plawv, mob ntshav qab zib los yog ua rau mob stroke tau. Vim thaum tsis tau dab ntub txaus lawm ces muaj cov hormone ua rau lub hlwb pheej xav noj tej zaub mov thiab khoom daws piam thaj thiab qab zib ntau. Ces qhov no yuav ua rau muaj lwm yam mob ntev (Chronic diseases) tau ntxiv thiab. Yog li Dr Gundru thiaj xav kom peb yuav tsum tau kub siab los xyuas kom thim tau tej yam ntxwv los yog thim tau tej cuj pwm no kom thiaj tsis txhob muaj teeb meem rau peb.
Dr Asmaa Gundru xav kom tej neeg tham thiab kom paub txog cov teeb meem tsis tau pw txaus no rau lub caij ntiaj teb hnub pw (World Sleep Day-15 March) dhau los no coj los qhia kom sawdaws paub txog cov teeb meem no.
Nws qhias tias muaj 3 txoj xub ke los daws cov teeb meem no. Thawj 2 yam ces yog siv cov mouth guard thiab CPAP machines tus tus neeg ntawd yuav tau coj, coj los pab rua me ntsis qhov ncauj los yog rua txoj hlab cua com khoob es thiaj ua taus pa. Ntxiv ntawd ces yog yuav tau ntsib thiab cuag cov kws paub zoo txog cov teeb meem no thiab tej zaum kawg mus phai pob qa kom ua tau pa xwb. Tab sis nws yeej xav kom xub siv thawj 2 lub tswv yim ua ntej tso. Txawm li cas los tseem yuav tau siv cov kev noj zaub mov zoo muaj txiaj ntsim thiab exercise pab ntxiv thiab, mas thiaj li yuav daws tau tej teeb meem no. Vim tej hauv kev no tsis yog ib hau kuab muaj tsuas muaj hwjhuaj uas yuav cia li kho thiab daws tau tej teeb meem no zoo tu qab kiag.
Thaum kawg Dr Asmaa Gundru xav kom tej neeg ho mus sim teb ib cov lus nug 8 nqe hu ua es seb ho puas pab tau kom yus tau zoo tsaug zog thiab tau dab ntub zoo dua qub tuaj ntxiv. Txuas ntxiv ntawd, nws kuj xav kom sawv daws mus txheeb xyuas tej xov xwm ntau yam qhia txog cov teeb meem sleep apnoea uas yog cov teeb meem ua tsis tau pa thaum pw ntawm 2 lub koom haum cov vam sab uas yog thiab ntawd ntxiv.
