Lub koom haum Cancer Council tsab ntawv cej luam tshiab thiaj hais tias cov kev haub tau yaum thiab tej tswv yim ua kiab khw lagluam ntawm tej dej haus uas tsis yog cawv ntawd yog ib co tswv yim pab kom Australia tej hluas swm rau tej ntxhiab cawv thiab npaj kom lawv haus cawv rau thaum lawv muaj hnoob nyoog los yog ua kom lawv haj yam haus cawv ntau tuaj ntxiv.
Tab sis lub koom haum Alcoholic Beverages Australia tsis pom zoo nrog tsab ntawv cej luam tshiab no thiab hais tias lub sij hawm ntau caum xyoo los no yeej muaj Australia tej hluas nto nkauj nto nraug txog li ib nrab tsis haus dej haus cawv lawm.
Yog li ntawd Dr Leon Booth uas yog tus coj cov kev teeb txheeb txog tej dej haus tsis yog cawv ntawm lub chaw teeb txheeb George Institute for Global Health thiaj hais tias ''80 feem puas ntawm tej hluas tau koom cov kev teeb txheeb no yeej tau pom tej dej haus raug coj mus haub tau yaum hauv tej social media, local media, hauv tej supermarkets, uas nws txhawj tias tsam yuav ua rau tej hluas swm rau tej ntxhiab cawv thiab tig los haus cawv los yog haj yam haus cawv ntau tuaj ntxiv.''
Tsis tas li ntawd los Julia Stafford uas yog tus lwm coj ntawm lub koom haum Cancer Council uas tswj cov hauj lwm Nutrition, Alcohol thiab Physical Activity Committee los yeej hais tias ''tej tuam txhab lagluam cawv loj yeej tsim tej dej haus uas tsis yog cawv zoo sib xws li tej dej caw tiag los yog tej ntxhiab dej yeej qab sib xws li tej dej cawv tiag.''
Ms stafford thiab Dr Booth thiaj hais tias kom tej nom tswv thiab tej niam txiv nrog xyuas kom tsis txhob muaj tej hluas haus dej caw ntau ntxiv.
Ms Stafford hais tias ''Xav kom tej nom tswv yuav tau kub siab maj ceev nrooj los pov puag tej hluas txoj kev noj qab haus huv tsis yog pheej kub siab txog tej lagluam cov kev khwv tau nyiaj xwb.''
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
