Sextortion yog ib cov kev siv cov kev sib tham ua nkauj nraug hauv online los ntxias dag lwm tus (Online dating scam), uas muaj cov teeb meem no ntau zujzus tuaj hauv teb chaws Australia no lawm. Vim rau qhov yog ib cov kev ntxias dag lwm tus uas ua npaj tau zoo heev thiab yeej so tsis tau qab tawg tsis tau lw li. Tab sis kuj muaj nom tswv qhia tias tej zaum cov neeg raug tej neeg phem no dag poob nyiaj kuj yuav tau lawv tej nyiaj rov qab thiab los kuj tau! Tab sis yuav tsum tau ua li cas?
Tsaib no, Wilson uas yog ib tug hluas neeg Australia qaug quav rau cov kev ntxias dag sextortion scam no. Nws xav tias tus poj niam nws nrog tham hauv online nyiam nws tiag ces nws thiaj xav tham tus poj niam no. Tab sis ntxheeb tau tias tsis yog li nws xav thiab nws rug cov neeg ua txhaum cai txawv teb chaws dag lawm.
Wilson qhia tias "Kuv txawm mus siv cov vidio chat nrog nws tham, ces nws txawm hais rau kuv tias kuv xav pom koj puas tau mas? thiab xav kom koj liab qab rau kuv saib puas tau? Ces nyob rau lub caij thaum kev hle ris tsho liab qab rau lawv saib txhua yam tag ces lawv txawm qhia rau kuv tias lawv yees ua duab video tseg cia lawm, Thaum kawg ces nws mam paub tias zaum no raug neeg phem dag lawm lau! Tab sis tsis yog tus poj niam nws nrog tham ntawd tib leeg dag nws xwb.Wilson hais ntxiv tias: "Tus poj niam ntawd txawm txav rau ib sab, thiab kuv txawm pom ib tug txiv neej uas tsis pom nws lub ntsej muag, thiab tus txiv neej ntawd txawm qhia rau kuv tias - peb muab koj yees ua cov yeeb yaj duab (video) lawm, yog koj tsis ua li peb hais ces peb yuav muab cov video no xa rau koj tsev neeg, thiab yuav ua rau muaj teeb meem rau koj lub neej."
Tom qab ntawd nws thiaj li yuav tau ua raws li tej neeg phem hais kom nws ua uas yuav tau siv Western Union xa nyiaj ntau pua dollars mus rau ntau lub chaw nyob ntawm teb chaws Phillippines, vim nws ntshai tsam tej neeg no coj tej duab mus qhia rau nws tsev neeg, nws tej phooj ywg hauv Facebook uas yuav ua rau nws muaj teeb meem rau nws lub neej thib lub koob lub npe.
Delia Rickard yog tus lwm coj ntwam tus poj niam ntwm lub koom haum Australian Competition and Consumer Commission (ACCC) tau hais tias yeej pom muaj tej teeb meem sextortion no tas mus li lawm.
"Muaj cov teeb meem Sextortion ntau zuj zus tuaj ntxiv lawm, tsis hais muaj rau cov tub hluas, cov txiv neej muaj hnoob nyoog lawm los sis tej poj niam los yeej raug tib si thiab," raws li Rickard tau qhia.
Txawm li cas los, Delia Rickard tau qhia tias nws lub tuam chav yeej tau koom tes nrog tej tuam txhab social media companies, tej tuam txhab nyiaj thiab tej chaw xa nyiaj rau pej kum haiv los nrog xyuas tej teeb meem no lawm. Nws tseem tau qhia ntxiv tias lub tuam chav United States Department of Justice tau coj lub chaw xa nyiaj Western Union mus hais plaub yeej rooj plaub $500 million uas cuam tshuam txog tej neeg phem tau siv lub chaw xa nyiaj no xa nyiaj rau lawv.
Rickard hais ntxiv tias tej zaum cov neeg uas tau siv Western Union xa nyiaj rau tej neeg phem uas dag lawv kuj yuam peev xwm yuav tau lawv cov nyiaj rov qab thiab. Tab sis lawv yuav tsum kub siab mus sib txuas lus los yog nrog lub tuam chav ACCC tham los yog mus txheeb xyuas tau lawv lub website
Delia Rickard tseem xav qhia ntxiv rau tej neeg sawv daws thiab tias "tsis xav kom tej neeg lam tau lam muab yus tej duab liab qab los yog tej video yees yus liab qab rau tej neeg yus nrog tham hauv online ntawd, vim yus tsis paub tus neeg ntawd zoo tias yog leej twg thiab tus neeg ntawd yuav coj yus tej khoom ntawv mus siv ua dab tsi."
