Tau muaj ib cov zauv teeb txheeb tshiab los ntawm lub koom haum the Australian Bureau of Statistics tau qhia tias muaj neeg Australian tshaj 3,100 (3,128) tus tau tas sim neej vim lawv txov txo lawv tus kheej txoj sia rau tsaib no xyoo 2017, los sis muaj neeg ze txog li 9 leeg txov txo lawv tus kheej rau ib hnub twg diam. Txawm tias tej tuam chav thiab koom haum ntau lub tau txais nyiaj pab cuam los ntawm nom tswv xeev thiab tsoom hwv teb chaws ntau tuaj ntxiv coj los daws cov teeb meem no, los yeej tseem muaj cov kab theem neeg txov txo lawv tus kheej ntau tuaj ntxiv thiab. Qhov tseem ceeb yeej tsis muaj neeg paub qhov tseeb tias yog tim dab tsi, tab sis muaj neeg ntseeg tias yeej yog ib cov txuam thawj tau ua rau muaj tej teeb meem no. Txawm li cas los yeej tseem muaj ib txhia cia siab tias yeej yuav muaj peev xwm tiv thaiv tau cov teeb meem no thiab.
Xyoo 2002 teb chaws Scotlanfd tau tsim tsa cov dej num Choose Life campaign thiab tau teeb lub hom phiaj kom los daws tau cov teeb meem tej neeg txov txo lawv tus kheej txoj siab txog 20%. Los txog xyoo 2013 ces lub teb chaws no muaj peev xwm daws tau cov teeb meem no txog li 18% lawm.
Thiaj tau ua rau muaj cov koom haum thiab tej neeg zejzog tau nqua hu kom Australia siv Scotland tus qauv coj los daws cov teeb meem suicide (cov teeb meem txov txo ib tug neeg txoj sia) hauv teb chaws Australia no.
John Brogden uas yog tus coj ntawm lub koom haum Lifeline tau hais tias tej zaum cov kev tiv nuj nqes ntau yuav ua rau tej neeg ntsib teeb meem nyuaj siab ntxov plawv heev, yog tias lawv tseem yog tej neeg nyob rau tej nroog loj uas poob hauj lwm thiab tsis muaj peev xwm them tau tej vaj tse kom tau chaw nyob.
Mr.Brogden kuj tau qhia tias tej zaum cov xwm txheej li ntuj qhuav teb nkig, kev txom nyem nyiaj txiag siv, thiab cov teeb meem sib tham sib zes hauv online kuj yuav muaj peev xwm ua rau muaj cov kab theem neeg txov txo lawv tus kheej txoj sia ntau tuaj ntxiv tau thiab.
Los yog tej neeg ua liaj ua teb uas raug teeb meem ntuj qhuav teb nkig ntuj nqha teb nqhuab vim ua rau lawv poob peev lagluam, tsis tau tsiaj txhu muag, tsis muaj zaub rau tej tsiaj txhu noj, ua rau lawv tiv nuj nqe ntau ces thiaj ua rau ib txhia raug teeb meem, thiab tau txais kev pab cuam sab laj daws kev nyuaj siab thiab nyiaj txiag pag cuam rau lawv tsis ntev los no ntawm tsoom hwv Australia.
Hayley Purdon kuj yog ib tug neeg dim ntawm cov teeb meem xav txov txo nws tus kheej txoj sia, thiab tam sim no yog ib tug statistician uas ua hauj lwm nrog lub koom haum the Roses in the Ocean los tiv thaiv cov teeb meem suicide hauv teb chaws Australia. Nws hais tias txawm tau muaj cov xwm cej luam tsis tshua zoo tshiab no los nws yeej tseem muaj kev cia siab tias peb tseem muaj peev xwm siv tau tej xov xwm tseem ceeb ntau yam coj los tiv thaiv kom txhob muaj neeg txov txo lawv tus kheej txoj sia tau hauv teb chaws Australia no thiab.
Yog tias koj paub tias koj tus kheej los yog ib tug neeg koj paub tsim nyog yuav tau txais kev pab cuam kiag tam sim no, xav kom hu rau lub koom haum Lifeline tus zauv xov tooj 13 11 14 tau.#
Mloog tau xov xwm ua lus Hmoob ntawm xov tooj cua SBS Radio Hmong Program ntxiv tau rau ntawm lub vas sab rau ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT; download tau SBS Radio App kom koj mloog tau xov tooj cua SBS Radio Hmong Program tau ntawm App Store thiab ntawm Google Play los yog download xov xwm kaw ua suab (Podcasts) ua lus Hmoob thiab lus Askiv tau ntawm los sis download tau ntawm thiab ntawm iTunes tuaj koom ua tub koom siab thiab koom mloog tau tau ntawm #SBSHmong lub Facebook page tau.
