Raws li Winnie Lau uas yog ib tug kws daws teeb meem nyuaj siab ntxov plawv (Psychologist) tau qhia, nws yeej pom thiab ntsib tej teeb meem no txhua hnub thaum tej neeg mus thov kev pab cuam ntawm nws.
Nws hais tias "xav kom tej neeg yuav tsum tau kub siab los daws tej teeb meem ib yam dab tsi thaum ntxov yog lawv tsis txaus siab rau ib cov services los yog cov products dab tsi, txhob cia thaum lig dhau heev lawm uas twb ras los ua cov teeb meem loj lawm ces mam li los xyuas."
Lau tau qhia ntxiv tias xav kom to taub zoo txog lwm tus cov kev xav thiaj yuav pab kom yus muaj peev xwm sib txuas lus tau nrog lwm tus.
Nws tsis xav kom tej neeg cia li mus cem tej tuam txhab lagluam los yog tej tuam chav lagluam uas provide cov services los yog muag tej products yus yuav los siv tab sis siv tsis tau zoo raws li yus lub siab xav, tab sis xav kom siv lwm lub tswv yim zoo dua, tsis txhob lam tau lam mus cem los yog hais lus phem rua ib tug twg.
Rose Webb uas yog tus coj lub koom haum New South Wales Fair Trading hais tias hais tias " tej neeg yeej tsis tshua xav mus yws ib yam teeb meem dab tsi vim lawv ntshai tsam ho rov qab muaj teeb rov qab rau lawv. Tsis tas li tos tej neeg tsis tshua mus yws tej teeb meem no rau lwm tus los vim yog tej zaum lawv laus lawm, lawv tsis paub zoo txog teb chaws Australia tej cai lij choj, tsis paub zoo txog nom tswv tej txheej txheem khiav dej num thiab tseem tsis paub lus zoo, ces thiaj muaj teeb meem ua rau lawv tsis muaj peev xwm coj tej teeb meem rau lawv."
Yog koj xav siv cov kev pab cuam txhais lus pub dawb rau koj hauv xov tooj ces hu tau rau tus zauv xov tooj 13 14 50 thov kev pab cuam tau.
Rose Webb hais ntxiv tias cov neeg muaj hnoob nyoog tshaj 45 xyoos rov sauv yog cov nyiam mus yws qhia txog tej teeb meem los yog cov kev tsis txaus siab rau tej services los yog tej khoom lawv yuav los siv ntau dua, piv txwv li, yws txog tej tub tsau txias, TV, tub ntxhua khaub ncaws, tej khoom siv hluav taws xob, kev yuav ib yam khoom dab tsi, kev kho tej tsheb qub yuav ntawm lwm tus los caij thiab kev ntiav tsev nyob ntawd.
Webb qhia tias "Tos tej neeg ho tsis paub nrog cov neeg tsis txaus siab rau cov services los yog cov products dab tsi tham los vim yog lawv tsis phua kiag lub ntsiab tias lawv ntsib teeb meem dab tsi, tab sis pheej piav ntev piav ntau xuas tsis raug phab nplas lawm xwb, ces tej tuam txhab lagluam thiaj tsis paub nrog lawv daws lawv tej kev tsis txaus siab los sis tej teeb meem lawv muaj. Yog li peb yuav tsum tau ua tib zoo xav zoo zoo tias cov teeb meem peb xav coj mus yws rau lwm tus tias peb tsis txaus siab yog dab tsi kiag mas lawv thiaj yuav paub nrog peb tham."
Carmen Lazar yog tus coj lis cov hauj lwm pab tej neeg tsiv teb tsaws chaw kom paub ua lub neej hauv teb chaws Australia ntawm lub koom paum Assyrian Resource Centre ntawm xeev New South Wales qhia tias nws tau pab tej laus sau ntaub ntawv mus yws txog tej teeb meem lawv tsis txaus siab rau tej lagluam los yog tej tuam chav hauj lwm. Thiab qhov tseem ceeb tshaj plaws, ces xav kom tej neeg totaub thiab paub zoo txog lawv txoj cai tam li yog ib tug neeg yuav khoom siv (Consumer) ne lawv ho muaj cai dab tsi kom zoo.
Lazar qhia tias "nws lub koom haum yeej tau koom tes nrog lub koom haum New South Wales Fair Trading los qhia txog Australia tej cai lij choj pov puag cov consumers thiab cov consumers tej cai , thiab yeej muaj cov xov tooj neeg txhais lus pub dawb rau lawv siv."
Tab sis Catherine Temple uas yog ib tug neeg tsim cai siv ntawm lub chaw hais plaub pab tej neeg yuav khoom siv Consumer Law Centre Action ntawm Melbourne los yeej qhia tias nws yeej tau pab tej laus los daws tej teeb meem coj ib cov teeb meem tsis txaus siab txog cov services los yog tej products yuav tau los tsis zoo ntawd, uas cuam tshuam txog tej nqe dej,hluav taws xob thiab gas mus txog rau nyiaj txiag thiab tej lagluam tswj nyiaj txiag, uas tej neeg mloog tau tias zoo li tej tuam chav lagluam tsis kub siab los nrog daws lawv cov teeb meem li.
Nws qhia ntixv tias "Feem ntau mas tej neeg yeej qhia tau tias muaj teeb meem dab tsi rau lawv, tab sis lawv pheej tsis qhia tias yog li cas lawv thiaj tsis txaus siab thiab xav kom tej tuam chav hauj lwm los yog tuam chav lagluam ua li cas kiag kom lawv thiaj zoo siab los sis daws tau tej teeb meem ntawd kiag. Yog li thaum koj xav mus yws ib yam teeb meem dab tsi, ces yuav tsum ua tib zoo xav tias yuav xav kom tej lagluam ua li cas daws li cas thiaj yuav ua rau koj txaus siab los yog daws tau tej teeb meem muaj rau koj ntawd."
Catherine Temple tseem qhia ntxiv tias ntawm lub koom haum uas tswj tej lagluam kom muaj txoj kev vaj huam sib luag rau txoj kev sib tw lagluam thiab pov puag cov neeg yuav khoom siv yeej muaj ib cov twj los yog cov tswv yim pab tej neeg sau cov ntaub ntawv yws txog tej teeb meem lawv tsis txaus siab rau tej lagluam los yog nom tswv tej tuam chav hauj lwm, thiab yeej tseem muaj cov social media uas tej neeg muaj peev xwm siv tau yog tias thaum lawv tau sau ntaub ntawv tag rau tej koom haum cuam tshuam lawm, tab sis lawv tsis kub siab nrog yus daws tej teeb meem no.
Temple hais tias "Yeej tau muaj tej tuam txhab lagluam loj tau los daws tej neeg cov teeb meem tom qab lawv tau siv social media los yws cov kev tsis txaus siab rau tej services los yog cov products uas siv tsis tau zoo raws li tej neeg xav. Thiab xav kom tej neeg hu ncaj qha rau lub tuam txhab lagluam uas lawv yuav tej khoom los yog siv cov services uas muaj teeb meem rau lawv ntawd tham kiag, nug tias seb yuav kom yus nrog tus neeg twg tham thiab kom lawv qhia tus neeg ntawd tus zauv xov tooj rau yus mus yws tej teeb meem rau nws kiag.'
Majorie Green uas yog tus coj sawv cev rau lub koom haum Older People Speak Out uas pab cov laus neeg kuj tau tsim ib lub vas sab hu ua coj los pab tej laus tawm tswv yim txog cov kev tu tsom kwm thiab saib xyuas lawv, thiab tej cai tsim los tswj tej dej num no kom haum tau raws li qhov lawv xav tau thiab.
Green hais tias yeej tsis tshua muaj neeg kub siab txog tej laus neeg cov kev tawm tswv yim pes tsawg, tsis hais tej xwm txheej tau tshwm sim rau cov tsev laus, los yog cov kev pab cuam uas tsim teeb meem rau tej laus los yog ua phem rau lawv ntawd li. Yog li nyob rau tiam technology age no ces tej laus thiaj muaj peev xwm siv computer mus rau lub va sab no thiaj yuav ua suab rau tej laus qhia rau lwm tus paub tias lawv xav tau dab tsi lawm.
Majorie Green qhia tias uas li cas tej laus thiaj hos tsis qhia tej teeb meem lawv tsis txaus siab rau lwm tus paub.
Nws hais tias "Twb vim yog cov laus neeg yeej tsis tshua yws taus, tsuas yog cov phaum neeg nrab thiaj yws tau xwb, hos cov yug txij xyoo 1946-64 (Baby boomers) thiab cov laus tshaj ntawd ces yeej nyob twj ywm feem ntau xwb ces lawv thiaj raug teeb meem ntau dua."
Mloog tau xov xwm ua lus Hmoob ntxiv tau rau ntawm ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT; download tau SBS Radio App kom koj mloog tau xov tooj cua SBS Radio Hmong Program tau ntawm App Store thiab ntawm Google Play los yog download xov xwm kaw ua suab (Podcasts) ua lus Hmoob thiab lus Askiv tau ntawm los sis tuaj koom ua tub koom siab thiab koom mloog tau tau ntawm #SBSHmong lub Facebook page tau.
