Dr. Asma Gundru uas ua hauj lwm ntawm lub koom haum MyHealth Medical Centre ntawm Gold Coast xeev Queensland hais tias muaj Australia cov poj niam uas tseem yug tau me nyuam ntawd tsis paub tias yog yus lub cev muaj ceeb thawj heev los sis yog rog dhau heev lawm ces yuav ua rau yus muaj tsis tau me nyuam.
Raws li tau muaj ib cov kev teeb txheeb tsis ntev los no ntawm lub chaw teeb txheeb The Australian Institute of Health and Welfare (AIHW) 2018 tau qhia, ces vim yog Australia tej pej xeem lub cev rog thiab muaj ceeb thawj tuaj ntxiv txog li 10% rau 20 lub xyoo dhau los no, ces thiaj ua rau txhua txhua 1 tug ntawm 5 tug poj niam uas tseem muaj tau me nyuam (18-44) xyoos ntawd muaj tsis tau me nyuam yooj yim, muaj teeb meem cuam tshuam txog txoj kev noj qab haus huv, muaj teeb meem rau cov kev pab kom xeeb me nyuam, muaj teeb meem rau lub caij tej poj niam no muaj me nyuam los muaj teeb meem rau lub caij lawv yug me nyuam ntawd.
Yog li ntawd cov teeb meem tej poj niam lub cev muaj ceeb thawj thiab lub cev rog ntawd tseem yuav ua rau muaj ntshav khov, muaj ntshav siab rau lub caij muaj me nyuam, mob nthav qab zeb, mob ntseg muag thiab tes taw o phob vog, muaj teeb meem rau lub raum thiab muaj protein hauv tej zis. Ntxiv ntawd tseem yuav muaj tau cov cib fim txog li 4 npaug ua rau tej poj niam no nchuav me nyuam thiab raws li lub chaw teeb txheeb AIHW tau qhia.
Txawm li cas los yeej tseem muaj chaw cia siab thiab. Raws li lub koom haum The Mayao Clinic tau qhia tsuas yog cov poj niam no ua kom lawv lub cev yuag los yog muaj ceeb thawj tsawg me ntsi txog 10% xwb yeej muaj peev xwm pab kom lawv muaj cib fim rov qab xeeb tau los muaj tau me nyuam tuaj ntxiv txog li 34% lawm thiab.
Lub chaw teeb txheeb AIHW los kuj tau hais ntxiv tias yog cov poj niam 90% uas lub cev muaj ceeb thawj thiab rog ntawd poob kilo txog li 5% xwb ces yeej pab tau kom lawv xeeb tau los yog muaj tau me nyuam thiab.
Yog li Dr. Asma Gundru thiaj xav kom tej neeg sawv daws yuav tsum tau kub siab tswj thiab tu saib xyuas lawv lub cev kom txhob muaj ceeb thawj thiab txhob rog heev.
Nws tseem tau hais ntxiv tias tsis yog ib yam zaub mov uas ib tug neeg twg noj es pab kom yuag ntawd yuav pab tau lwm tus kom yuag tib yam li yus xav thiab, vim nyiaj muaj nyias roj ntsha thiab lub cev sib txawv. Vim li ntawd, Dr. Gundru thiaj xav kom tej poj niam mus ntsib thiab mus sab laj nrog tej kws kho mob los yog mus teeb txheeb hauv internet txog tej ceeb thawj, zaub mov thiab cov kev muaj tau me nyuam es yog muaj lus nug dab tsi los ho coj mus sab laj thiab nug nrog tej kws kho mob. Kom lawv thiaj muaj peev xwm txheeb xyuas thiab nrhiav lwm yam hauv kev pab cuam rau yus txuas ntxiv kom tej poj niam no lub cev yuag thiab muaj tau me nyuam ntxiv.#
