Vim li cas Jasmine Tierra thiaj nqua yas suab Hmoob?

Jasmine Tierra-Courtesy of Jasmine Tierra Source: Courtesy of Jasmine Tierra

Get the SBS Audio app

Other ways to listen

Yog vim li cas Jasmine Tierra uas yog ib tug ntxhais hluas neeg America caj ceg neeg African thiaj nqua yas suab Hmoob?

Jasmine Tierra tau qhia rau SBS Hmong tias txij thaum nws tseem yau, nws yeej nyiam nqua yas suab lawm. Tsis tas li no los nws tsev neeg yeej nyiam nqua yas suab thiab paj nruag thiab.

Ntxiav ntawd, nws tsev neeg los tseem tau tsiv mus nyob ntau lub xeev ntawm teb chaws America yav dhau los thiab, ces thiaj ua rau nws tau mus nyob nrog ntau cov neeg zejzog.

Jasmine qhia tias thaum nws tseem nyob ntawm xeev Minnesota, ces muaj tub kawm Hmoob coob tshaj 55% kawm ntawv ntawm tej teej kawm vim yog ib lub xeev muaj Hmoob nyob coob heev. Thiaj ua rau nws muaj phooj ywg Hmoob, tau los kawm lus Hmoob thiab lwm yam lus.

Mloog tau nws zaj nkauj "Lost without you'' ntawm nod:

Nws kuj tau mus koom Hmoob cov kev sib tw nqua yas suab thaum noj peb caug xyoo tshiab ces kuj yeej lawm thaib. Yog li nws thiaj tsis xav kom cov kev muaj yeej no cia li tag li ntawd xwb ces thaum kawg ces vim nws nyiam hu nkauj thiab ces thiaj txiav txim siab los sau thiab nqua nkauj Hmoob txuam nrog lus Askiv. Thiab txij ntawd los ces nws kuj tau nqua ntau cov nkauj Hmoob lawm thiab tseem npaj yuav nqua dua ib cov tshiab xyoo 2019 no ntxiv thiab.

Mloog tau 2 zaj lus tham cuam tshuam txog ntiaj teb cov moj kuab uas muaj Hmoob cov ntawv Phaj Hauj uas tej zaum yuav ploj plam mus tau ntawm nod:

Nws hais tias lus Hmoob yog ib cov lus uas yuav tau siv suab hloov siab thiab qes. Thaum xub kawm mas nyuaj kawg tab sis thaum kawm tau lawm ces kuj tsis luaj twg thiab.

Jasmine Tierra kuj tau mus nqua nkauj rau kwv tij Hmoob Suav lub tsiab peb caug ntau xyoo dhau los thiab. Nws hais tias kuj ua rau cov kwv tij Hmoob Suav ceeb thiab yoob tias nws muaj peev xwm hu tau nkauj Hmoob, tab sis tom qab ntawd lawv kuj muaj kev lom zem nrog nws cov kev mus xyuas lawv no thiab.

Txawm li cas los nws yeej tau npaj yuav tuaj nqua yas suab ua kev lom zem ntawm teb chaws Australia no nrog lub koom haum Hmong Australia Festival rau lub 6 hli ntuj xyoo 2019 no thiab.

Tom qab ntawd ces nws tseem yuav mus koom nqua yas suab nrog lub koom haum Far North Hmong Youth Society ntawm Cairns uas ntej yuav rov qab mus rau teb chaws niam dav thiab.