Bislama Actor I tekem Storian blong Saeklon PAM i go long Sydney Opera House

Wan niufala stage pleple, “The River that Ran Uphill,” bae I tekem ples long Sydney long Julae nekis manis. Pleple ia hemi tokbaot Saeklon Pam, wan long ol bikfala saeklon we hemi kilim Vanuatu long 2015.

Edgell Junior hemi play wan main role long stage pleple ia "The Rive that ran Uphill".

Pleple ia Edgell Junior nao hemi writem, Edgell hemi kamaot long aelan blong Pentecost mo hemi writem storian ia abaotem eksperiens blong hem long taem ia. Edgell hemi wan well known actor blong Wan Smol Bag Theatre grup long Vanuatu we hemi performem fulap stage pleple mo kamaot long fulap film blong Smol Bag theatre grup tu.

Stage pleple ia hemi tokbaot ol samting olsem hao wan komuniti hemi survive afta long wan saeklon mo rapis impact blong klaemet jenis long environment mo pipol. Junior hemi writem script ia long Bislama olsem wan draft, afta oli translatem I go long Inglis lanwij wetem help blong Slingsby Theatre group, wan Adelaide based theatre grup we hemi stap perform wetem olgeta blong sam taem nao.

Yumi long Vanuatu, yumi pasem save thru long ol storian, singsing mo pikja we yumi raetem long sanbij thru long sand drawing, so long mi storian hemi evrisamting.

Edgell Junior

“The River that Ran Uphill” hemi no wan harem nogud storian nomo beh hemi kam olsem wan awareness storian tu blong evriwan we bae oli kam blong luk stage pleple ia.

Taem yumi tijim samting, man i save forgetem isi nomo be taem yumi talem olsem wan storian, bae hemi kam olsem part blong DNA blong hem mo bae i never save forgetem kasem taem hemi ded.

Edgell Junior

Andy Packer hemi Direkta blong Slingsby Theather grup mo hemi talem se Vanuatu mo Pasifik komuniti oli stap long frontline taem i kam long isiu blong klaemet jenis mo thru long pleple ia bae hemi save kivim wan lukluk long hao ol lokol komuniti long Vanuatu oli kam tugeta blong sapotem olgeta yet afta long Saeklon Pam long 2015.

Mi hope se taem mifala sharem storian ia thru long stage pleple ia bae i save stap olsem wan wake-up call mo kivim hope blong ol man oli folem eksampol blong ol Vanuatu komuniti we oli save wok gud tugeta mo wan rod blong wok thru long jalens blong klaemet jenis.

The River that Ran Uphill bae hemi fes taem we stage pleple ia bae I happen long Sydney long namba 25 – 27 Julae, 2024, mo bae hemi wan fes taem eksperiens tu blong Edgell Junior blong perform long Sydney Opera House. Hemi se eventhough hemi wan festaem eksperiens, be hemi no feelim wan emotional feeling yet kasem taem bae hemi tekem center stage long Sydney Opera House.