Vanuatu Consulate General Ofis long Sydney hemi Officially Open

Kavman blong Vanuatu hemi officially openem Consulate General ofis long Sydney, Ostrelia, long wik ia hemia long Monday namba 25 dei blong manis Maj, 2024.

(L) Her Excellency, Honorable Margaret Beazley AC KC, Governor blong New South Wales (NSW) mo (R) Minista blong Foren Affea mo sametaem Deputi-Praem Minista, Hon. Matai Seremiah Nawalu tufala nao I mekem offical opening blong Vanuatu Consulate General Ofis long Sydney.

Honorable Minista blong Foren Affea mo sametaem Deputi-Praem Minista, Hon. Matai Seremiah Nawalu hemi officially mekem opening blong Ofis blong Consulate General long Sydney long Monday namba 25^th blong manis blong Maj 2024.

Seremoni ia, I lukim Hon. Matai Seremaiah Nawalu mo Her Excellency, Honoruable Margaret Beazley AC KC, Governor blong New South Wales (NSW) tufala nao I mekem, mo hemi karem tugeta plante impoten pipol blong ol difren embassies, consulate, regional kavman mo tu ol student blong Vanuatu we oli stap stadi long New South Wales we oli stap tu long taem ia blong witnisim impoten milestone ia.

Presence blong Consulate General long Sydney bambae hemi boostum Trade mo Investment blong yumi linkim Ostrelian based bisnis komuniti long Sydney wetem Vanuatu bisnis komuniti.

Donald Pelam - Vanuatu Consulate General long Sydney

Mr. Donald Pelam hemi Vanuatu Consulate General long Sydney

Hae ofis blong Vanuatu ia bae Mr. Donald Pelam nao bambae hemi lukaotem. Hemi karem appointment blong hem olsem Consul General blong Vanuatu long Sydney long last yia 2023. Mr. Pelam hemi gat ova long 12 yia eksperiens long eria blong external trade wetem Vanuatu kavman. Consul General Pelam i talem se wok blong hem olsem Consul General hemi statem finis long las yia, hemia long saet blong ol bilaterals discussions we hemi stap gat wetem ol narafala foreign counterpats blong hem long Sydney. Hemi se wetem seremoni blong yesterday, Vanuatu kavman hemi kam blong luk save impotens blong gat wan impoten ofis olsem long Sydney blong provaetem sevis i go long ol citisen blong Vanuatu long Sydney Ostrelia mo helpem olgeta tu we oli stap tinktink blong explorem ol opportunities long Vanuatu.

Vanuatu Consul General Donald Pelam mo Vanuatu Ostrelian Hae Komisina, Her Excellency Heidi Bootle wetem samfala memba blong Vanuatu komuniti long Sydney, Ostrelia.

Afta long offical opening seremoni blong yestede, ol official blong Vanuatu kavman oli bin gat wan raon tebol miting wetem ol bisnis komuniti blong Sydney, miting ia Hon. Minista Matai Seremiah nao wetem Vanuatu Ostrelian Hae Komisina, Her excellency Heidi Bootle, tufala i chairem.

Tede Tusdei namba 26 blong manis Maj, 2024, Honorable Minista blong Foren Affea Hon. Matai Seremaiah Nawalu hemi stap long Canberra wetem Ostrelian Hae Komisina we I stap long Vanuatu, Her Excellency Heidi Bootle, Direkta blong External Trade long Vanuatu mo ol ofisa blong Department blong Vanuatu Foren Affea blong oli kontinu wetem wokbaot blong olgeta ia blong mitim ol narafala hae delegation blong Ostrelian Kavman.

Vanuatu kavman i stap lukluk naoia blong openem tufala narafala consulate ofis bakeken long Ostrelia, hemia long Melbourne mo Brisbane, recruitment proses blong tufala ofis ia oli statem finis.