Mloog tau cov lus SBS Radio Hmong Program nrog Maja Cocjiancic tham ua lus Askiv tau ntawm no:
Mloog tau lub koom haum UNPO cov lus tawm tswv yim txog Nplog cov hauj lwm human rights ntawm no:
Lub koom haum European External Action Services-Asian Division uas sawv cev rau lub koom haum European Union tau koom nrog Nplog lub tuam chav lis laj fai pej kum lub chav tswj pej kum haiv tej cai thiab cai lij choj uas tau sab laj txog cov hauj lwm Human Rights dialogue and Governance tsis ntev los no ntawd tuam ceeb Brussels teb chaws Belgium ntawd, kuj tham tau nqee yam lus tseem ceeb thiab. Tab sis lub koom haum Unrepresented Nations and Peoples Organization (UNPO) tus Program Officer hu ua Julie Duval tseem hais tias lub rooj sab laj no tsis tham txog cov pawg neeg tsawg thiab tej neeg txum tim nyob hauv teb chaws Nplog txoj cai li . Tsis tas li no los tseem muaj ntau yam teeb meem human rights txaus txhawj xeeb heev hauv teb chaws Nplog ntxiv thiab. Yog li ntawd ne lub rooj sab laj no ho tham tau lus tseem ceeb dab tsi thiab tsoom hwv Nplog ho ua tau dab tsi thiab European Union (EU) tseem tau soj qab taug lw dab tsi ntxiv.
Maja Cocjiancic, uas yog European Commission tus kis hais lus sawv cev uas tswj cov dej num pej kum, kev ruaj ntseg, tej neeg zejzog kev sib khom nrog lwm tus tau hais tias EU cov neeg sawv cev rau nws uas ua hauj lwm ntawm cov teb chaws Asia cov kev tau nrog nom tswv Nplog tham ntawm Brussels tsis ntev los no kuj tham tau qee yam zoo. Hos nom tswv Nplog los kuj qhia tias nws txaus siab yuav los nrog xyuas thiab tsim kom tau cai los daws cov teeb meem human rights thiab pov puag nws tej pej xeem txoj cai. Tsis tas li nws yuav yog lub teb chaws tswj hwm raws cai lij choj thiab yuav cam hwm pej kum haiv tej cai human rights standards.
Maja Cocjiancic hais tias "Tej zaum vim yog Nplog tseem ntsib teeb meem nyuaj ntau yam cuam tshuam txog cov kev ywj pheej rau fab kev tawm tswv yim thiab kev sib sau tau ywjpheej, tab sis lub teb chaws no kuj tau kub siab heev tsis hais hauv nws teb chaws los yog koom tes nrog pej kum haiv los kos xyeem mem tes pom zoo nrog UN universal periodical review process uas nws yeej tau pom zoo nrog ntau tshaj 100 tawm tsab cai uas pej kum haiv tseem yuav taug qab soj lwm txuas ntxiv. Peb kuj tau ua hauj lwm ua ke los xyuas UN ntau cov ntau ntawv uas muaj UN human rights charters nrog thiab. Yog li cov hauj lwm human rights tsuas yog ib feem ntau ntau txoj xub ke ua peb koom tes ua ke los nrhiav tswv yim kom daws tau tej teeb meem no xwb. Tsis tas li no peb kuj tseem tau tham txog ntau yam teeb meem tsis tshua zoo tham pes tsawg ntxaws heev kom muaj peev xwm los daws tau tej teeb meem no raws li qhov peb xav thiab."
Tab sis raws li lub koom haum Human Rights in Asia tsab ntawv cej luam tau qhia ntawd kuj txawv thiab, vim Nplog tsuas pom zoo kos xyeem mem tes rau 80 tawm tsab cai xwb, tab sis Nplog tsis pom zoo nrog 18 tsab li Germany thiab Canada tau hais kom ua raws li tej cai tau pom zoo ntawm tuam ceeb Paris teb chaws Fabkis uas xav kom Nplog muab nws cov neeg raug txim uas tawm tsam thiab cov nyom nrog nws tso, kom Nplog pom zoo kos xyeem mem tes los siv cov cai Internaitonal Human Rights Treaties, tso tseg txhob siv cov kev rau txim tuag rau tej neeg lawm, thiab xaus nws cov kev txwv tsis pub nws tej pej xeem muaj cai tawm tau suab thiab tawm tswv yim cov nyom nrog nws los yog muaj cai sib sau ua koom haum muaj cai tawm tsam nom tswv thiab muaj caij xaiv coj nseeg tau yam kev cai yus nyiam, thiab tso cai rau pej kum haiv cov neeg tswj cai ncaj ncees mus tshuaj ntsuam xyuas tej teeb meem human rights issues hauv Nplog teb ntawd.
Hos cov cai uas Nplog pom zoo kos xyeem mem tes yog tsab cai txwv tsis pub faib cai ntxub ntxaug ib pawg neeg twg, tso cai rau laj mej pej xeem huab hwm muaj cai koom txhim teb kho chaw, muaj cai koom laj fai kum xeeb muaj cai coj ntseeg lawv tej kab lis kev cau, tsab cai txwv tsis pub faib cai poj niam, tsab cai txwv tsis pub tsub muj tsim txom ib tug twg, tsab cai txwv tsis pub siv me nyuam yaus ua niam ntiav, yees duab liab qab, txwv tsis pub siv me nyuam yaus uas tub rog, thiab pov puag tej neeg puas cev txoj cai nrog rau pov puag thaj tso txhua leej txhua tus kom txhob raug yuam ploj yam tsis paub ntab ntw.
Maja Cocjiancic hais tias “Peb lub koom haum European yeej tau los taug qab soj lwm zoo heev txog lub teb chaws Nplog no cov kev hloov kho nws tej cai uas nom tswv Nplog tseem yuav lis ntev ntxiv mus kom nws yog lub teb chaws tswj hwm raws cai lij choj rau xyoo 2020. Peb kuj tau txhawb nqa nom tswv Nplog thiab tau koom tes nrog lawv los xyuas kom tsim tau tej cai zoo los cam hwm pej kum haiv tej cai human rights standards. Nplog twb tau pom zoo rau 7 nqe ntawm 9 nqe cai Human Rights Conventions lawm. Thiab peb yeej pom tau tias cias seb Nplog uas ua tau raws li tej cai hais ntawd thiab tso cai rau pej kum haiv cov neeg mus txheeb xyuas tej teeb meem human rights thiab cej luam qhia tej teeb meem no rau pawg rooj saib xyuas uas tso siab tau rau thiab ntseeg tau paub. Piv txwv li pej kum haiv tsab cai pov puag me nyuam yaus txoj cai thiab pej xeem txoj cai muaj cai los koom txhim teb kho chaw thiab koom tej lajkam teb chaws, los yog tej koom haum txoj cai uas peb xav kom yuav tsum tsim cai los qhia kom meej tseeb thiab kub siab los lis kom tau tej dej num no tiag uas peb tseem soj qab taug lw lawm seb zoo li cas ntxiv."
Txawm ntau xyoo tsis ntev los no, Nplog tau ua tau ntau yam zoo rau tej hauj lwm human rights thiab tau txais kev qhuas los ntawm UN Human Rights Council, piv txwv li nws tau tso cai rau pej kum haiv cov neeg mus txheeb xyuas cov kev pov puag tej me nyuam yaus txoj cai thiab txoj cai ywj pheej rau fab kev coj ntseeg mooj kav moj coj (religion) hauv Los tsuas teb. Los UN human rights councils yeej tseem cej luam tias Nplog tej cai tsim tau los siv tam sim no tseem yuam Nplog tej pej xeem txoj cai cuam tshuam txog fab kev ntseeg, kev tawm tau tswv yim ywj pheej, kev muaj cai los koom tej laj kam teb chaws. Muaj ib cov piv txwv li Vwj Mais nrog rau Dr. Sombat Somephone uas tau ploj hauv Nplog teb yam tsis paub ntab ntw dab tsi uas nom tswv Nplog tau qhia tias nws tsis paub dab tsi txog tej xwm txheej no, nrog rau cov neeg Nplog ua hauj lwm ntawm Thaib teb uas tau tib tau liam tias nom tswv Nplog tias yog tus tsoom hwv tsis ncaj, lwg noj lwg haus, muag nplog tej peev txheej uas muaj xyoob ntoo rau mab sua yam tsis raug kev raug cai ntawd kuj raug rau txim kaw tsev laj cuj thiab lawv yuav tau los lees txhaum tias lawv cov kev tawm tsam tsoom hwv ntawd ua tsis yog lawm. Ntxiv ntawd tseem muaj ib txhia neeg Nplog uas ntseeg kev cai Christianity raug yuam kom rov qab los ntseeg lawv cov kev cai qub ib txwm coj thaum lawv tsis yeem ces tseem muab lawv yuam kom khiav tawm ntawm tej zos lawv nyob mus rau lwm qhov.
Maja Cocjiancic thiaj li hais ntxiv tias “Yog tej yam tseem ceeb heev uas nom tswv Nplog tau qhia tias nws kub siab yuav los lis tej hauj lwm no. Tab sis yeej tsis tau txhais tau tias yuav ua tau tej dej num no tau raws li qhov peb xav tau, tab sis peb yeej pom tau tias nws yeej kub siab los lis tej dej num no ua ntuv zus txuas ntxiv lawm. Yeej tseem yuav muaj peev xwm los xyuas thiab tau ntau yam hauj lwm uas peb yeej tau coj los sab laj sib tham hauv lub rooj koom txheej Human Rights Dialogue nrog rau lwm txoj xub ke coj los sib txuas lus nrog nom tswv Nplog kom lis tau tej dej num no uas yog tej yam peb tseem yuav ua txuas ntxiv."
Xov tooj cua Radio Free Asia (RFA) los kuj tau cej luam tias "Nplog tus coj Bounhang Vorachit yeej tau qhia tias Nplog xav txhim kho kom nws lub teb chaws dim ntawm cov teb chaws txom nyem rau xyoo 2024, uas UN yeej tau pom zoo cog lus tias yuav pab Nplog kom ua tau li hais ntawd kom Nplog ras los ua tau lub teb chaws muaj kev txhim kho thiab ceev txuag tau nws tej peev txheej kom siv tau ntev rau yav tom ntej, kom yog lub teb chaws tau txais kev vaj huam sib luag, kom yog lub teb chaws vam meej uas txhua leej txhua tus tau txais txiaj ntsim yuav tsis cia ib tug twg poob qab thiab kom Nplog yog lub teb chaws khwv tau nyiaj nrab rau xyoo 2030," .
Maja Cocjiancic qhia ntxiv tias “EU yeej tau koom nrog lwm lub teb chaws los tshwm nyiaj txiaj coj los tsim ib cov project uas hu ua citizen engagement for good governance accountability in the rule of laws los yog pej xeem muaj feem koom rau cov kev tswj hwm uas tswj raws cai lij choj, uas muaj cov hom phiaj los pab kom muaj kev dawb huv rau tej legal system thiab pab kom tsev tsoom hwv muaj hwj chim thiab muaj cai tshuaj ntsuam thiab ua tib zoo tshawb xyuas tshaj qub ntxiv thiab pab kom tej koom haum muaj feem koom rau Nplog cov kev tsim cai thiab txhim kho teb chaws. Yeej tau txais kev koom tes los ntawm nom tswv Nplog lub tsev tsoom hwv thiab tej koom haum txhim kho nrog rau tej koom haum zejzog los pab txhawb nqa kom nplog muaj kev sib moj them nqag kab thiab tswj hwm raws li tej cai lij choj tau tsim. Tab sis yeej yog tej dej num yuav siv caij nyoog, uas tseem muaj qee yam teeb meem yuav tau xub los daws ua ntej, tab sis peb yeej pom tau tias Nplog yeej mus rau txoj xub ke yog lawm."
Txawm tau muaj tej xwm txheej li tau hais dhau los saum toj no tshwm sim hauv Nplog teb lawm los, Dr. Lis Pov Xyooj uas yog tus coj ntawm lub koom haum United Hmong Vision, lub koom haum UNPO thiab lub koom haum Congress of World Hmong People (CWHP) tseem tau hais tias yeej tseem muaj ib cov Hmoob nyob pem hav zoov hauv Nplog teb ntawm Phoubia xeev Xaysomboun tseem raug nom tswv nplog txib peeb zeej mus tawm tsam. Thiab lawv tau nqua hu kom United National Human Rights Council ua tus mus tshuaj ntsuam xyuas cov teeb meem no, kom Nplog tso cai rau pej kum haiv mus txheeb xyuas thiab tshawb qhov tseeb txog tej teeb meem no, thiab xav kom UN ua tus los nrog tswj thiab pab daws cov teeb meem kub ntxhov tau muaj ntawm nom tswv Nplog thiab cov Hmoob Caubfab uas tau pab America cov CIA ua tsov rog Secret War dhau los, uas nom tswv Nplog tseem pom tau tias yog ib cov neeg rov taw tuam ntuj ntxeev siab rau teb chaws Nplog no kom daws tau tej teeb meem no .
Dr. Lis Pov Xyooj tau hais tis nws xav tau txais kev ncaj ncees ntawm tsoom hwv Nplog rau Hmoob thiab kom nom tswv Nplog cam hwm Hmoob tam li yog neeg rau lub caij nws tau coj nws tus kws lij choj mus nrog nom tswv Nplog sib hais hauv United Nations Human Rights Council. Tab sis Nplog pab nom sawv cev rau Nplog hauv UN tsis lees paub tej lus iab liam tau hais dhau los saum toj no, thiab cav tias tej lus hais ntawd yeej tsis muaj laij thawj thiab tsis muaj tseeb. Vim Nplog tsab cai Penal Law nqe 666-176 yeej tau teev zwm tseg lawm tias txhua pawg neeg hauv Nplog teb yeej tau txais vaj huam sib luag thiab yog leej twg tseem faib cai ib pawg neeg twg ces yuav raug rau txim raws li tsab cai no tau teev tseg.
Maja Cocjiancic, uas yog European Commission tus kis tswj cov dej num Foreign Affairs and Security Policy, European Neighbourhood Policy and Enlargement Negotiations thiaj xav xaus lus tias txawm Nplog tseem ntsib ntau yam teeb meem cuam tshuam txog human rights los Nplog yeej lis tau qee yam dej num zoo lawm thiab.
Maja Cocjiancic hais tias "Peb cov neeg sawv cev hauv tuam ceeb Vientiane yeej tau koom tes nrog lwm lub koom haum uas muaj UN nrog ntawd los nrog Nplog txheeb xyuas thiab soj qab taug lwm rau Nplog tej lauj lwm uas nws pom zoo koom nrog pej kum haiv cov cai human rights coventions no lawm. Tsis tas li no peb kuj tau tham txog qhov tseem ceeb ntawm cov kev yuav tau los thaj tsob thiab pov puag tej neeg pawg tsawg thiab. Yog tham txog tej cai uas tso cai rau cov koom haum Non-Governmental Orgainsations (NGOs) thiab tej zwj ceeb zoj khi thiab tso cai pub lawv ua hauj lwm no ces EU yeej tau nrog tsoom hwv Nplog tham thiab yuav tham txuas ntxiv mus. Peb xav qhia tias tej koom haum no tsis yog pab lub teb chaws no txhim teb kho chaw xwb tab sis yeej tsim nyog tso cai rau lawv muaj feem koom los tsim tej cai no uas yog ib feem tseem ceeb ntawm tej koom haum no thiab. Nyob rau lub caij uas EU delegation tau sab laj nrog nom tswv nplog txog cov hauj lwm human rights dialogue thiab governance ntawd ces Belgium lub koom haum NGO kuj tau los tham txog cov kev pov puag tej poj niam thiab cov neeg puas cev uas txhua tog tau koom yeej sib pauv hloov tswv yim thiab pom txog qhov tseem ceeb ntawm tej dej num no. Tsis tas li ntawd los nom tswv Nplog kuj tej teeb tsa cov rooj sab laj hauv Vientiane nrog rau tej koom haum pab cuam pej kum thiab cov koom haum NGOs hauv teb chaws los sab laj txog tej teeb meem no thiab tau tham txog ntau yam teeb meem tau tshwm sim thiab tau tham txog ntau yam teeb meem tsis tshua zoo tham ntawd thiab,"#.
Mloog tau xov xwm ua lus Hmoob ntxiv tau rau ntawm ob hnub xws li hnub zwj Teeb (Thursday) 6pm AEDT-Australian Eastern Standard Time thiab hnub zwj Hnub (Sunday) 11 am AEDT; download tau SBS Radio App kom koj mloog tau xov tooj cua SBS Radio Hmong Program tau ntawm App Store thiab ntawm Google Play los yog download xov xwm kaw ua suab (Podcasts) ua lus Hmoob thiab lus Askiv tau ntawm los sis tuaj koom ua tub koom siab thiab koom mloog tau tau ntawm #SBSHmong lub Facebook page tau.
