Raws li lub koom haum CoreLogic uas yog ib lub koom haum teeb txheeb txog tej xov xwm txog tej vaj tse nyob tsab ntawv cej luam tau qhia, ces tam sim no tus nqe ntiav tsev nyob nrab thoob Australia yuav tau them txog li ntawm $601 rau ib lub limtiam twg lawm.
CoreLogic kuj tau qhia tias thiaj ua rau ib yam neeg twg yuav tau siv nyiaj tshaj $31,000 rau ib lub xyoos twg los ua nqe ntiav tsev nyob.
Tej nqe ntiav tsev nyob kim no thiaj ua rau Australia tej cuab yig txom nyem nyiaj txiaj siv thiab yuav tau tso tseg lwm yam li yuav zaub mov noj tsawg, yuav tau yoo qee pluas hno, tsis mus siv kev kho mob, yuav ua rau neeg Australia nyob rau tej tsev nyob uas tsis tshua tau txais kev nyab xeeb, tsis tau txais kev ruaj ntseg, thiab thaum kawg ces yuav ua rau ib txhia neeg Australia uas tsis muaj peev xwm them tau nqe ntiav tsev nyob ras los ua tej neeg tsis muaj vaj tse nyob. Tej xwm txheej no yuav ua rau neeg Australia tsis tau lub zoo neej ua.
Productivity Commission tsab ntawv cej luam tau qhia tias yeej muaj ib txhia neeg uas thov tsis tau kev pab cuam ntawm tsoom fwv lawm tau ras los ua tej neeg tsis muaj vaj tse nyob thiab pw rau ub rau no yuav laug txog li 25 feem pua.
Lub koom haum Mission Australia hais tias Australia yuav tsum tsim kom tau tej tsev social housing uas tej neeg muaj peev xwm ntiav tau nyob txog li 1 million lub rau 20 xyoo ntxiv no mas thiaj yuav muaj vaj tse txaus rau tej neeg nyob.
Thiab tsoom fwv Albanese tsab cai Housing Australia Future Fund $10 billion uas tau tsim tsaib no lub 9 hlis ntuj yeej npaj tsim kom tau 40,000 lub tsev social and affordable rental homes rau tej neeg ntiav nyob.
Mloog tau hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm , , thiab . Downloadthiab caum
