ඔස්ට්‍රේලියානු මහ මැතිවරණය එළඹෙන මැයි 21 වන දින පැවැත්වීමට නියමිතය.
ඒ අනුව මහ මැතිවරණය උදෙසා ප්‍රධාන පක්ෂ මේ වන විට තම මැතිවරණ ප්‍රචාරන ව්‍යාපාර දියත් කර තිබෙනවා.
ඔස්ට්‍රේලියාවේ ප්‍රධාන පක්ෂ මෙවර මැතිවරණය ජයගතහොත් ඉටු කරන පොරොන්දු පිළිබඳ වාර්තාවන නවතම තොරතුරු මෙම ලිපියෙන් ගෙන එයි.
ඩිජිටල් සහ සමාජ මාධ්‍ය ජාලයන්හි අපගේ SBS සිංහල සේවය හා සම්බන්ධ වීමට:
SBS Radio App: හෝ වෙතින් SBS Radio App නොමිලයේ Download කරගෙන සජීවීව SBS සිංහල වැඩසටහන සහ අපගේ අනෙකුත් podcast වලට සවන් දෙන්න.
කම්කරු පක්ෂය
ඔස්ට්‍රේලියාව පුරා හදිසි සත්කාර සායන 50 ක අත්හදා බැලීමක් කම්කරු පක්ෂ නායක Anthony Albanese මෙල්බර්න් නුවරදී නිවේදනය කළේය.
Medicare Urgent Care Clinics නමින් හඳුන්වන මෙම සායන, පවුල් සඳහා කාර්යබහුල රෝහල්වල හදිසි ප්‍රතිකාර අංශ සඳහා විකල්පයක් ලෙස කම්කරු පක්ෂය ඉදිරිපත් කරයි.
තදබදය සහිත හදිසි ප්‍රතිකාර අංශ නිදහස් කිරීම සඳහා බිඳුණු අස්ථි, සුළු පිළිස්සුම් සහ කැපුම් සඳහා මැහුම් ඇතුළු හදිසි වෛද්‍ය ප්‍රතිකාර අවශ්‍ය රෝගීන්ට මෙම සායනවලදී ප්‍රතිකාර කරනු ඇත.
මෙම සායන රට පුරා GP සැත්කම් සහ ප්‍රජා සෞඛ්‍ය මධ්‍යස්ථානවල පදනම් වනු ඇති අතර වසර හතරක් තුළ ඩොලර් මිලියන 135 කට වඩා වැඩි මුදලක් මේ සඳහා වැය වන බව වාර්තා වේ.
දිගු රැඳී සිටීමකින් තොරව පවුල්වලට අවශ්‍ය සෞඛ්‍ය රැකවරණය ලබා ගැනීමට මේ මගින් හැකි වනු ඇති බව කම්කරු පක්ෂ නායක Anthony Albanese පැවසීය.
මේ අතර JobSeeker දීමනාව පිළිබඳව ද කම්කරු පක්ෂය විශේෂ ප්‍රකාශයක් සිදු කළේය.
තම පක්ෂය තවදුරටත් JobSeeker ගෙවීම සමාලෝචනය කිරීමට සැලසුම් නොකරන අතර එය දැනට පවතින දිනකට ඩොලර් 46ට වඩා ඉහල නැංවිය හැකි බව ඔවුහු පැවසුහ.
විපක්ෂයේ මෙම පියවර සමාජ සේවා කණ්ඩායම් සහ විරැකියා ප්‍රතිලාභ ඉහල නැංවීම සඳහා පෙනී සිටින Greens පක්ෂයේ විවේචනයට ලක්ව ඇත.
ලිබරල් සන්ධාන රජය පසුගිය වසරේ අප්‍රේල් මාසයේදී JobSeeker දීමනාව දෙසතියකට ඩොලර් 50කින් වැඩි කළේය.
මේ අතර JobSeeker දීමනාවට තාවකාලිකව සිදු කරන ලද වැඩි කිරීම ස්ථිර කළ යුතු බව කොවිඩ් වසංගතය අතරතුර තම පක්ෂය ඉතා දැඩි ලෙස පැවසු බව කම්කරු පක්ෂයේ සෞඛ්‍ය කටයුතු පිළිබඳ ඡායා අමාත්‍ය Mark Butler පැවසීය.
වත්මන් රජය JobSeeker දීමනාව යළි ඩොලර් 40 දක්වා අඩු නොකිරීමට කම්කරු පක්ෂය රජයට එල්ල කළ පීඩනය ඉතා විශාල එකක් බවද ඔහු පැහැදිලි කළේය.
Opposition leader Anthony Albanese and deputy Labor leader Richard Marles appear at the Australian Nursing and Midwifery Federation on day three Source: AAP / LUKAS COCH/AAPIMAGE
ලිබරල් පක්ෂය
බ්‍රිස්බේන් සහ වික්ටෝරියා හි තෙල් පිරිපහදු මධ්‍යස්ථානවල පහසුකම් වැඩිදියුණු කිරීම උදෙසා ප්‍රධාන ඉදිකිරීම් ආරම්භ කිරීම සඳහා ඩොලර් මිලියන 125 ක ප්‍රදාන දෙකක් ලබා දීමට අගමැති Scott Morrison පසුගියදා වික්ටෝරියා ප්‍රාන්තයේ Geelong ප්‍රදේශය වෙත ගියේය.
ඔස්ට්‍රේලියානුවන්ට මෙය අත්‍යවශ්‍ය දෙයක් බවත් ඔබ ට්‍රක් රථ රියදුරෙක්, ගොවියෙක් හෝ පතල් කම්කරුවෙකු වුවත්, ඔබට ඉන්ධන අවශ්‍ය වන අතර ආරක්ෂිතව සහ දේශීයව ඉන්ධන නිෂ්පාදනය තිබීම අත්‍යවශ්‍ය බවත් අගමැති මොරිසන් එහිදී පැවසීය.
ලිබරල් සන්ධානය Tennant Creek, Alice Springs සහ Katherine ප්‍රදේශවල logistics hubs තුනක් සඳහා ඩොලර් මිලියන 440ක් ආයෝජනය කරන බව ඔස්ට්‍රේලියාවේ නියෝජ්‍ය අග්‍රාමාත්‍ය Barnaby Joyce පසුගියදා Northern Territory හිදී පැවසුවේය.
පතල් කම්කරුවන්ට, ගොවීන්ට සහ නව කර්මාන්තවල සංවර්ධකයින්ට Northern Territory හි මෙම නව සැපයුම් මධ්‍යස්ථානවලින් ප්‍රතිලාභ ලබා ගැනීමට හැකිවනු ඇතැයි ඔහු පැවසුවා.
මෙය Northern Territory කලාපයේ විශාල සම්පත් විවෘත කිරීමට, සැපයුම් දාම ශක්තිමත් කිරීමට සහ අපනයන ඉහළ නැංවීමට බලපාන බවද ඔහු පැවසීය.
Prime Minister Scott Morrison during a visit to Geelong Oil Refinery in Geelong. Victoria. Source: AAP
ග්‍රීන්ස් පක්ෂය
මෙවර මහ මැතිවරණයේදී තම පක්ෂය බල තුලනයක් ලබා ගන්නේ නම් Medicare මගින් දන්ත සෞඛ්‍ය ආවරණය කිරීමට පාලන රජයට බල කරන බව ග්‍රීන්ස් පක්ෂය නිවේදනය කර තිබේ.
මේ හරහා ඔස්ට්‍රේලියාවේ දන්ත වෛද්‍ය ප්‍රතිකාර ප්‍රතිසංස්කරණය කිරීමට ග්‍රීන්ස් පක්ෂය සූදානම් වේ.
ග්‍රීන්ස් පක්ෂයේ ඩොලර් බිලියන 77 ක සැලැස්ම හරහා ඔස්ට්‍රේලියානුවන්ට Medicare අරමුදල් සහිත දන්ත සත්කාර සහ විකලාංග ප්‍රතිකාර මෙන්ම මුඛ ශල්‍යකර්ම, periodontics සහ prosthodontics ප්‍රතිකාර ලබා ගැනීමට හැකි වේ.
දන්ත සෞඛ්‍ය යනු මානව අයිතිවාසිකමක් බව ග්‍රීන්ස් පක්ෂ නායක Adam Bandt පැවසීය.
මෙම සැලැස්ම සඳහා වසරකට ඩොලර් බිලියන 8 ක් පමණ වැය වන බවද ඔහු සඳහන් කළේය.
